އަދުން ހުސެއިންގެ ރައްދެއް ނަޝީދަށް: މުޅި ކެބިނެޓް އިސްތިއުފާދޭފަދަ ރިއެކްޓެއް ރައީސް ޞާލިޙް ނުކުރައްވާނެ
ރައީސް އިބްރާޙީމް މުޙައްމަދު ޞާލިޙަކީ ރިއެކްޓް ނުކުރައްވާ ބޭފުޅެއް ކަމަށް މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވުމާއި ގުޅިގެން އެކަމަށް ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަދުން ހުސައިން) ރައްދު ދެއްވައިފިއެވެ.
އެމްޑީޕީގެ ޕްރައިމަރީގައި ވާދަ ކުރައްވާ ރައީސް ޞާލިޙް ބޭއްވި ހަރުގެ ޖަލްސާއެއްގައި ވާހަކަފުޅު ދައްކަވަމުން އަދުން ހުސެއިން ވަނީ ރައީސް ނަޝީދު ކެންޕެއިން ޖަލްސާއެއްގައި ދެއްކެވި ވާހަކަފުޅުތަކަށް ރައްދު ދެއްވާފައެވެ. ރައީސް ނަޝީދު ވަނީ ރައީސް ޞާލިޙަކީ ރިއެކްޓް ނުކުރައްވާ ބޭފުޅެއް ކަަމަށާއި، ބޮޑެތި ކަންކަން ވެގެންދާއިރު ރިއެކްޓް ނުކުރައްވާ ހުރުމަކީ ޤަބޫލު ކުރެވޭނެ ކަމެއް ނޫން ކަމަށް ވިދާޅުވެފައެވެ.
"2012 ވަނަ އަހަރު ފެބްރުއަރީ 7ގައި ސަރުކާރު ވެއްޓިގެން ދިޔައިރުގައި ކޮބައިތޯ ރިއެކްޓްކޮށްފައި." ރައީސް ނަޝީދުގެ ވާހަކަފުޅަށް ރައްދު ދެއްވަމުން އަދުން ހުސެއިން ވިދާޅުވިއެވެ.
"ވެރިކަން ވެއްޓޭނެ ވާހަކަ ނޭނގި އޮންނާނެ ކަމަކަށް އަޅުގަނޑު ނުދެކެން. ކޮބާތޯ ރިއެކްޝަނެއް އައި ކަަމަކީ. އެހެންވީ އަޅުގަނޑު ދަންނަވާނީ މިހާރުގެ ރައީސް ކަންކަން ކުރައްވަނީ ރަނގަޅަށޭ. ރިއެކްޓް ކުރައްވާތަން ނުފެނިދާނެ. އަޅުގަނޑު އެއް ދުވަހު ނިދާ ހޭލި އިރުގައި ކެބިނެޓް އެއްކޮށް މުލިޔާ ގެއަށް ގެނެސް އިސްތިއުފާ ދޭން އަންގައިފި، އެކަހަލަ ރިއެކްޓެއް ނުކުރާނެ"
ހުސެއިންގެ ވާހަކަފުޅުގައި އިތުރަށް ވިދާޅުވީ، އެމްޑީޕީގެ ރިޔާސީ ޕްރައިމަރީގައި ރައީސް ނަޝީދަށް ކާމިޔާބު ލިބިވަޑައިނުގަންނަވާނެތީ، މިހާރު މަސައްކަތް ކުރައްވަނީ އެމްޑީޕީއަށް ވެރިކަން ނުލިބޭނެ ގޮތް ހެދުމަށް ކަމަށެވެ. އަދި އެކަން ކުރަނީ ޒާތީ ހަސަދައެއް ފިލުވާލަން ކަމަށް ވެސް ވިދާޅުވިއެވެ.
އެމްޑީޕީގެ ރިޔާސީ ޕްރައިމަރީ ބޭއްވުމަށް ނިންމާފައިވަނީ އަންނަ މަހު 28ގައެވެ. އިންތިޚާބުގެ ކެންޕެއިން ވަނީ ވަރަށް ފޯރީގައި ފަށާފައެވެ.
