ރޮޒައިނާގެ ހަމަލާއެއް އިންތިއަށް: ތިމާމެން ބޭނުންވާ ގޮތް ނޫން ގޮތަކީ އަބަދު ވެސް ގޯސް ގޮތްތޯ؟
އެމްޑީޕީގެ ރިޔާސީ ޕްރައިމަރީގެ ކޮމިޓީ ހޮވުމަށް ރޭ ބޭއްވި ޤައުމީ މަޖިލީހުގައި ކަން ހިނގައިދިޔަ ގޮތަށް މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި) ފާޑު ވިދާޅުވުމުން، އެމްޑީޕީގެ އަންހެނުންގެ ރޫހުގެ ރައީސް، އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ފާޑު ވިދާޅުވެއްޖެއެވެ.
ރޭ އޮތް އެމްޑީޕީގެ ޤައުމީ މަޖިލީހުގެ ޖަލްސާއިން ރައީސް ނަޝީދަށް ތާއީދު ކުރައްވާ މެންބަރުން ވަނީ ވޯކްއައުޓް ކުރައްވާފައެވެ. ނަޝީދުގެ ފެކްޝަނުން ބޭނުންވީ، ނަޝީދު ބޭނުންވާ ދެ ކެނޑިޑޭޓުންނާއި ރައީސް ބޭނުންވާ ދެ ކެނޑިޑޭޓުނާއި ދެ ފަރާތަށް ފެންނަ އެއް މެންބަރަކު ކޮމިޓީއަށް އައްޔަން ކުރުމެވެ.
ނަމަވެސް ރިޔާސަތުގައި އިންނެވި އިކޮނޮމިކް މިނިސްޓަރ ފައްޔާޒް އިސްމާއީލް އެކަމަށް ތާއީދެއް ނުކުރެއްވިއެވެ. އަދި ވިދާޅުވީ 5 މެންބަރުންގެ ނަން ހުށަހެޅުމަށެވެ. ނަޝީދުގެ ފެކްޝަނުން ތިން ނަމެއް ހުށަނޭޅުމުން ފައްޔާޒް ވިދާޅުވީ އެ ނަންތަކަށް ވޯޓަށް ނޭހޭނެ ކަމަށެވެ.
ރައީސް ނަޝީދުގެ ފެކްޝަނުން ބޭނުންފުޅުވި ގޮތަށް ނަން ހުށަހެޅުމަށް ފުރުސަތު ލިބިވަޑައިނުގަތުމުން، އެ ފެކްޝަނުގެ މެންބަރުން ވަނީ ވޯޓްގައި ބައިވެރިނުވާން ނިންމާފައެވެ. އަދި ޖަލްސާ ދޫކޮށް ވަނީ ވަޑައިގެންފައެވެ.
އެކަން ހިއްސާ ކުރައްވަމުން މިއަދު އިންތި ކުރެއްވި ޓްވީޓެއްގައި ވިދާޅުވީ، އިންތިޚާބީ ކޮމެޓީ އެކުލަވާލުމުގައި ދެ ކެންޑިޓޭޓުންނަށް ހަމަހަމަކޮށްލުން ފަދަ އެންމެ ކުޑަ މިންވަރު ދިނުމަށް ވެސް ކުރީ އިންކާރު ކަމަށެވެ.
އެކަމަށް ރައްދު ދެއްވަމުން ރޮޒައިނާ ވިދާޅުވީ، ހުށަހެޅުމަކާއެމެދު މެދު ޤައުމީ މަޖިލީހގެ މެޖޯރިޓީ މީހުންގެ އިތުބާރު ނެތްކަމަށްވާނަމަ އެނަމެއް ރިޖެކްޓް ކުރުމަކީ ޤައުމީމަޖިލީހުގެ މެންބަރުންގެ ހައްގެއް ކަމަށެވެ. އަދި އެ މީހާއަށް ޤައުމީ މަޖިލީހުގެ މެންބަރުން އިތުބާރު ނުކުރަނީ ކީއްވެތޯ ރަނގަޅަށް ވިސްނާލުމަކީ މުހިންމުކަމެއް ކަމަށް ވިދާޅުވެ ސުވާލު ކުރެއްވީ "ތިމާމެން ބޭނުންވާގޮތް ނޫން ގޮތްއެއީ އަބަދުވެސް ގޯސްގޮތްތޯ؟"އެެވެ.
Ads by STO
