އިންޓަރނެޓްގެ ފިނިހަކަ ދުވެއްޔާއެކު، ދަރިވަރުންގެ ކިޔެވުންވެސް ފިނިހަކަ ދުވެލީގައި
މުޅި ދުނިޔެއަށް ކުރިމަތިވެފައި މިވާ އާލަމީ ވަބާ، ކޮވިޑް-19ގެ ސަބަބުން އަޅުގަނޑުމެން ދިރިއުޅުމުގެ ގިނަ ކަންތައްތަކެއް މިވަނީ ބަދަލު ވެފައިކަން ޔަގީނެވެ. ކުރިން ތަޖުރިބާ ކުރަން ނުޖެހޭ އެތައް ކަމެއް މިއަދު ކޮވިޑް-19ގެ ސަބަބުން ތަޖުރިބާ ކުރަން ޖެހިއްޖެއެވެ. ކޮވިޑް-19ގެ ސަބަބުން އެތައް ކަމެއް ކުރަމުން އައި ނިޒާމަށް ބަދަލުތަކެއް އައިސްފިއެވެ. ގޭގައި ތިބެގެން ހަމަ ހުރިހާ ކަމެއްވެސް ކުރެވޭނެ ނިޒާމެއް ހަމަޖައްސަން ޖެހިއްޖެއެވެ.
ކޮވިޑް-19ގެ ސަބަބުން އޮފީސްތަކުގައި ކުރާ މަސައްކަތްތައް ވެސް ގޭގައި ކުރުމުގެ ނިޒާމެއް ހަމަޖެއްސުމަށް މަޖުބޫރު ވިއެވެ. އެހެން ކަމުން އޮފީސްތަކުގެ އައި.ޓީ ޑިޕާރޓްމަންޓަށް ކުރަން ޖެހުނީ ކުރިން ކުރަން ޖެހިފައި ނުވާ މަސައްކަތް ތަކެވެ. ރިމޯޓްކޮށް ގޭގައި ތިބެ އޮފީހުގެ ކޮމްޕިއުޓަރާ ކަނެކްޓު ކޮށްލެވޭނެ ގޮތް ހުރިހާ މުވައްޒަފުންނަށް ހަމަ ޖައްސައިދޭށެވެ. މިކަމަކީވެސް އަލަށް ކުރާ ކަމަކަށް ވުމުން އެންމެ ފުރަތަމަ ގިނަ މުވައްޒަފުން ތިބީ "ވާނުވާ" ގައެވެ. ނަމަވެސް ދުވަހަކަށް ފަހު ދުވަހެއް ހަމައަކަށް އެޅެމުން ގޮސް، މިއަދު ހެނދުނު މުނާޖާ ކޮނޑުއަޅައިގެން އޮފީހަށް ނުކުތުމަކީ ބޭކާރު ކަމެއްގެ ގޮތުގައި ގިނަ ބަޔަކު ގަބޫލު ކޮށްފިއެވެ. ގެއިން ހުރިހާ ކަމެއް ކުރެވޭނަމަ އޮފީހަށް ނުކުންނަންވީ ކީއްކުރަން ހެއްޔެވެ.
ކޮވިޑް-19ގެ ސަބަބުން ބަދަލުވީ އޮފީސްތަކުގައި މަސައްކަތް ކުރާ ނިޒާމު އެކަންޏެއް ނޫނެވެ. ތައުލީމީ ނިޒާމަށް ވެސް ކޮވިޑް-19ގެ ސަބަބުން އެތައް ބަދަލުތަކެއް އައެވެ. ކޮންމެ ދުވަހަކު ފޮތް ދަބަސް ކޮނޑުއަޅައިގެން ސުކޫލަށް ދާ ދަރިވަރުން މިއަދު ސުކޫލަށް ދާކަށް ނުޖެހެއެވެ. ބިޒީ ޝެޑިއުލްގައި އުޅެމުންވެސް ކޮލެޖަށް ދިއުމަށް ވަގުތު ހުސްކޮށްގެން ކޮލެޖަށް ދާކަށް މިއަދު ކޮލެޖުތަކުގެ ދަރިވަރުންނަކަށް ނުޖެހެއެވެ. މިއަދު ހުރިހާ ދަރިވަރުން ވެސް ކުލާސްތަކުގައި ބައިވެރިވަނީ މޯބައިލް ފޯން ނުވަތަ ލެޕްޓޮޕުންނެވެ. ގޭގައި އިނދެގެން ކުލާސްތަކުގައި ބައިވެރިވެލަން ވަރަށްވެސް ފަސޭހައެވެ. ނަމަވެސް މައްސަލަ ދިމާވާ ހިސާބަކީ މިއީއެވެ.
