ޣައްސާން، ސަރުކާރަށް: ހަމައެކަނި ކޮރަޕްޝަނާ ދެކޮޅަށް ވާހަކަ ދެއްކުމަކުން ނުފުދޭ!
ކޮރަޕްޝަނާ ދެކޮޅަށް ހަމައެކަނި ވާހަކަ ދައްކާލުމަކުން ނުފުދޭ ކަމަށް ވިދާޅުވެ ތ. ގުރައިދޫ ދާއިރާ މެމްބަރު އަދި އިދިކޮޅު ޕީޕީއެމްގެ ނައިބު ރައީސް ޣައްސާން މައުމޫން ސަރުކާރަށް ފާޑު ވިދާޅުވެއްޖެއެވެ.
ޣައްސާން މިހެން ވިދާޅުވީ ކޮވިޑް-19އާ ގުޅިގެން ހެލްތު މިނިސްޓްރީ އާއި ޓޫރިޒަމް މިނިސްޓްރީން ހަރަދުކޮށްފައިވާ ގޮތުގެ އޮޑިޓް ރިޕޯޓުގައި ކޮރަޕްޝަނަށް މަގުފަހިވާ އެތައް ކަމެއް ހުރިކަން ހާމަވުމާ ގުޅިގެންނެވެ.
އެގޮތުން ޣައްސާން ކުރެއްވި ޓްވީޓެއްގައި ވިދާޅުވީ ޓުއަރިޒަމް މިނިސްޓްރީ އާއި ހެލްތު މިނިސްޓްރީގެ އޮޑިޓު ރިޕޯޓަށް ބަލާއިރު 237 މިލިއަން ރުފިޔާގެ ޚިޔާނާތް ހިނގާފައިވާކަން އެނގޭ ކަމުގައެވެ. އަދި މިވަރުގެ ޚިޔާނާތެއް ހިންގުމަކީ ބަލައިގަނެވޭނެ ކަމެއް ނޫން ކަމުގައާއި އެއީ ސިހުން ގެނުވި ކަމެއް ކަމުގައިވެސް ޣައްސާން ވިދާޅުވިއެވެ.
ޣައްސާން ވިދާޅުވީ ދިވެހި ރައްޔިތުންނަށް މިއަށްވުރެ ރަނގަޅު ގޮތް ޙައްޤުވާ ކަމަށާއި ކާރިސާގެ ވަގުތެއްގައި މިއަށްވުރެ ރަނގަޅަށް ކަންކަން ހިންގުމަކީ ދިވެހިންނަށް ޙައްޤުވާ ކަމެއް ކަމަށެވެ.
އޮޑިޓަރ ޖެނެރަލް ނެރުއްވާފައިވާ މި ދެ ރިޕޯޓުގައި ވެސް ކޮރަޕްޝަނަށް މަގުފަހިވާ ގޮތަށް ހިންގާފައިވާ ގިނަ ކަންތައްތަކެއް ފާހަގަކޮށްފައިވެއެވެ. އެގޮތުން ޓޫރިޒަމް މިނިސްޓްރީ އިން ޖުމްލަ 26 މިލިއަން ރުފިޔާ ޚަރަދުކޮށްފައިވާ ކަމަށާއި، އެހެން ނަމަވެސް އޭގެ ތެރެއިން 99 ޕަސަންޓު ހަރަދަކީ މިނިސްޓްރީގެ ތެރެއިން ކޮންމެހެން ހިނގަން ޖެހޭ ހަރަދުތަކެއް ނޫން ކަމަށް އޮޑިޓް ރިޕޯޓުގައި ބުނެފައިވެއެވެ.
އަދި ހެލްތު މިނިސްޓްރީގެ އޮޑިޓް ރިޕޯޓުގައި ބަލި މީހުންނަށް ފަރުވާ ދިނުމަށް 75 ވެންޓިލޭޓަރު ގެނައުމަށް ހަވާލުކުރި ދުބާއީގެ ކުންފުންޏަކީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ލަފާ ދީގެން ހެލްތު މިނިސްޓްރީން މަސައްކަތް ހަވާލުކުރި ކުންފުންޏެއް ނޫންކަމަށް ވަނީ ބުނެފައެވެ.
މީގެއިތުރުން ވެންޓިލޭޓަރު ގަންނަން ހަވާލުކުރި ދުބާއީގެ އެގްޒެކިއުޓަރސް ޖެނެރަލް ޓްރޭޑިން އަށް އެޑްވާންސް ޕޭމަންޓް ގެރެންޓީއަކާނުލައި 30.9 މިލިއަން ރުފިޔާ ދޫކޮށްފައިވާ ކަމަށްވެސް އޮޑިޓް ރިޕޯޓުގައި ބުނެފައިވެއެވެ. އަދި ކުންފުންޏަށް ވެންޓިލޭޓަރުތައް ގެންނަން ހަވާލުކުރީ އެކަމަށް އެދި ހުށަހެޅި ދިވެހި ކުންފުނިތަކަށް ވުރެ ބޮޑު އަގެއްގައިކަން ވެސް ވަނީ ފާހަގަ ކޮށްފައެވެ.
