އަނިޔާވެރި މަރަކުން މަރުވި އަންޖަލީގެ އާއިލާއަށް ޝާހްރުކްގެ އެންޖީއޯއިން އެހީތެރިވަނީ!
މިދިޔަ އަންގާރަ ދުވަހު އިންޑިޔާގެ ވެރިރަށް ދިއްލީގައި ސައިކަލުގައި ދުއްވާފައި ދަނިކޮށް ކާރަކާ އެކްސިޑެންޓްވެ ވެއްޓި ކާރުގެ ފުރޮޅު ދަށުގައި ތާށިވެފައިވަނިކޮށް އެތައް އިރެއްވަންދެންް ކާރު ދުއްވުމުގެ ސަބަބުން މަރުވި އަންޖަލީގެ އާއިލާއަށް ބޮލީވުޑްގެ "ކިންގް ހާން"، ޝާހްރުކްހާންގެ އެންޖީއޯއިން އެހީތެރިން ފޯރުކޮށްދީފިއެވެ.
ޝާހްރުކް ހާންގެ އެންޖީއޯ މީރު ފައުންޑޭޝަނުން އަންޖަލީގެ އާއިލާއަށް މާލީގެ އެހީތެރިކަން ވަނީ ފޯރުކޮށްދީފައެވެ. އިންޑިއާގެ ނޫސްތަކުން ރިޕޯޓްކޮށްފައިވާގޮތުގައި ޝާހްރުކްގެ އެންޖީއޯއިން އަންޖަލީގެ އެއްބަނޑު އެއްބަފާ ކުދިންނާއި އޭނާގެ ބަލި މަންމަގެ ބޭސްފަރުވާއަށް ބޭނުންވާ ފައިސާވެސް ވަނީ ފޯރުކޮށްދީފައެވެ. ވަޒީފާއަދާކޮށްގެން ލިބޭ ލާރިން މުޅި އާއިލާގެ ހުރިހާ ހަރަދެއް ބަލަހައްޓަމުން އައި އަންޖަލީގެ މަރާއެކު އާއިލާއަށް ވަނީ ބޮޑު ޝޮކެއް ލިބިފައިކަމަށް އާއިލާއިން ވަނީ ބުނެފައެވެ.
ކާރު ފުރޮޅު ތެރޭގައި އަންޖަލީގެ ހަށިގަނޑުގެ ކޮންމެވެސް ތަނެއް ތާށިވެފައި އޮތުމުން އަންޖަލީ ވެސް ބިންމަތީގައި ދެމެމުން ކާރާއެކު ދިޔަވަގުތު އޭނާ ވަރަށް ބާރަށް ހަޅޭއްލެވި ނަމަވެސް ހުއްޓުމެން ނެތި އޭނާގެ ހަށިގަނޑު ދަމަމުން އެކާރު 12 ކިލޯ މީޓަރަށް ދުއްވާފައިވާކަމަށް ރިޕޯޓްތައް ބުނެއެވެ. އަދި ކާރު ހުއްޓުވާފައިވަނީ މިމަންޒަރު ފެނުނު އާއްމުން މަގުމަތީ ޕޮލިހުންނަށް ރިޕޯޓް ކުރުމުން ޕޮލިހުން ކަމަށްވެސް ހަބަރުތައް ބުނެއެވެ. އެހެންނަމަވެސް އޭރު އަންޖަލީވަނީ މަރުވެފައިކަމަށާއި އޭނާގެ ގައިގަ އެންމެ ހަންކޮޅެއްވެސް ނެތްކަމަށް ހަބަރުތައް ބުނެއެވެ.
މިމައްސަލައިގައި ކާރުގައި ތިބި މީހުން މިހާރުވަނީ ހައްޔަރުކޮށް، މައްސަލަ ތަހުގީގު ކުރަންފަށާފައެވެ.