ރާއްޖޭގެ އިންޓަރނެޓު މާ "ފާސްޓް" އީއެވެ. އިންޓަރނެޓު ސްޕީޑްގެ ސަބަބުން އޮންލައިން ކުލާސްތައް ބޭކާރު ކުލާސްތަކަކަށް ބަދަލުވާ ފަހަރުވެސް އާދެއެވެ. އިންޓަރނެޓް ސްޕީޑްގެ ސަބަބުން ދަރިވަރުންނަށް ޓީޗަރުން ކިޔާ އެއްޗެއް ފަހުމު ނުވެ ޓީޗަރުންނަށް ދަރިވަރުން ކިޔާ އެއްޗެއް ފަހުމު ނުވެ ވެސް ދަނީ މަދަކުން ނޫނެވެ. އިންޓަރނެޓް ސްޕީޑްގެ ސަބަބުން އޮންލައިން ކުލާސްތަކުގައި ދިމާވާ ދަތިތަކަކީ ކޮބާތޯ ބަލައިލުމަށް ދަރިވަރުން ކޮޅަކާ އަޅުގަނޑު ވާހަކަ ވެސް ދައްކާލީމެވެ.
"ކުލާހަށް ނުވަދެވިފައި އެތައް އިރަކު ވެސް ހުންނަން ޖެހިދާނެ"
ދިވެހިރާއްޖޭގެ ގައުމީ ޔުނިވާރސިޓީގައި ޕަބްލިކް ހެލްތުގެ ދާއިރާއިން ތައުލީމު ހާސިލް ކުރަމުން ދާ ދަރިވަރަކުން "ދެން" އާއި ވާހަކަ ދައްކަމުން ބުނީ، އޮންލައިން ކުލާސްތަކުގެ ސަބަބުން ހަގީގަތުގައި ވަރަށް ގެއްލުންވާ ކަމަށާއި އެގޮތުން ކުލާހަށް ނުވަދެވިފައި ވެސް އެތައް އިރަކު ހުންނަން ޖެހޭ ކަމަށެވެ.
"ކުރިން ދުވަހު ވެސް އަޅުގަނޑު އޮފީސް ނިންމާލިގޮތަށް ދުން ޖަހާފަ ގެއަށް އައީ ކުލާސް ފެއްޓޭ ތީ. އައިސް ކުލާހަށް ވަންނަން ވެގެން 'ޓްރައި' ކޮށްކޮށް ކުލާހަކަށް ނުވަދެވުނު. ހަމަ ކަނެކްޓިންގް އަރާފަ އިންނަނީ. އަޅުގަނޑު ދެން ރުޅި ގަދަވެގެން ވަރަށް ބޮޑަށް އަސްލު ހާސް ވެސް ވި." އޭނާ ބުންޏެވެ.
އިތުރަށް އޭނާ ބުނީ، ގޭގެ ވައިފައިގެ މައްސަލައެއް ކަމަށް ހީކޮށް، މޮބައިލް ޑާޓާ ބޭނުން ކޮށްގެން ވެސް މަސައްކަތް ކުރި ކަމަށެވެ. ނަމަވެސް އެއް ގަޑިއިރުގެ މި ކުލާސް ނިމިގެން ދިޔައިރު ވެސް އޭނާ އުޅުނީ އެހާލެއްގައި ކަމަށް އޭނާ ބުންޏެވެ. އަދި ގެއްލިގެން ދިޔައީ ވަރަށް މުހިއްމު ފިލާވަޅެއް ކަމަށާއި، އެ ފިލާވަޅު އަނބުރާ ލިބޭނެ ގޮތެއްވެސް ނޯންނާނެ ކަމުގައި އޭނާ ބުންޏެވެ.
