އެމްޑީޕީގައި "ފިކުރެއްގެ ދިރުން" ނަމުގައި ގޮފިތައް ހަދަނީ، ރިޔާސީ އިންތިޚާބުގައި ނަޝީދު ތާއީދު ކުރައްވާ ކެނޑިޑޭޓް ކަނޑައެއްނާޅުއްވާ
ރިޔާސީ އިންތިޚާބުގައި އެމްޑީޕީގެ ރައީސް، ރައީސް މުޙައްމަދު ނަޝީދު ތާއީދު ކުރައްވާ ކެނޑިޑޭޓް ކަނޑަނާޅުއްވާ ކަމަށް އެމަނިކުފާނު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ، މިއަދު އެމަނިކުފާނު އެމްޑީޕީގެ ވަޓްސްއަޕް ގްރޫޕަކަށް ފޮނުއްވި މެސެޖެއްގައެވެ.
ރައީސް ނަޝީދު ވަނީ އެމްޑީޕީގެ ދަފްތަރުން އުނިކޮށްފައިވާ މީހުން އަލުން އެ ޕާޓީއަށް ވެއްދުމަށް އެމަނިކުފާނުގެ ސަޕޯޓަރުންނަށް ގޮވާލާފައެވެ. އަދި އެ 39ހާސް މީހުންގެ ބަހާއެކު ކުރިޔަށް ދިއުމަށް ވިސްނަވާ ކަމަށް ވިދާޅުވިއެވެ.
"އަޅުގަނޑު ހުށަހަޅަނީ "ފިކުރެއްގެ ދިރުން" ނަމުގައި އެމްޑީޕީގެ ގޮފިތައް ހުރިހާ ރަށެއްގައި ވެސް އަލުން ހަދާ، ކަނޑާލި 39ހާސްއަށްވުރެ ގިނަ މީހުން އަލުން އެމްޑީޕީއާ ގުޅި އެ މީހުންނާއެކު އަޅުގަނޑުމެންނަށް ފެންނަ ގޮތް ނިންމުމަށް." ރައީސް ނަޝީދު ވިދާޅުވިއެވެ.
ރައީސް ނަޝީދު އިތުރަށް ވިދާޅުވީ، ރިޔާސީ އިންތިޚާބު އެމްޑީޕީގެ ރިޔާސީ ކެނޑިޑޭޓް ރައީސް ޞާލިޙަށް ކާމިޔާބު ނުކުރެވޭނެ ކަމަށެވެ. އަދި އެމަނިކުފާނާއި އެމަނިކުފާނުގެ ސަޕޯޓަރުން ތާއީދު ކުރާ ރިޔާސީ ކެނޑިޑޭޓެއް ކަނޑައަޅާނީ ފަހުން ކަމަށް ވިދާޅުވިއެވެ. އެ ކެނޑިޑޭޓަކީ ރިޔާސީ އިންތިޚާބުގެ ކުރިން ޕާލިމަންޓަރި ނިޒާމަކަށް ބަދަލު ކުރަން އެއްބަސްވާ ކަނޑިޑޭޓަކަސް ވެއްޖެނަމަ ތާއީދު ކުރަން ފަސޭހަވާނެ ކަމަށް ވެސް ރައީސް ނަޝީދު ވިދާޅުވިއެވެ.
"ފިކުރެއްގެ ދިރުންގެ ފަރާތުން ތާއީދު ކުރާ ރިޔާސީ ކެނޑިޑޭޓެއް ކަނޑައަޅާނީ ފަހުން. ރިޔާސީ އިންތިޚާބުގެ ކުރިޔަށް ޕާލިމެންޓްރީ ނިޒާމަށް ބަދަލު ކުރުމަށް އެއްބަސްވާ ކެނޑިޑޭޓަކަށް ތާއީދު ކުރަން ފަސޭހަވާނެ ކެނޑިޑޭޓެއް." ރައީސް ނަޝީދު ވިދާޅުވިއެވެ.
ޕްރައިމަރީ ރައީސް ޞާލިޙް ވަނީ ވޯޓްލީ މީހުންގެ 61 އިންސައްތަ ކާމިޔާބު ކުރައްވާފައެވެ. އެއީ 24،572 ވޯޓެވެ. ރައީސް ނަޝީދަށް ލިބިވަޑައިގަތީ 15،631 ވޯޓެވެ. އެމްޑީޕީގެ ޕްރައިމަރީގައި 57،255 މީހުންނަށް ވޯޓުލުމުގެ ހައްގު ލިބިފައިވާއިރު ވޯޓުލާފައިވަނީ 40،887 މީހުންނެވެ. އެއީ ވޯޓުލުމުގެ ހައްގު ލިބިފައިވާ މީހުންގެ 71 ޕަަސެންޓެވެ.
Ads by STO
