އެމްޑީޕީއާއެކު ޖޭޕީން ހެދި ކޯލިޝަން ވަނީ ނިމިފައި: ޤާސިމް
އެމްޑީޕީއާއެކު ޖޭޕީން ހަދާފައިވާ ކޯލިޝަން އެއްބަސްވުން މިހާރު އޮތްކަމަށް ގަބޫލުކުރަންޖެހޭ އެއްވެސް ސަބަބެއް ނެތްކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހީމް ވިދާޅުވެއްޖެއެވެ.
ޤާސިމް މިހެން ވިދާޅުވެފައިވަނީ ޖުމްހޫރީ ޕާޓީގެ 158 ވަނަ ބައްދަލުވުމުގައި އެ ޕާޓީގެ ޑެޕިއުޓީ ލީޑަރު އަމީން އިބުރާހިމް މި ސަރުކާރަށް ފާޑު ވިދާޅުވެ ދެއްކެވި ވާހަކަފުޅާ ގުޅިގެން އެ ވާހަކަފުޅުތަކަށް ބާރު ދެއްވާ ދެއްކެވި ވާހަކަފުޅުގައެވެ.
"އަޅުގަނޑުމެންގެ ޕާޓީ އޮތީ ކޯލިޝަންގަތޯ ނުވަތަ ނޫންތޯ މި ކުރައްވާ ސުވާލު.. މީގެ ޖަވާބުގައި އަޅުގަޑު ދަންނަވާލަން ޖެހެނީ، އަޅުގަޑުމެންގެ ޕާޓީގެ މެމްބަރުންތައް އެކޮޅަށް ގެންދަނީ. ދެންގޮސް ސޮއި ކުރުވަނީ، އަނެއްކަމެއް ކުރަނީ. ސްލޮޓްތައް ދަނީ. އެ ސްލޮޓްތަކެއް ނާދޭ. ދެން އަޅުމެން ބުނަންވީތޯ އަޅުގަޑުމެން މިތިބީ އެ ކޯލިޝަންގައޭ ނުވަތަ ނޫނޭ. ބަލަ މީގެ ކުރީގަވެސް އެމްޑީޕީން ހެދި ކޯލިޝަންވެސް އަދި ޕީޕީއެމްއިން ހެދި ކޯލިޝަންވެސް އެބޭފުޅުންނޭ އުވާލީ. މިފަހަރު އެހެން ނުބުނެ އެކަން ނިމިފަކަމަށް ތި ވިދާޅުވަނީ އަމީން. ދެއްތޯ އަޅުގަޑުވެސް ގަބޫލުކުރަނީ އެހެންކަމަށް މިކަން އޮތީ." ޤާސިމް ވިދާޅުވިއެވެ.
"ކޯލިޝަނުގެ ކަންކަމުގެ ވާހަކަ މިބޭފުޅުން މިދައްކަވަނީ. އަޅުގަނޑު ދަންނަވާނީ ކޮން ކޯލިޝަނެއްތޯއޭ އޮތީ" ގާސިމް ވިދާޅުވިއެވެ.
ގާސިމްވަނީ ސަރުކާރަށް ފާޑުވިދާޅުވެ ޖުމްހޫރީ ޕާޓީން ވަކިވެ ސަރުކާރާއި ގުޅުނު ބޭފުޅުން ޖުމްހޫރީ ޕާޓީން ސަރުކާރާއި ގުޅޭނެ މީހުން ހޯދުމަށް ރެއާއި ދުވާލު ހުއްޓުމެއް ނެތި މަސައްކަތް ކުރައްވަމުން ކަމަށް ވިދާޅުވެ އެބޭފުޅުންނަށްވެސް ފާޑުވިދާޅުވެފައެވެ.
އިތުރަށް ވާހަކަ ދައްކަވަމުން ގާސިމް ވަނީ އެމަނިކުފާނުގެ ސަރުކާރެއްގައި ރައްޔިތުންނަށްޓަކައި ކޮށްދެއްވާނެކަން ކަން ވިދާޅުވެދެއްވާފައެވެ. އަދި ސަރުކާރުން ގަސްތުގައި މަޖިލީހުގައި މަރުތަޅު އެޅުވި ކަމަށްވެސް ގާސިމް ވަނީ ތުހުމަތު ކުރައްވާފައެވެ.