އޭނާ ބުނީ، ރާއްޖޭގައި އިންޓަރނެޓު ފޯރުކޮށްދޭ ފަރާތްތައް ވަނީ ފެއިލް ވެފައި ކަމަށެވެ.
އޭނާ އަކީ ދިރާގު އަދި އޫރިދޫ ވެސް ބޭނުން ކުރާ މީހެއްކަން ފާހަގަ ކުރަމުން އޭނާ ބުނީ ، ދިރާގު ވެސް އަދި އުރީދޫ ވެސް މަސައްކަތް ކުރަނީ އެހާ ސްލޯ ސްޕީޑެއްގައި ކަމަށެވެ. ކަނެކްޓު ވަނީ ހިތަށް އެރިއްޔާ ކަމުގައެވެ. ގޭގައި އިނދެގެން ފަސޭހަ ކަމާއެކު ކިޔަވާލެވޭނެ ކަމަށް ހީކުރި ނަމަވެސް ކުލާސް ނިމޭއިރު ވެސް ކުލާހަށް ނުވަދެވިފައި ހުންނަން ޖެހޭ ނަމަ މިއީ ބޭކާރު ކަމެއް ކަމުގައި އޭނާ ސިފަ ކުރިއެވެ.
"ކުލާހަށް ވަދެވުނަސް އިރުއިރުކޮޅާ 'ޑިސްކަނެކްޓް' ވާނެ"
ދިވެހިރާއްޖޭގެ އިސްލާމިކް ޔުނިވާރސިޓީގައި ޝަރީއާ އިން ލޯގެ ދާއިރާއިން ޑިގްރީއަށް ކިޔަވަމުން ދާ ދަރިވަރަކު ވެސް ދެން އާއި ވާހަކަ ދައްކަމުން ބުނީ ބައެއް ފަހަރަށް ކުލާސްތަކަށް ވަނުމުގައި ދަތިތަކެއް ދިމާވާ ކަމަށެވެ. އެތައް ދުވަހަކު ކުލާހަށް ނުވަދެވިފައި ގިނަ އިރުތަކެއް ވަންދެން ހުންނަން ޖެހޭކަން ފާހަގަ ކުރަމުން އެ ދަރިވަރު ބުނީ، އެކަމުގެ ސަބަބުން ފިލާވަޅުގެ މުހިއްމު ބައިތަކެއްވެސް ގެއްލިގެން ދާ ކަމަށެވެ.
"މަހުގެ މެދަކާ ހިސާބަށް ދާއިރަށް ވައިފައި ސްލޯ ވާން ފަށާނެ. ކުލާހަށް ޖޮއިން ކުރެވުނަސް އިރުއިރުކޮޅާ ޑިސްކަނެކްޓްވޭ. ނޫނީ ފްރީޒް ވެގެން ވެސް މިސްވޭ" ދެން އާއި ވާހަކަ ދައްކަމުން އޭނާ ބުންޏެވެ.
މީގެ އިތުރުން އޭނާ ފާހަގަ ކުރީ މިއީ އަދި ވީޑިއޯ ނުޖައްސައި ހަމައެކަނި އޯޑިއޯ ބޭނުންކޮށްގެން ކިޔަވައިދޭއިރުގައި ވާ ވަރު ކަމަށާއި ރާއްޖޭގައި އަސްލު އިންޓަރނެޓުގެ ހިދުމަތް ރަނގަޅު ނަމަ ވީޑިއޯ ޖައްސައިގެން އޮންލައިން ކުލާސްތައް ކުރިއަށް ގެންދެވޭނެ ކަމަށެވެ. ވީޑިއޯ ވެސް ބޭނުންކޮށްގެން ކުލާސް ކުރިއަށް ގެންދާ ނަމަ ދަރިވަރުންނަށް ކުލާހުގައި ބޮޑަށް "ކޮންސެންޓްރޭޓް" ކުރެވޭނެ ކަމުގައި އޭނާ ފާހަގަ ކުރިއެވެ.
