އިބްރޭގެ ސުވާލެއް ހަސަންއަށް: ފިންގާޕްރިންޓް ނުޖަހާ ޕާޓީއަށް މެންބަރުން ވެއްދީ ކީއްކުރަން؟
އެމްޑީޕީ އިން ފިންގަޕްރިންޓް ނެތިގެން ވަކިކުރި މީހުން އަލުން ޕާޓީއަށް ވަންނަން ފިންގަޕްރިންޓް ޖަހަން ޖެހޭނެ ކަމަށް ގަބޫލު ނުކުރާ ކަމަށް ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވި ކަމަށާއި އެއީ ކީއްވެގެންތޯ އެމްޑީޕީގެ ޗެއަރޕާސަންގެ ނައިބު އިބްރާޙިމް ވަހީދު (އިބްރޭ) ސުވާލު އުފައްދަވައިފިއެވެ.
އިނގިލީގެ ނިޝާން ނެތް މެންބަރުން ޕާޓީތަކުގެ ދަފުތަރުން 2016 ވަނަ އަހަރު އޮކްޓޯބަރު މަހު އުނި އިލެކްޝަން ކޮމިޝަނުން ވަނީ އުނިކޮށްފައެވެ. އެއީ ސިޔާސީ ޕާޓީތަކުގެ ގާނޫނަށް ގެނައި އިސްލާހާ ގުޅިގެން ކުރެވުނު ކަމަށެވެ. އޭރު އިނގިލީގެ ނިޝާން ނެތް މެންބަރުންގެ ލިސްޓު ވެސް ކޮމިޝަނުން ޕާޓީތަކަށް ފޮނުވާ، އިނގިލީގެ ނިޝާން ނެތް މެންބަރުންގެ އިނގިލީގެ ނިޝާން ހޯދުމަށް އެއް މަސް ދުވަހުގެ މުއްދަތެއް ވަނީ އީސީން ދީފައެވެ. އެމްޑީޕީން އޭރު ފިންގާޕްރިންޓް ހޯދުމަށް ހަރަކާތެއް ވަނީ ހިންގާފައެވެ.
އިބްރޭ މި ސުވާލު ކުރިމަތި ކުރައްވާފައިވަނީ އެމްޑީޕީގެ ދަފްތަރުގައި މައްސަލަތަކެއް ހުރި ކަމަށް އެމްޑީޕީ ޕްރައިމަރީގައި ވާދަ ކުރައްވާ، މަޖިލީހުގެ ރައީސް، މުޙައްމަދު ނަޝީދު ވިދާޅުވެ، ކަންބޮޑުވުން ފާޅު ކުރައްވާފައިވާ ދަނޑިވަޅެއްގައެވެ. ރައީސް ނަޝީދަށް ތާއީދު ކުރައްވާ ބޭފުޅުން ވިދާޅުވަމުުން ގެންދަނީ ދަފްތަރުން ބަޔަކު އުނިކޮށްފައިވާ ކަމަށާއި އެކަން ކުރީ ރައީސް ނަޝީދަށް އިންތިޚާބުގައި ވޯޓް މަދު ކުރުމަށް ކަމަށެވެ. އަދި އެމްޑީޕީގެ ދުވަސްވީ ގިނަ ބަޔަކު ވަކިކޮށްފައިވާ ކަމަށް ނަޝީދުގެ ޓީމުން ތުހުމަތު ކުރެއެވެ.
އެމްޑީޕީގެ ދަފްތަރު ބެލެހެއްޓުމާ ހަވާލުވެ ވަޑައިގެން ހުންނެވި، ޑެޕިއުޓީ ސީޕީ އިބްރޭ މީގެ ކުރިން ވަނީ އެ ޕާޓީގެ ދަފްތަރުން ވަކި ކުރި ފަރާތްތަކުގެ ތަފްސީލް ވިދާޅުވެދެއްވާފައެވެ. މިގޮތުން އެހެން ޕާޓީތަކުގެ މެންބަރުންނާއި މަރުވެފައި ތިބި ބައެއް ފަރާތްތަކާއި، އެހެން ޕާޓީތަކުގެ ޓިކެޓްގައި އިންތިޚާބުވެފައިވާ ކައުންސިލަރުން ވެސް އެމްޑީޕީގެ ދަފްތަރުގައި ހުންނެވި ކަމަށް ވިދާޅުވިއެވެ.
އިބްރޭ މިއަދު ކުރެއްވި ޓްވީޓްގައި އެމްޑީޕީގެ ޗެއަރޕާސަންގެ ކަމުގައި މަޤާމުގައި ހުންނަވާ އެފަދަ ނިންމުމެއް ހަސަން ލަތީފް ނިންމެވީ ކީއްވެތޯ ވަނީ ސުވާލު އުފައްދަވާފައެވެ.
އިލެކްޝަނުގެ ދަފްތަރަށް އެމްޑީޕީން ބަލަން ފެށުމާއެކު، ފިންގާޕްރިންޓް ނެތް ފަރާތްތައް އެމްޑީޕީގެ ދަފްތަރުގައި ނުހިމެނޭނެއެވެ.
އިބްރޭ ވިދާޅުވީ އޭރު ޕާޓީގެ ޗެއަރޕާސަންގެ މަގާމުގައި ހުންނެވީ އިކޮނޮމިކް މިނިސްޓަރު ފައްޔާޒް އިސްމާއިލް ނޫން ކަމަށާއި އަދި ޕާޓީގެ މެމްބަރޝިޕް ބެލެހެއްޓީ އޭނާ ނޫން ކަމަށެވެ.
