ރައީސް ނަޝީދުގެ ކެމްޕެއިން ފެށީ ފިތުނައިން: ނިިހާދު
ރައްޔިތުންގެ މަޖިލީހުގެ ރައީސް، ރަައީސް މުހައްމަދު ނަޝީދު އެމްޑީޕީގެ ރިޔާސީ ޕްރައިމެރީ ކެމްޕެއިން ފެއްޓެވީ ފިތުނައިން ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
ނިހާދު ކުރެއްވި ޓްވީޓެއްގައި ވިދާޅުވީ ރައީސް ޞާލިޙްގެ އެދުމަކީ އެމްޑީޕީގެ އެތެރޭގެ އިންތިހާބު ސުލްހަވެރި، ރީތި ކެމްޕެއިނަކުން ނިންމާލުން ކަމަށެވެ. އަދި އިދިކޮޅު ކެނޑިޑޭޓުގެ ޓީމުން މަސައްކަތް ކުރަނީ ފިތުނަ އުފެއްދުމަށް ކަމަށާއި އޭގައި ނުޖެހި ރީތި ގޮތުގައި އިންތިހާބު ކުރިޔަށް ގެންދިޔުމަށް ނިހާދު ވަނީ އެދިފައެވެ.
ނިހާދު މިފަދައިން ވިދާޅުވެފައިވާއިރު ރައީސް ނަޝީދަށް ތާއީދު ފޯމް ހޯދުމުގެ މަސައްކަތް މިއަދު ހަވީރު ވަނީ ފަށައިފައެވެ.
ނަޝީދަށް ތާއީދު ފޯމް ހޯދުމުގެ މަސައްކަތުގައި އިސްކޮށް އުޅުއްވަނީ ރައްޔިތުންގެ މަޖިލީހުގެ ނައިބް ރައީސް އީވާ އަބްދުﷲ އާއި އެމަނިކުފާނަށް ތާއީދު ކުރައްވާ މަޖިލީހުގެ މެމްބަރުންނެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން ނަޝީދު އިއުލާންކުރައްވާފައިވާއިރު ރައީސް އިބްރާހިމް މުހައްމަދު ސޯލިހް ވެސް މީގެކުރިން ވަނީ ދެވަނަ ދައުރަކަށް ތައްޔާރަށް ހުންނެވިކަން ހާމަކުރައްވާފައެވެ.
