އަހުމަދު ރަޝީދަށާއި ރައީސް ނަޝީދަށް ދައުވަތު ދޭކަށް ނުކެރޭނެ: ޑިމޮކްރެޓްސް
މިއަދު އެމްޑީޕީން ވަކިވެވަޑައިގެންނެވި ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެމްބަރު އަހުމަދު ރަޝީދާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު "ދަ ޑިމޮކްރެޓްސް" އާއި ގުޅިވަޑައިގެންނެވުމަށް ދައުވަތު ދޭން ކެރިވަޑައިނުގަންނަވާނެކަމަށް އެޕާޓީގެ މުއައްސިސް ހަސަން ލަތީފް ވިދާޅުވެއްޖެ އެވެ.
ޑިމޮކްރެޓްސްއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ހަސަން ލަތީފު ވިދާޅުވީ ރައީސް ނަޝީދާއި އަހުމަދު ރަޝީދަކީ ދައުވަތު ދެއްވައި ޕާޓީއަށް މަރުހަބާ ވިދާޅުވެވޭވަރަށްވުރެއް މާ ގާތް ދެ ބޭފުޅުން ކަމަށެވެ. އަދި ވަކިން ހާއްސަކޮށް ރައީސް ނަޝީދަށް ދައުވަތު ދީ ޕާޓީއަށް ވަޑައިގަންނަވަން ވިދާޅުވާން ކެރިވަޑައިނުގަންނަވާނެކަމަށް ހަސަން ލަތީފު ވިދާޅުވި އެވެ.
ރައީސް ނަޝީދު އެމްޑީޕީން ވަކިވެވަޑައިގަންނަވަން އަތު ލިޔުމުން ސިޓީ ލިޔުއްވުމަށްފަހު ގަލަން ދެއްވީ ހަސަން ލަތީފަށްކަމަށް އޭނާ ވިދާޅުވި އެވެ.
އަހުމަދު ރަޝީދު އެމްޑީޕީން ވަކިވެވަޑައިގެންނެވީ ޖުމްހޫރީ ޕާޓީއާއި ގުޅިވަޑައިގެންނެވުމަށްކަމަށް ދެކެވެމުންދާ ވާހަކަތައް ހަސަން ލަތީފު ދޮގުކުރެއްވި އެވެ. ވިދާޅުވީ ޖޭޕީއާ ނުވަތަ ޕީޕީއެމްއާއި އަދި އަމުދުން އަދާލަތު ޕާޓީ ފަދަ ކުޑަ ޕާޓީއަކާއި ގުޅިވަޑައިގަންނަވާނެކަމަށް ގަބޫލުފުޅު ނުކުރެއްވޭ ކަމަށެވެ.
މިއަދު ހެނދުނު ބޭއްވި މަޝްވަރާތަކުގައިވެސް އަހުމަދު ރަޝީދު ބައިވެރިވެވަޑައިގެންނެވި ކަމަށް ހަސަން ލަތީފު ވިދާޅުވި އެވެ. އަދި އެމްޑީޕީން ވަކިވެވަޑައިގަންނަވަން ސިޓީ ފޮނުއްވީވެސް އެމަޝްވަރާގައި އެންމެންނާއި އެކުގައި އިންނަވައިގެން ކަމަށްވެސް ވިދާޅުވި އެވެ.
އިލެކްޝަންސް ކޮމިޝަނުން ޑިމޮކްރެޓްސް އުފެއްދުމުގެ ހުއްދަ އަދި ނުދެ އެވެ. ހަސަން ލަތީފު ވިދާޅުވީ އެހެންނަމަވެސް ޕާޓީގެ މަސައްކަތްތައް ކުރިއަށްދާނެ ކަމަށެވެ.
"އަޅުގަނޑުމެން ކުލަވެސް ބޭނުން ކުރާނަން. "ދަ ޑިމޮކްރެޓްސް" މިނަންވެސް ރާއްޖޭގެ ރަށްރަށުގަ ކިޔަމުން ގެންދާނަން. އަޅުގަނޑުމެން މި ގެންދަނީ ލަވަވެސް ހަދަމުން" ހަސަން ލަތީފު ވިދާޅުވި އެވެ.
ރައީސް ނަޝީދު އެމްޑީޕީން ވަކިވެވަޑައިގެންނެވި ނަމަވެސް މިރޭ ޑިމޮކްރެޓްސްއިން ބާއްވާ ޖަލްސާގައި އެމަނިކުފާނު ބައިވެރިވެވަޑައިގަންނަވާނެކަމަށް ދަންނަވަން ދަތިކަމަށް ހަސަން ލަތީފު ވިދާޅުވި އެވެ. އަދި އެމަނިކުފާނު ޑިމޮކްރެޓްސްއާއި ރަސްމީކޮށް ގުޅިވަޑައިގަންނަވާނެ ދުވަހެއްވެސް އަދި ދަންނަވަން ނޭނގޭކަމަށް އޭނާ ވިދާޅުވި އެވެ.
