ޕާޓީގެ ދަފްތަރު ވަނީ ގަޑުބަޑުކޮށްފައި، ޕްރައިމަރީ އިންސާފުވެރި ނުވާނެ: ރައީސް ނަޝީދު
މޯލްޑިވިއަން ޑިމޮކްރަތީކް ޕާޓީ، އެމްޑީޕީގެ މެމްބަރުންގެ ދަފުތަރު ގަޑުބަޑު ކޮށްފައިވާ ކަމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވެފައިވަނީ، 2023 ގެ ރިޔާސީ އިންތިހާބުގައި އެމްޑީޕީގެ ޓިކެޓުގައި ވާދަ ކުރާނެ ކެނޑިޑޭޓަކު ހޮވުމަށް އެތެރޭގެ އިންތިހާބެއް ބޭއްވުމުގެ ތައްޔާރީތައް ފަށާފައިވަނިކޮށެވެ.
ރައީސް ނަޝީދުގެ މިއަދު އެމްޑީޕީގެ ޗެއަރޕާސަން ފައްޔާޒް އިސްމާއީލަށް ފޮނުއްވި ސިޓީއެއް މިއަދު ވަނީ ޓްވީޓް ކުރައްވާފައެވެ. އެ ސިޓީގައި ރައީސް ނަޝީދު ވިދާޅުވީ، ޕާޓީއިން ސާޅީހާސް މީހުން، އެ މީހުންނަށް އެނގުމަކާ ނުލާ ކުއްލިއަކަށް ވަކިކޮށްފައިވާ ކަމަށެވެ.
"އެކަން އެހެން އޮއްވައި ޕްރައިމެރީ ކުރިޔަށް ގެންދެވުމުން އެ ޕްރައިމެރީއަކީ މިނިވަން އަދި އިންސާފުވެރި އިންތިހާބަކަށް ވާނޭކަމަކަށް އަޅުގަނޑު ޤަބޫލެއްނުކުރަމެވެ." ރައީސް ނަޝީދުގެ ސިޓީގައި ވިދާޅުވިއެވެ.
އަންނަ މަހުގެ 28 ބައި ބޭއްވުމަށް ހަމަޖެހިފައިވާ އެމްޑީޕީގެ، ރިޔާސީ ޕްރައިމެރީގައި ރައީސް ނަޝީދާއެކު ވާދަ ކުރައްވަނީ ރައީސް އިބްރާހީމް މުޙައްމަދު ޞާލިޙެވެ.
ރައީސް ނަޝީދުގެ ސިޓީފުޅުގައި އިތުރަށް ވިދާޅުވީ، ރިޔާސީ ޕްރައިމަރީގައި ވޯޓުލާއިރު، އެމްޑީޕީގެ ވޯޓުލާ ދަފުތަރުގެ ގޮތުގައި މިހާތަނަށް ބަލަމުން އައި ދަފުތަރުގައި ހިމެނޭ މެންބަރުންގެ ވޯޓުލުމުގެ ހައްޤު ނުގެއްލޭނެކަން ކަށަވަރު ކޮށްދިނުމަށް އެދިވަޑައިގެންފައިވެއެވެ.
ޕާޓީއަށް ހިތުން ރުހުމުން ގުޅިފައިވާ މެންބަރުންގެ ތެރެއިން 40 އިންސައްތަ މެންބަރުންގެ ހައްޤާއި ބައިވެރިވުން ގެއްލުވާލައި ޕްރައިމަރީ ބާއްވައިފިނަމަ 2023 ގެ ރިޔާސީ އިންތިހާބުގައި ޕާޓީއަށް އިންތިހާއަށް ނޭދޭވޭ އަސަރުކުރާނެ ކަމަށް ވެސް ރައީސް ނަޝީދު ވިދާޅުވިއެވެ.
Ads by STO
