ރައީސް ނަޝީދުގެ އަރިހުން އެދެނީ ޕާޓީގެ ރައީސްގެ މަސްއޫލިއްޔަތު އަދާކުރެއްވުމަށް: ނިޔާޒު
ބަލި ގަބޫލުކުރައްވައި، ނާކިޔާބީގައި ހިތްތިރިކުރައްވައި، މިޔާބު ލިބުނު ފަރާތާ އެއްކޮށް ކުރިއަށް ވަޑައިގެންނެވުމަށް އެމްޑީޕީގެ ރައީސް މުޙައްމަދު ނަޝީދުގެ އަރިހުން ރައްޔިތުންގެ މަޖިލީހުގެ ހުޅުމާލެ ދާއިރާގެ މެންބަރު އަލީ ނިޔާޒު އެދިވަޑައިގަންނަވައިފިއެވެ.
ރޭ ވީޓީވީގެ ފަސްމަންޒަރު ޕްރޮގްރާމްގައި ވާހަކަ ދައްކަވަމުން ނިޔާޒު ވިދާޅުވީ ޕާޓީގެ ރައީސް ޕާޓީގެ ރިޔާސީ ޓިކެޓް ހަވާލު ކުރުމުގެ ރަސްމިއްޔާތަށް ވަޑައިގަންނަވަން ޖެހޭނެ ކަމަށެވެ.
"އަޅުގަނޑު ދެކޭ ގޮތުގައި ޕާޓީގެ ރައީސް ޕާޓީގެ ރިޔާސީ ޓިކެޓް ހަވާލު ކުރުމުގެ ރަސްމިއްޔާތަށް ވަޑައިގަންނަވަން ޖެހޭނެ. އަޅުގަނޑު މިހެން މި ދެންނެވީ ޕާޓީގެ ރައީސްގެ މަސްއޫލިއްޔަތެއް އޮވޭ ޕާޓީގެ ރައީސްގެ މަސްއޫލިއްޔަތުގެ ތެރޭގައި ރިޔާސީ ޓިކެޓު ލިބިވަޑައިގަންނަވާ ފަރާތަކާއެކު މަސައްކަތް ކޮށް އިންތިހާބު ކާމިޔާބު ކުރުމަށް މަސައްކަތް ކުރަން" ނިޔާޒު ވިދާޅުވިއެވެ.
ނިޔާޒު ވިދާޅުވީ ރިޔާސީ ޓިކެޓު ހަވާލުކުރި ޖަލްސާ ރައީސް ނަޝީދު ވަނީ ބޮއިކަޓް ކުރައްވާފައިކަމަށާއި އެކަން ކޮށްގެން ނުވާނެކަމަށެވެ.
"އެންމެ ފުރަތަމަކަމަކަށް އަޅުގަނޑުމެން އެންމެނަށް ފެންނަތަނުގައި ޓިކެޓް ހަވާލުކުރުމުގެ ރަސްމިއްޔާތުވެސް ބޮއިކަޓް ކުރެއްވިތަން އަޅުގަނޑުމެންނަށް މިފެނުނީ. އެއީ ކުރައްވައިގެން ވާނެކަމެއްނޫން އަދިވެސް އަޅުގަނޑު އެދެނީ އަނެއްކާވެސް ވިސްނާ ވަޑައިގެން އަޅުގަނޑުމެންނަށް ކުރިން ދައްކަމުންދިޔަ ރީތި މަންޒަރު އެއީ ބަލިވީމަ ބަލި ގަބޫލުކޮށްފަ ނާކާމިޔާބީގައި ހިތްތިރިކުރައްވާ ކާމިޔާބު ލިބުނު ފަރާތާ އެއްކޮއް ކުރިއަށް ދިއުމަަށް އެއީ ރައީސް ނަޝީދުވެސް ވިދާޅުވާއެއްޗެއް." ނިޔާޒު ވިދާޅުވިއެވެ.
އިތުރަށް ވާހަކަ ދައްކަވަމުން ނިޔާޒު ވަނީ ތަކުރާރުކޮށް ރައީސް ނަޝީދުގެ އަރިހުން ނާކާމިޔާބީގައި ހިތްތިރިކުރައްވާ އެމަނިކުފާނު ކުރިންވެސް ދައްކަވަމުންއައި ޑިމޮކްރަސީގެ ރީތި މިސާލުދެއްކެވުމަށް ގޮވާލައްވައިފައެވެ.
