އެމްޑީޕީ ޕްރައިމަރީގައި ވާދަކުރަން މި ޖެެހެނީ "އިނބިލީހުގެ ގޭންގަކާ": ބޮންޑެ
ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ވާދަކުރައްވަން ޖެހިވަޑައިގަތީ އިނބިލީހުގެ ގޭންގަކާ ކަމަށް މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑެ) ވިދާޅުވެއްޖެއެވެ.
2023 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ޓިކެޓްގައި ވާދަކުރައްވާނެ ކެންޑިޑޭޓަކު ހޮވުމަށް ބާއްވާ ރިޔާސީ ޕްރައިމަރީގައި ވާދަކުރައްވާނެކަމަށް ޕާޓީގެ ރައީސް ނަޝީދު އިއްޔެ އިއުލާނުކުރައްވާފައިވާއިރު މީގެކުރިން ވާދަކުރައްވާނެކަން އިއުލާނުކުރެއްވި ރައީސް އިބްރާހިމް މުޙައްމަދު ޞާލިޙްގެ ފެކްޝަނުން އަންނަނީ ކެމްޕޭނު ފެށުމަށް ތައްޔާރުވަމުންނެވެ.
ޕްރައިމަރީގައި ނަޝީދަށް ވޯޓު ދޭނެހެން ހީވާ މެންބަރުން ޕާޓީގެ ދަފްތަރުން އުނިކުރާކަމުގެ ޝަކުވާތައް ގިނަވެފައިވާއިރު އެ އިންތިޚާބު އިންސާފުވެރިވެދާނެތޯ ޕާޓީގެ ބައެއް މެންބަރުން އަންނަނީ ސުވާލު އުފައްދަމުންނެވެ.
އެކަންކަމަށް އަލިއަޅުވައިލައްވައި ކުލަބު ހައުސްގައި ވާހަކަދައްކަވަމުން ބޮންޑެ ވިދާޅުވީ މިހާރު މަކަރާއި ހީލަތެއް ނުހަދާ ކަމަށާއި ކުރާ ކަމެއް ކުރަނީ ފާޅުގައި ކަމަށެވެ.
މިހާރު މީ މަކަރާ ހީލަތެއް ނޫން. މީ ފާޅުގަ ބަލަން ތިއްބާ ވޯޓު ފޮށްޓަށް އަޅައިލާފަ މި ބުނަނީ ދެން އެހެން މީހުން އަންގާނަމޭ ބުނީމާ ކަލޭމެންދާށޭ ކޯޓަށް. ކޯޓުން ނިންމާށޭ ކަލޭމެން. ކޯޓުން ނިންމި ގޮތެކޭ އަހަރުމެން މިއޮތީ ފޮށި އަޅާލާފައޭ އެއްކޮށް. އިންތިޚާބުތައް ކުރިއަށްދާ ގޮތާ ބެހޭގޮތުން ބޮންޑެ ވިދާޅުވިއެވެ.
ބޮންޑެ އިތުރަށް ވިދާޅުވީ ރައްޔިތުން މަޖިލީހުގެ މިނިވަން މުއައްސަސާތަކާބެހޭ ކޮމިޓީގެ މުގައްރިރަކަށް އިންނެވީ ރޮޒައިނާ ކަމަށާއި އިލެކްޝަން ކޮމިޝަން ވެސް އޮތީ އޭނާގެ ބާރުގެ ދަށުގައި ކަމަށެވެ.
ބޭނުމިއްޔާ އެ މީހުން ގެނެސް އަނެއްކާ ވަކިކުރަންވީ. ބިރުދައްކަންވީ. އެހެންވީމަ އެ ހާލަތުގައި އޮތް ޤައުމެއްގައި ރައްޔިތުން އެދެނީ ރަނގަޅު ލީޑާޝިޕެއް... ރައީސް ނަޝީދު ފަދަ ބޭފުޅެއް.
ބޮންޑެ ވިދާޅުވީ ހަޔަާތުގައި ވެސް ރައީސް ނަޝީދަށް އަދި އިންސާފުވެރި އިންތިޚާބެއް ލިބިވަޑައިނުގަންނަވާ ކަމަށެވެ. އަދި މިހާރު ވާދަކުރައްވަން ޖެހިވަޑައިގެންފައިވަނީ އިނބިލީހުގެ ގޭންގަކާ ކަމަށް ވެސް ބޮންޑެ ވިދާޅުވިއެވެ.
