ޑްރަގް އޮޕަރޭޝަނުގައި ހޯޑެއްދޫން ހައްޔަރުކުރި ދެ މީހުންގެ ބަންދުގެ މުއްދަތު އިތުރުކޮށްފި
ގދ.ހޯޑެއްދޫގައި ފުލުހުން ހިންގާ މަސްތުވާތަކެތީގެ ބޮޑު އޮޕަރޭޝަނުގެ ތެރެއިން ހައްޔަރުކުރި ދެ މީހުންގެ ބަންދަށް އިތުރު 10 ދުވަސް ޖަހައިފިއެވެ.
މަސްތުވާތަކެތީގެ ބޮޑު އޮޕަރޭޝަނުގެ ތެރެއިން ހޯޑެއްދޫން ތިން މީހަކު ހައްޔަރުކުރީ މިދިޔަ ހަފުތާގެ އަންގާރަ ދުވަހުގައެވެ.
އޭގެތެރެއިން ދެ މީހެއްގެ ބަންދަށް ފުރަތަމަ ޖެހީ 07 ދުވަހެވެ.
ފުލުހުން ބުނީ އެ މުއްދަތު ހަމަވުމުން ގދ.ތިނަދޫ މެޖިސްޓްރޭޓް ކޯޓުން އެ މީހުންގެ ބަންދަށް 10 ދުވަސް އިތުރުކޮށްފައިވާ ކަމަށެވެ.
އެނގިފައިވާ ގޮތުގައި މި އޮޕަރޭޝަނުގައި ހޯޑެއްދޫ ވަލުތެރޭގައި ވަޅުލާފައި ހުއްޓާ 15 ކިލޯގެ މަސްތުވާތަކެތި ވަނީ ހޯދައިފައެވެ. އެ ތަކެއްޗަކީ ހައްޔަރުކުރި މީހުންގެތެރެއިން މީހަކު ފޮރުވާފައި ހުރި ތަކެއްޗެވެ.
މި އޮޕަރޭޝަނުގައި މިދިޔަ ހަފުތާގެ އަންގާރަ ދުވަހު ތިން މީހުން ހައްޔަރުކުރިއިރު, އޭގެތެރެއިން އެކަކު ފުލުހުންގެ ބެލުމުގެ ދަށުގައި ހުއްޓާ ވަނީ ނިޔާވެފައެވެ.
