ޝަރީފާ ދެކޮޅަށް ނަޝީދު ހުށަހެޅުއްވި މައްސަލަ ސިވިލް ކޯޓުން ބަލައިގެންފި

މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ) އާ ދެކޮޅަށް ރައްޔިތުން މަޖިލީހުގެ ރައީސް މުޙައްމަދު ނަޝީދުގެ ފަރާތުން ސިވިލް ކޯޓަށް ހުށަހެޅުއްވި މައްސަލަ އެ ކޯޓުން ބަލައިގެންފިއެވެ.

Ads by STELCO

ރައީސް ނަޝީދު ގަތުލުޢާންމެއް ހިންގަން އުޅުއްވި ކަމަށް ވިދާޅުވެ ޝަރީފް ދެއްކެވި ވާހަކަތަކާ ގުޅިގެން ނަޝީދުގެ ފަރާތުން ސިވިލްކޯޓަށް މައްސަލައެއް ހުށަހެޅުއްވީ މިދިޔަ މަހުގެ 28 ވަނަ ދުވަހުއެވެ.

އެއީ ކުރީގެ ރައީސް މައުމޫން ޢަބްދުލްޤައްޔޫމުގެ ދައުރުގައި އޭރު އެމްޑީޕީން އިދިކޮޅު ހަރަކާތްތައް ހިންގިއިރު ރައީސް ނަޝީދު އިސްވެ ހުންނަވައި ބޮމެއް ގޮއްވާލައިގެން މަދުވެގެން ފަންސާހަކަށް މީހުން މަރާލައި އެކަމުގެ އިލްޒާމު މައުމޫނުގެ އިސްތަށިފުޅުގައި އެޅުއްވުމަށް މަސައްކަތް ކުރެއްވި ކަމަށް ޝަރީފް ވިދާޅުވުމުންނެވެ.

އެ ގޮތުން ނަޝީދުގެ ފަރާތުން ކޯޓަށް ހުށަހެޅުއްވި މައްސަލައިގައި އެދިވަޑައިގެންފައިވަނީ އެ މަނިކުފާނުގެ އަބުރާ ބެހުމުގެ އަމަލެއް ޝަރީފް ހިންގަވާފައިވާ ކަމަށް ކަނޑައަޅައިި ދެއްވުމަށާއި ބަދަލެއްގެ ގޮތުން 10 މިލިއަން ރުފިޔާ ނަގައިދިނުމަށެވެ.