"ދެން"ގެ ކުރިއެރުމާއެކު ގިނަ ބަދަލުތަކެއް ، ސީއީއޯއަކަށް އަރީޙް

ކުރު މުއްދަތެއްގެ ތެރޭގައި މި ނޫހުން ހޯދި ކުރިއެރުމާއެކު ގިނަ ބަދަލުތަކެއް ނޫހަށާއި ނޫހުގެ ހިންގުމަށް ގެނެސްފިއެވެ.

Ads by STELCO

މިއަހަރުގެ ޖެނުއަރީ 15 ގައި ފެށި މިނޫހަކީ މިހާރު ރާއްޖޭގައި ހަވަނައަށް އެންމެ މަޤުބޫލު ނޫހެވެ. ވެބްސައިޓްތައް ރޭންކް ކުރާ ސައިޓެއްކަމަށްވާ ސިމިލާރވެބްސް ރެކޯޑްސްތައް ދައްކާގޮތުގައި އެންމެ ތިން މަސް ތެރޭގައި ''ދެން''ވަނީ ހަވަނަ މަޤާމު ހޯދާފައެވެ. އަދި މިހާތަނަށް ވެސް ނޫހުން ދަނީ އެމަޤާމު ދަމަހައްޓަމުންނެވެ.

''ދެން''އަށް ލިބެމުންދާ ކުރިއެރުމާއެކު ނޫހުން ވަނީ ކިޔުންތެރިންނަށާއި ލިޔުންތެރިންނަށް ރައްޓެހި، ފަސޭހަ ގޮތަކަށް ލޭއައުޓް ބަދަލުކޮށްފައެވެ. މީގެ އިތުރުން ނޫހުގެ ހިންގުމަށް ވަނީ ގިނަ ބަދަލުތަކެއް ހަމަޖައްސާ ، ނޫހުގެ ސީއީއޯއަށް މީހަކު ހަމަޖައްސާފައެވެ.

''ދެން''ގެ ފުރަތަމަ ސީއީއޯއަކަށް ހަމަޖައްސާފައިވަނީ ޒުވާން ނަމަވެސް ނޫސްވެރިކަމުގައި ގިނަ މަސައްކަތެއްކޮށް ތަޖުރިބާތަކެއް ހޯދާފައިވާ މީހެއް ކަމަށްވާ މުޙައްމަދު އަރީޙެވެ. މިއަހަރުގެ މާރިޗްގައި ''ދެން'' އާއި ގުޅުނު އަރީޙް ވަނީ ''ދެން''ގެ ކާމިޔާބީގައި ގިނަ މަސައްކަތްތަކެއް ކޮށްފައެވެ. އޭނާ ވަނީ މީގެ ކުރިން ''ވަގުތު"ގެ އެސިސްޓެންޓް އެޑިޓަރއެއްގެ މަޤާމުގެ އިތުރުން އެސިސްޓެންޓް މާކެޓިން އެގްޒެކްޓިވްގެ މަޤާމުގައި ވެސް މަސައްކަތް ކޮށްފައެވެ.

ކޮވިޑް19 އާއި ގުޅިގެން ކުދި އަދި މެދު ވިޔަފާރިތަކަށް ލިބެމުންދާ ގެއްލުމުގާއި ގުޅިގެން އެފަރާތްތަކަށް އެހީތެރިވުމުގެ ގޮތުން ''ދެން'' އިން ދަނީ ޚާއްޞަ އަގުތަކެއްގައި މާކެޓިން ފުރުސަތުތަކެއް އެފަރާތްތަކަށް ހުޅުވާލުމަށް ތައްޔާރު ވަމުންނެވެ.