" ކިޔަވައިދޭ އެއްޗެއް ފަހުމެއް ނުވޭ"
ދިވެހިރާއްޖޭގެ ގައުމީ ޔުނިވާރސިޓީގައި ޝަރީއާ އެންޑް ލޯގެ ޑިގްރީއަށް ކިޔަވަމުން ދާ އެހެން ދަރިވަރަކު ދެން އާއި ވާހަކަ ދައްކަމުން ބުނީ، އިންޓަރނެޓް ކަނެކްޝަންގެ މައްސަލަތައް ކުރިމަތިވާތީ އޮންލައިން ކުލާސްތަކުގައި ލެކްޗަރާއިން ކިޔަވައިދެއްވާ އެއްޗެހި ގިނަ ފަހަރަށް ފަހުމު ވެސް ނުވާ ކަމަށެވެ.
" އޮންލައިން ކުލާސްތައް ލެގުވުމުގެ ސަބަބުން ލެކްޗަރާއިން ކިޔަވައިދެއްވާ ފިލާވަޅުތައް ފަހުމު ނުވުމަކީ އަޅުގަނޑު ދެކޭ ގޮތުގައި ލިބޭ އެންމެ ބޮޑު އެއް ގެއްލުން. އެކަން ހާސިލު ނުވާ ނަމަ އޮންލައިން ކުލާސްތަކުގެ މަގްސަދު ހާސިލުވާ ކަމަކަށް ނުދެކެން" ދެން އާއި ވާހަކަ ދައްކަމުން އޭނާ ބުންޏެވެ.
ކިޔަވައިދޭ އެއްޗެހި ފަހުމު ނުވާ އެއް ސަބަބު ކަމުގައި އޭނާ ފާހަގަ ކުރީ ބައެއް ފަހަރަށް ލެކްޗަރާގެ އަޑު ކެނޑިކެނޑިގެން އައުމެވެ. އަދި ދަރިވަރުން ކުރާ ސުވާލެއް ވެސް ލެކްޗަރާއަށް ފަހުމު ނުވެ ޖަވާބު ނުލިބޭ ކަމުގައި އޭނާ ފާހަގަ ކުރިއެވެ.
މިވަރު ވަންޏާ ކުލާހުގައި ނިދަންވެސް ނިދޭނެ
އޮންލައިން ކުލާސްތަކުގައި ދަރިވަރުން ނިދާ ވާހަކަ މީސްމީޑިއާގެ ތެރޭގައި ޖޯކަކަށް ހަދައިގެން ވެސް ވަރަށް ގިނައިން ދައްކައެވެ. ނަމަވެސް އަސްލު ހަގީގަތުގައި އޮންލައިން ކުލާސްތަކުގައި ދަރިވަރުންނަށް ނިދެނީ ވެސް ވަކި ސަބަބެއް ނެތިއެއް ނޫނެވެ. ދަރިވަރުންނާއި ޓީޗަރާ ދެމެދު އޮންނަ ގުޅުން އޮންލައިން ކުލާސްތަކުގައި މާ ބޮޑު ގުޅުމެއް ނޯންނަ ދަރިވަރުންނަށް ގިނަ ފަހަރަށް ލެކްޗަރާގެ އަޑު އަންނަނީ ކެނޑިކެނޑިގެންނެވެ.
މިވަރުވީމާ ދަރިވަރުންނަށް ކުލާހުގައި ނިދޭ ފަހަރުވެސް އަންނާނެ ކަން ޔަގީނެވެ. ކިޔައިދޭ އެއްޗެއް ރަނގަޅަށް އަޑު ނީވޭ ނަމަ ފޫހިވެ އިނދެ ނިދި ޖެހުން ނޫނީ ވާނީ ވެސް ކޮން ކަމެއް ހެއްޔެވެ.
