އިންޑިއާއާ އެއްވެސް ޒާތީ ކަމެއް ނެތް: ރައީސް ޔާމީން
އިންޑިއާއާ އެއްވެސް ޒާތީ ކަމެއް ނެތް ކަމަށާއި އެމަނިކުފާނުގެ ވެރިކަމެއްގައި އިންޑިއާ ވާނީ ގާތް ރަހުމަތްތެރި ގައުމަކަށް ކަމަށް ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވީ ހއ. އަތޮޅުގެ ރަށްތަކަށް ފެއްޓެވި ދަތުރުފުޅުގައި ތުރާކުނަށް ވަޑައިގެން ބޭއްވި ޖަލްސާގައި ވާހަކަދައްކަވަމުންނެވެ.
ރައީސް ޔާމީން ވިދާޅުވީ އިންޑިއާއާ ރަހުމަތްތެރި ގުޅުމެއް ބޭއްވި ނަމަވެސް މުޢަމަލާތު ކުރަން ޖެހޭނީ ދިވެހިރާއްޖެއަކީ މިނިވަން ގައުމެއް ކަމާއި ދިވެހިރާއްޖެއަކީ އިހްތިރާމް ލިބިގެންވާ ގައުމެއް ކަމަށް ގަބޫލު ކޮށްގެން އެ ބީދައިން ކަމަށެވެ.
އަދި ކޮންމެ ކަމެއް ކުުރުމުގެ ކުރީން އިންޑިއާގެ ހުއްދަ ހޯދަން ޖެހޭ ހިސާބަށް ކަންކަން ގެންގޮސްފިނަަމަ އެއީ އެކުވެރި ގައުމެއްގެ ގޮތުގައި ނުބެލެވޭނެ ކަމަށް ރައީސް ޔާމީން ވިދާޅުވިއެވެ.
“އަޅުގަނޑުމެންނަކީ ދެވަނަ ދަރަޖައިގެ ގައުމެއް ކަމަށް، އަޅުގަނޑުމެންނަކީ އެ މީހުން ބުނާ ކޮންމެ ކަމެއް ކުރަން ޖެހޭނެ ބައެއް ކަަމަށް، އަދި އަޅުގަނޑުމެން ކުރާ ކޮންމެ ކަމެއް ކުރަންވާނީ އިންޑިއާއިން ކަމަށް ގަބޫލު ކޮށްގެން ކުރާ ކަމަށް ވަންޏާ އަޅުގަނޑުމެންނަށް އެ ގުޅުން ނުބޭއްވޭނެ” ރައީސް ޔާމީން ވިދާޅުވިއެވެ.
އެމަނިކުފާނުގެ މި ދަތުރުފުޅަކީ ޕީޕީއެމްގެ ރިޔާސީ ޓިކެޓު ލިބިވަޑައިގަތުމަށްފަހު އަތޮޅުތެރެއަށް ކުރައްވާ ދެވަނަ ދަތުރުފުޅެވެ.
ރިޔާސީ ކެންޑިޑޭޓުގެ ގޮތުގައި ކުރައްވާ ދެވަނަ ދަތުރުފުޅުގެ މައިގަނޑު ސަބަބުތަކުގެ ތެރޭގައި 2023 ވަނަ އަހަރުގެ ޕީޕީއެމްގެ ރިޔާސީ މެނިފެސްޓޯއަށް މަޢުލޫމާތުތައް އެއްކުރެއްވުން ހިމެނެއެވެ.
ރައީސް ޔާމީން ކުރައްވާ މި ދަތުރުފުޅުގައި އެ އަތޮޅުގެ ފަސް ރަށަކަށް ވަޑައިގަންނަވާނެއެވެ. އެއީ ކެލާ, ބާރަށް, ދިއްދޫ, އިހަވަންދޫ އަދި ތުރާކުނަށެވެ.
