"އެޗްޑީސީގެ ތިޖޫރީއަކުން ވައްކަމެއް ނުކުރޭ"
ހައުސިން ޑިވެލޮޕްމަންޓް ކޯޕަރޭޝަނުގެ ތިޖޫރިއަކުން ވައްކަން ކުރިކަމަށް ބުނެ ފެތުރު ޚަބަރު އެކޯޕަރޭޝަނުން ދޮގުކޮށްފިއެވެ.
އެޗްޑީސީއިން ބުނީ އެކޯޕަރޭޝަންގެ މުވައްޒަފަކު އާއްމު ފަރާތަކުން ކުލީގެ ގޮތުގައި ދެއްކި ފައިސާއަށް ރިސިޕްޓް ދިނުމަށްފަހު އެ ފައިސާ ރިކޮންސައިލް ނުކޮށް އަމިއްލަ ބޭނުމަށް ނެގިކަން އެކުންފުންޏަށް ފާހަގަކުރެވުނު ހިސާބުން އެ މައްސަލަ ބަލާ، އެ މުވައްޒަފުގެ އިއުތިރާފުވުމާއިއެކު މިހާރު ވަނީ ވަޒީފާއިން ވަކިކުރެވިފައިކަމަށެވެ.
"މި ޢަމަލު ހިންގިކަން ފާހަގަކުރެވުނީ މި ކޯޕަރޭޝަންގެ އިންޓަރނަލް ކޮންޓްރޯލްތަކުގެ ތެރެއިން ރިކޮންސައިލް ކުރަން ޖެހޭ ފައިސާގައި މައްސަލަތަކެއް ހުރުމުން ކަން ފާހަގަކުރަމެވެ. އަދި ކައުންޓަރުގައި ހަރުކުރެވިފައިވާ ސީސީޓީވީ ކެމެރާއަށްވެސް މި މުވައްޒަފުގެ ޢަމަލު ވަނީ ރެކޯރޑްކުރެވިފައެވެ. އަދި ދަންނަވަމެވެ. މި މައްސަލާގައި މި ކޯރޕަރޭޝަންގެ ތިޖޫރީއިން ފައިސާ ވަގަށް ނަގާފައެއް ނުވެއެވެ." އެޗްޑީސީ އިން މިއަދު ބުންޏެވެ.
އެޗްޑީސީ އިން އިތުރަށް ބުނީ އެފަދަ ކަމެއް ކުރުމުގެ ފުރުސަތު އެ ކޯރޕަރޭޝަންގެ މުވައްޒަފަކަށް ލިބިފައި ނުވާކަމަށެވެ. އެ ކޯރޕަރޭޝަންގައި ޤާއިމް ކުރެވިފައިވާ އިންޓަރނަލް ކޮންޓްރޯލް އަދި އިންޓަރނަލް އޮޑިޓް އުސޫލުތަކުގެ ތެރެއިން މިފަދަ އަމަލުތަކަށް ޖާގަ ނުލިބޭނެކަމަށް އެކޯޕަރޭޝަނުން ވަނީ ބުނެފައެވެ.
މި މައްސަލަވެސް އަޅުގަނޑުމެންގެ ސަމާލުކަމަށް އައިސްފައިވަނީ މި ކޮންޓްރޯލްތައް ޤާއިމްކުރެވިފައިވާތީކަން ފާހަގަކުރާކަމަށާއި މި ޢަމަލަކީ އެންމެ ހަރުކަށި އިބާރާތުން އެ ކޯޕަރޭޝަނުން ކުށްވެރި ކުރާ އަމަލެއްކަން ފާހަގަކޮށް، އަދި، މިފަދަ ޢަމަލުތައް ހިންގާ މުވައްޒަފުންނާ މެދުގައި ވަގުތުން ހަރުކަށި ފިޔަވަޅު އަޅާނެކަމަށް ވެސް އެ ކޯޕަރޭޝަނުން ވަނީ ބުނެފައެވެ.
Ads by STO