"އޮންލައިންކޮށް އިމްތިހާން ހަދާއިރު ވަގުތު ހަމަވާއިރުވެސް ސަބްމިޓް ނުކުރެވޭ"
އެވިޑް ކޮލެޖުގައި ޕްރޮޖެކްޓް މެނޭޖްމަންޓް ކިޔަވަމުންދާ ދަރިވަރަކު "ދެން" އާއި ވާހަކަ ދައްކަމުން ބުނީ، ވަރަށް ފަހުން އެ ކޮލެޖުން ވަނީ އެ ދަރިވަރުންގެ އިމްތިހާން އޮންލައިންކޮށް ބާއްވައިފައި ކަމަށެވެ. ނަމަވެސް އެ އިމްތިހާނު ތަކުގައިވެސް ގިނަ ކުދިންތަކަކަށް ދަތިތަކާއި ދިމާވި ކަމަށާއި، އިންޓަރނެޓު ސްޕީޑް ސްލޯ ވުމުގެ ސަބަބުން ގަޑި ޖެހޭއިރު ވެސް ލޯޑް ނުވެ ޑިސްކަނެކްޓް ވާތީ ވެސް އުޅެން ޖެހޭ ކަމަށެވެ.
" ޓެސްޓު ހަދާއިރު ގިނަ ކުދިންނަށް ގަޑި ޖެހޭއިރުވެސް ނުނިމިފަ އޮންނަނީ. ކަނެކްޝަން މައްސަލަ ޖެހިގެން އެތައް ވަގުތުތަކެއް ބޭކާރުވޭ. މިހެންވާނަމަ ބޮޑު އަގުދީގެން ކިޔަވާއިރު ވަރަށް ގެއްލުން ވާނެ." އޭނާ ބުންޏެވެ.
"ދެން" އާއި ވާހަކަ ދައްކަމުން އޭނާ އިތުރަށް ބުނީ، އެއީ ކޮލެޖުގެ މައްސަލައެއް ނޫން ކަމަށެވެ. ކުލާސްތަކުގައިވެސް ކަނެކްޝަންގެ މައްސަލަ ކުރިމަތިވާ ބީދައިން ޓެސްޓުގައި ވެސް މިފަދަ މައްސަލަ ކުރިމަތިވަނީ ކަމުގައި އޭނާ ބުންޏެވެ.
ލެކްޗަރާރުންނަށް ވެސް ދަތިތަކާއި ކުރިމަތިވޭ
އޮންލައިން ކުލާސްތަކުގައި އިންޓަރނެޓް ކަނެކްޝަންގެ މައްސަލަ ދިމާވާތީ އުނދަގޫތަކާ ކުރިމަތިވަނީ ހަމައެކަނި ދަރިވަރުންނަކަށް ނޫނެވެ. ޓީޗަރުންނާއި ލެކްޗަރާރުންނަށް ވެސް އެތަކެއް ދަތިތަކާ މިކަމުގެ ސަބަބުން ކުރިމަތި ވެއެވެ.
"ދެން" އާއި ވާހަކަ ދައްކަމުން ދިވެހި ރާއްޖޭގެ އިސްލާމީ ޔުނިވާރސިޓީގެ ލެކްޗަރާއެއް ވިދާޅުވީ، އޮންލައިން ކުލާސް ތަކުގައި ބައެއް ފަހަރަށް ހިއްސާކުރަން ބޭނުންވާ ޑޮކިއުމަންޓްސް ވެސް އިންޓަރނެޓް ކަނެކްޝަން ލަސް ކަމުން ނުފޮނުވިފައި ހުންނަ ކަމަށެވެ. އަދި ހަމަ އެހެންމެ ހިއްސާ ކޮށްގެން ކިޔަވައިދޭ ޕްރެޒެންޓޭޝަން ދަރިވަރުންނަށް ނުފެންނަ މައްސަލައާއި ވެސް ވަރަށް ގިނައިން ކުރިމަތިވާ ކަމުގައި ވިދާޅުވިއެވެ.
