ދިހަ މީހުން މަރުވި އަލިފާނުގެ ހާދިސާއަށް ދުނިޔޭގެ ސަމާލުކަން!
ރޭ ދަންވަރު ވެރިރަށް މާލޭގައި ހިނގި ނުރައްކާތެރި އަލިފާނުގެ ހާދިސާ ބައިނަލްއަޤްވާމީ ނޫސްތަކުން ކަވަރު ކޮށްފިއެވެ.
މިގޮތުން، އޭއެފްޕީ، ރޮއިޓަރސް، އަލް ޖަޒީރާ، ދަ ހިންދޫ، ދަ އިންޑިއަން އެކްސްޕްރެސް ފަދަ ނޫސްތަކުންވެސް، ރޭގެ ހާދިސާ، ނުރައްކާތެރި ހާދިސާއެއްގެ ގޮތުގައި ވަނީ ސިފަކޮށްފައެވެ.
ގިނަ ނޫސްތަކުން ވަނީ 10 މީހުން މަރުވެގެން ދިޔަ މި ހާދިސާގައި، އިންޑިއާއަށް ނިސްބަތްވާ 8 މީހުން މަރުވިކަންވެސް ފާހަގަކޮށްފައެވެ. މި ހާދިސާގައި ދެން މަރުވީ ބަންގްލަދޭޝް މީހެކެެވެ. 10 ވަނަ މީހާ އަކީ ކާކުކަން ދެނެގަނެވިފައިވާއިރު، ވަރަށް ހާލު ދެރަ އެކަކަށް އައިޖީއެމްއެޗުގައި، ވެންޓިލޭޓަރުގައި ދަނީ ފަރުވާ ދެމުންނެވެ.
މި ނުރައްކާތެރި އަލިފާނުގެ ހާދިސާ ހިނގީ މ.ނިރުފެހިގޭގެ ގަރާޖެއްގައެވެ. އެ ގެއަކީ ބިދޭސީންގެ ލޭބަރ ކުއާޓަރެއްވެސް ހުރި ގެއެކެވެ. އެގޭގައި ވެހިކަލް މަރާމާތު ކުރާ ގަރާޖު ހިންގަމުން ދިޔައީ، މާލެ ސިޓީ ކައުންސިލުގެ ހުއްދައެއްވެސް ނެތިއެވެ.
އަލިފާނުގެ ހާދިސާގައި ހާލުގައި ޖެހުނު މީހުންނަށް އެހީވުމުގެ ގޮތުން 90،000 ރުފިޔާއަށް ވުރެ ގިނައިން މިހައިތަނަށް ޚަރަދުކޮށްފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީން (އެންޑީއެމްއޭ) އިން ވިދާޅުވެއެވެ.
