ބަރުލަމާނީ ވޯޓް ނަގަން އެއްބަސްވި ގޮތް ނަޝީދު ވިދާޅުވެއްޖެ
ރާއްޖޭގެ ވެރިކަމުގެ ނިޒާމު ބަދަލުކުރަން ކޯލިޝަނާއެކު އެއްބަސްވެވުނު ގޮތް، ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެވެ.
ރައީސް ނަޝީދު އަބަދު ވެސް ގެންދަވަނީ ރާއްޖޭގެ ވެރިކަމުގެ ނިޒާމު ބަދަލު ކުރުމަށް ވަކާލާތު ކުރައްވަމުންނެވެ. އަދި ވެރިކަމުގެ ނިޒާމު ބަދަލު ވޯޓެއް ނަގަން މި ސަރުކާރުން އެއްބަސްވެފައިވާކަމަށް މީގެކުރިން ރައީސް ނަޝީދު ވިދާޅުވިއެވެ. ރައީސް ނަޝީދުގެ ވާހަކަފުޅަށް ރައްދު ދެއްވަމުން ވެރިކަމުގައި ހުންނެވި ރައީސް ޞާލިޙް ވަނީ، މިއަދު ވެރިކަމުގައި ހުންނެވީ ކޯލިޝަނާއެކުގައި ކަމަށާއި ނިޒާމީ ވޯޓަކަށް ދެވޭނީ ކޯލިޝަނުން އެއްބަސްވެގެން ކަމަށެވެ.
އެމްޑީޕީން ނިޒާމީ ވޯޓާމެދު ގެންގުޅޭ އުސޫލު، ރޭ ބޭއްވި ނޫސްވެރިންގެ ބައްދަލުވުމެއްގައި ރައީސް ނަޝީދު ވަނީ ވިދާޅުވެ ދެއްވާފައެވެ.
"އަޅުގަނޑުމެންގެ މެނިފެސްޓޯގައި ލިޔުނީ 18 މަސް ދުވަހުގެ ތެރޭގައި ވޯޓެއް ނެގުމަށް. ދެން އަޅުގަނޑުމެން އުކުޅަހުން ނިންމީ އެ މެނިފެސްޓޯ، އެހެންނަމަވެސް އަޅުގަނޑުމެން ނިންމީ ގުޅިފައިވާ ޕާޓީތަކާއި އެކީގައި، އެ ބޭފުޅުންނާ މަޝްވަރާކޮށްފައި ކަންކަން ކުރާނީ ކިހިނެތްތޯ. އެ މަޝްވަރާތަކުން އަދާލަތު ޕާޓީން ހުށަހެޅީ ފެންނަ ނުފެންނަ ވޯޓް އެންމެ ފަހު އަހަރު ނަގަން، 18 މަހެއް ނޫނޭ. އެމްއާރުއެމްއިން ބުނީ އަދާލަތުން ހުށަހެޅި ގޮތަށް އެއްބަހޭ. އެމްޑީޕީން ވެސް ބުނީ އަދާލަތުން ހުށަހަޅާފައިވާ ގޮތަށް އެއްބަހޭ. ޖުމްހޫރީ ޕާޓީން ބުނީ އެ މީހުން ވެސް އެއްބަހޭ" ރައީސް ނަޝީދު ވިދާޅުވީ، އެ ބައްދަލުވުންތަކުގެ ޔައުމިއްޔާތައް ވެސް ހުންނާނެ ކަމަށެވެ
ރައީސް ނަޝީދުގެ ވާހަކަފުޅުގައި އިތުރަށް ވިދާޅުވީ، އެމަނިކުފާނު ބޭނުންފުޅުވަނީ، ރާއްޖޭގެ ވެރިކަމުގެ ނިޒާމް ބަރުލަމާނީއަށް ބަދަލުކޮށް، ބޮޑުވަޒީރުކަން ކުރެއްވުމަށް ކަމަށެެވެ. އަދި ޕްރައިމަރީ ކާމިޔާބު ކުރުމަކީ އެކަމަށް އޮތް ހުރަހެއް ނޫން ކަމަށް ވިދާޅުވިއެވެ.
"ބަރުލަމާނީ މަޝްވަރާއަށް އަބަދު ވެސް ތައްޔާރު" ރައީސް ނަޝީދު ވިދާޅުވީ، ނިޒާމީ ވޯޓެއް ނަގަން ޖެހޭނީ މި ދައުރުގައި ކަމަށާއި ދައުރުގެ ބާކީ ނުވަ މަސް އެބައޮތް ކަމަށެވެ.
މިމަހު 28 ވަނަ ދުވަހު އޮންނަ ރިޔާސީ ޕްރައިމަރީއާއެކު، ރައީސް ނަޝީދާއި ރައީސް ޞާލިޙް ދަނީ ބަހުގެ ހަމަލާތައް ރައްދު ކުރައްވަމުންނެވެ. މި އިންތިޚާބުގެ ނަތީޖާއިން އެމްޑީޕީގެ ތާއީދު ބޮޑަށް އޮތީ ކޮންބޭފުޅަކަށްކަން ހާމަވެގެންދާނެއެވެ.
ނިޒާމީ ވޯޓެއް ނަގަން ޖެހޭނީ ނަސީދު ބޭނުންވީމައެއް ނޫން. މިގައުމަށް މިހާތަނަށް އައި ކުރި އެރުން އައީ ރިޔާސީ ނިޒާމުން 1968 ގެ ކުރިން ބަރުލަމާނީ ނިޒާމް އޮތްއިރު ރާއްޖެ ދިޔައީ ފަގީރު ވަމުން..މިހާރު ބަރުލަމާނީ ނިޒާމްގެނައުމުން ރާއްޖެއަށް އަންނާނެ އިތުރު ކުރި އެރުން ނަސީދު ބުނެދީބަލަ. .ރިޔާސީ ނިޒާމުގާ ނަސީދުގެ ވައްކަމުގެ ހުކުމްގެ ސަބަބުން ވެރިކަމަށް ނާދެވިދާނެ ކަމަށް ހީވާތީ މުޅި އުމުރުގަ ބޮޑުވަޒީރު ކަމުގަ ހުރުމަށް ރާވައިގެން ނިޒާމް ބަދަލެއް ނުކުރެވޭނެ.
ނިޒާމް ބަދަލުކުރާކަށް ބޭނުމެއް ނޫން މިގައުމަށް މޮޅުވާނީ ރިޔާސީނިޒާމެއް