20 ކައުންސިލަރުން ތަމްރީންވާން އިންޑިއާއަށް!

އިންޑިއާގެ ހައިދަރުއާބާދުގައި ހުންނަ ނެޝަނަލް އިންސްޓްޓިއުޓް އޮފް ރޫރަލް ޑިވެލޮޕްމެންޓް އެންޑް ޕަންޗަޔާތީ ރާޖް (އެން.އައި.އާރް.ޑީ.ޕީ.އާރް) އަށް 18-31 ޑިސެމްބަރަށް ހިންގާ ތަމްރީން ޕްރޮގްރާމްއަށް ފޮނުވާ ދިވެހިރާއްޖޭގެ ލޯކަލް ގަވަރމަންޓް އޮފިޝަލުންގެ ފުރަތަމަ ބެޗް އިންޑިއާއަށް ފުރައިފިއެވެ.

Ads by STELCO

20 އޮފިޝަލުންގެ ފުރަތަމަ ބެޗްގައި، އަތޮޅު ކައުންކައުންސިލް އަދި ލޯކަލް ގަވަރމަންޓް އޮތޯރިޓީގެ މުއައްޒިފުން ހިމެނެއެވެ.

އެ ފަރާތްތަކުން ބައިވެރިވާނީ އިންޑިއާގެ ހައިދަރުއާބާދުގައި ހުންނަ ނެޝަނަލް އިންސްޓްޓިއުޓް އޮފް ރޫރަލް ޑިވެލޮޕްމެންޓް އެންޑް ޕަންޗަޔާތީ ރާޖް (އެން.އައި.އާރް.ޑީ.ޕީ.އާރް)އިން ހިންގާ ޤާބިލްކަން އިތުރު ކުރުމަށް ޙާއްސަ ކުރެވިފައިވާ ތަމްރީން ޕްރޮގްރާމެއްގައެވެ.

ދިވެހިރާއްޖޭގެ ލޯކަލް ގަވަރމަންޓް އޮތޯރިޓީއާއި އިންޑިއާގެ މިނިސްޓްރީ އޮފް ރޫރަލް ޑިވެލޮޕްމެންޓް (އެމް.އޯ.އާރް.ޑީ) ގެ ދަށުން ހިންގާ ތަމްރީން މަރްކަޒެއްކަމުގައިވާ އެން.އައި.އާރް.ޑީ.ޕީ.އާރް ދެމެދު ސޮއިކުރެވިފައިވާ އެމް.އޯ.ޔޫގެ ދަށުން ދެ ވޭ ތަމްރީނެވެ.

އޮގަސްޓް 2022 ވަނަ އަހަރު ރަޢީސުލްޖުމްޙޫރިއްޔާ އިބްރާޙީމް މުޙައްމަދު ސޯލިޚް އިންޑިއާއަށްކުރެއްވި ރަސްމީ ދަތުރުފުޅުގެ ތެރެއިން ސޮއިކުރެވުނު މި އެމް.އޯ.ޔޫ އަމާޒުކުރެވިފައިވަނީ ލޯކަލް ކައުންސިލް  (ރަށު އަދި އަތޮޅު ކައުންސިލް) މެންބަރުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއު.ޑީ.ސީ) މެންބަރުން އަދި އެލް.ޖީ.އޭގެ މުއައްޒިފުންގެ ޤާބިލްކަން އިތުރުކުރުމާއި ތަމްރީންދިނުމުގެ މައްޗަށެވެ.

އިންޑިއާގައި ބޭއްވޭ މި ތަމްރީންތައް ފަރުމާކުރެވިފައިވަނީ އެލްޖީއޭއިން ހުށަހަޅާފައިވާ ކަންތައްތަކުގެ މައްޗަށް ބިނާކޮށެވެ. އެގޮތުން މި ތަމްރީންތައް ފަރުމާކުރުމަށް އެލްޖީއޭ އާއި އެން.އައި.އާރް.ޑީ.ޕީ.އާރް އާއި ދެމެދުވަނީ މިއަހަރު ސެޕްޓެމްބަރު އަދި އޮކްޓޫބަރު މަހުގެ ތެރޭގައި ވަރޗުއަލްކޮށް އަދި ފިޒިކަލް ބައްދަލުވުންތަކެއް ބާއްވާފައިއެވެ. މިގޮތުން އޮކްޓޫބަރު 2022ގައި 3 ބޭފުޅުންގެ ވަފުދެއްވަނީ މި ތަމްރީންތަކަށް މަޢުލޫމާތު ހޯދުމަށް ރާއްޖެ ޒިޔާރަތްކޮށް އެލްޖީއޭ، މޯލްޑިވްސް އިންސްޓްޓިއުޓް އޮފް ލޯކަލް ގަވަރނަންސް، ވ. ފެލިދޫ އަތޮޅު އަދި ކ.ގުރައިދޫ ކައުންސިލް އަދި ޑަބްލިއު.ޑީ.ސީގެ މެންބަރުންނާއި ބައްދަލުކުރައްވާފައިއެވެ. ކޯސް ބިނާކުރެވިފައިވަނީ ލެކްޗަރ އަދި މަޝްވަރާތަކުގެ މައްޗަށެވެ. އަދި އިންތިޒާމްކުރެވިފައިވަނީ ދާއިރާގެ ޙިދްމަތްތެރިންނާއި ފަންނުވެރިންގެ ދެމެދުގައި ލޯކަލް ގަވަރނަންސް އަދި ލާމަރުކަޒީ ނިޒާމުގެ މަޢުލޫމާތާއި ތަޖްރިބާ ޙިއްސާކުރުމުގެ ފުރުސަތު ފަހިކޮށްދޭނެގޮތަށެވެ.

މި އެމް.އޯ.ޔޫގެ ދަށުން އިތުރު ބެޗްތައް ތަމްރީންކުރުމަށް އެން.އައި.އާރް.ޑީ.ޕީ.އާރް އަށް ކުރިއަށްއޮތްތަނުގައި ފޮނުވޭނެއެވެ. އެކަމުގެ ސަބަބުން ރާއްޖޭގެ ލާމަރުކަޒީ ސިޔާސަތުގެ ދަށުން ލޯކަލް ގަވަރނަންސް ހަރުދަނާކުރުމަށް ކުރާ މަސައްކަތައް ބާރުލިބިގެންދާނެއެވެ. އޭގެ އިތުރުންވެސް މި ތަމްރީންތައް ވެގެންދާނީ، އިންޑިއާގެ ނިއު ދިއްލީގެ ނެޝަނަލް ސެންޓަރ ފޮ ގުޑް ގަވަރނަންސް (އެން.ސީ.ޖީ.ޖީ) އާއި ސިވިލް ސަރވިސް ކޮމިޝަން އާއި ދެމެދު ސޮއިކުރެވިފައިވާ އެމް.އޯ.ޔޫގެ ދަށުން މިހާރުވެސް ހިންގެމުންދާ އަދި އޭގެ ސަބަބުން މިހާތަނަށް ރަށްރަށާއި އަތޮޅުތަކުގެ އިދާރާތަކުގެ 580 އަށް ވުރެ ގިނަ ސަރުކާރު މުއައްޒަފުންނަށް ފައިދާކޮށްފައިވާ، ތަމްރީންތަކަށް ލިބޭ ކުރިއެރުމެއްކަމުގައިއެވެ.