މާލެތެރެ ސާފުކޮށް ބެހެއްޓުމަށް، ކުރަން ޖެހުނު ކޮންމެ ކަމެއްކުރާނަން: މޭޔަރު
މާލެ ތެރެ ސާފުތާހިރުކޮށް ބެހެއްޓުމަށް ކުރަން ޖެހުނު ކޮންމެ ކަމެއްވެސް ކުރާނެ ކަމަށް މާލޭގެ މޭޔަރު ޑރ.މުޙައްމަދު މުޢިއްޒު ވިދާޅުވެއްޖެއެވެ.
މީޑިއާތަކަށް ފޮނުއްވި މެސެޖެއްގައި މުޢިއްޒު ވިދާޅުވީ ވޭސްޓް މެނޭޖްމަންޓް ކޯޕަރޭޝަން (ވެމްކޯ)އާ ހަވާލުވެފައިވާ ޒިންމާގެ ދަށުން އެކުންފުންނިން އުކާލަންޖެހޭ ކުނީގެ ތެރެއިން، މިއަދު ހަވީރާ ހަމައަށް 22.75 ޓަނުގެ ކުނި އުކައިނުލާ ކަމަށެވެ.
މޭޔަރު ވިދާޅުވީ މި ހުރިހައި ކުންޏަކީވެސް، މާލޭގެ ގޭގެއިން ނެރެފައި ހުރި ކުނި ކަމަށާއި، އެ ކުުނިތައް އުކާލުމަށް ވެމްކޯއަށް ފައިސާ ދައްކާ ކަމަށެވެ.
މޭޔަރު ވަނީ ރޭގައިވެސް ވެމްކޯއިން ގޭގެއިން ގެންދަން ޖެހޭ ކުނި ނުގެންދާކަން ފާހަގަކުރައްވައިފައެވެ. އަދި އެ މަސައްކަތް ކުރުމަކީ އެކުންފުނީގެ ޒިންމާއެއް ކަމަށްވެސް ވިދާޅުވިއެވެ.
މާލެއާއި ވިލިމާލޭގެ މަގުތަކާއި ޕާކުތަކާއި އަދި މައިޒާންތަކުން ކުނި ނެގުމުގެ މަސައްކަތް މާލޭ ސިޓީ ކައުންސިލުން 24 ގަޑިއިރު ކުރިއަށް ގެންދަން ފަށައިފައިވާއިރު، ވެމްކޯއާއެކު ހެދި އެއްބަސްވުން، މިމަހުގެ 26 ވަނަ ދުވަހަށް ހަމަވީއިރު، ސިޓީ ކައުންސިލުން އެ ކުންފުންޏާއެކު ހެދި އެއްބަސްވުން އާ ކޮށްފައެއް ނުވެއެވެ.
ކައުންސިލުން އެއްބަސްވުން އާ ނުކުރަން ނިންމީ، ވެމްކޯގެ ހިދުމަތާމެދު އާއްމުންގެ ޝަކުވާ ބޮޑުވުމުން ކަމަށް މޭޔަރު މީގެ ކުރިން ވިދާޅުވިއެވެ.
ބުޅާ ނަޖިސް ފިޔާ ގުދަން ކައިރީގައި. ފިޔާ ބަސްތާތައް ހުންނަނީ ބިންމަތީ ބަހަށްޓާފައި