"އޮންލައިން ކުލާސްތަކުގައި ފާހަގަވާ އެއްކަމަކީ ދަރިވަރުންގެ ބައިވެރިކަން ވަރަށް ކުޑަކަން. ދަރިވަރުން ކުލާސް ނިމިގެންދާއިރުވެސް ސުވާލެއް ނުކޮށްލާ ހުރެފާނެ. އަޅުގަނޑު ކުރާ ސުވާލަކަށް ވެސް ޖަވާބު ނުދޭ ފަހަރު ގިނަ ވާނީ. ދަރިވަރުންނާ އަޅުގަނޑުމެންނާ އަސްލު އޮންނަ ގުޅުން އެހާ ރަނގަޅެއް ނޫން އޮންލައިން ކުލާސްތަކުގައި. ސަބަބަކަށް ގިނަ ފަހަރަށް ވަނީ ކަނެކްޝަން ގެ މައްސަލަ. ބައެއް ކުދިން ހަމަ ވަދެފަ ނުކުމެފަ ، އެހެން ވެސް އުޅޭނެ. އެކުދިންވެސް ހަމަ ވަންނަން ވަރަށް މަސައްކަތް ކުރާކަން އެނގޭ. މައްސަލައަކީ ދިވެހިރާއްޖޭގެ އިންޓަރނެޓް ސްޕީޑް" ލެކްޗަރާ ފާހަގަ ކުރިއެވެ.
އެތައް ދަރިވަރުންނެއް މިކަމުގެ ސަބަބުން ފޫހިވެ، ކިޔެވުން ހުއްޓާވެސް ލައިފި
އިންޓަރނެޓް ކަނެކްޝަން ސްލޯވެ އެތައް ދަތިތަކަކާ ކުރިމަތިވާތީ ކިޔެވުން ހުއްޓާލުމަކީ ވަރަށް ކޫސަނި ކަމެއްގެ ގޮތުގައި ބަޔަކު ސިފަކޮށްފާނެއެވެ. ނަމަވެސް ކުލާހުގައި ކިޔަވައިދޭ އެއްޗެއް ފަހުމު ނުވާ ކަމުގައި ވަނީ ނަމަ ހަވާލު ކުރާ އެސައިންމަންޓުތައް ނިންމާނީ ކިހިނެއްތޯ ވެސް ސުވާލު އުފައްދަން އެބަ ޖެހެއެވެ.
އެސައިންމަންޓުތައް ހަދަން ޖެހޭ ގޮތް ނޭނގި، ބޮޑު ފުންޏެއްގެ އެސައިންމަންޓު ނިންމަން ހުރުމުގެ ސަބަބުން ދަރިވަރުން ވެސް ބޯ ގޮވާނެ ކަމީ ޝައްކެތް އޮތް ކަމެއް ނޫނެވެ. ކުލާހުގައި ލެކްޗަރާއިން ކިޔަވައިދެއްވާ އެއްޗެއް ނޭނގޭ ނަމަ އެސައިންމަންޓު ހަދާނީ ވެސް ކިހިނެއް ހެއްޔެވެ.
ނަތީޖާ އަކަށް ވަނީ ދަރިވަރުން މަޑުމަޑުން ކިޔެވުން މަތިން ފޫހިވުމެވެ. ދަރިވަރުން ކިޔެވުމަށް "ޑީމޯޓިވޭޓް" ވެގެން ދިއުމެވެ. މިކަމުގެ ސަބަބުން ބައެއް ދަރިވަރުން ނަފްސާނީ ބަލިމަޑުކަމަކަށް ވެސް ގޮސްފައި އެބަހުއްޓެވެ. މިހެން ބުނުމުން ބައެއް ފަރާތްތަކަށް މިކަން ޖޯކަކަށް ވެސް ވެދާނެއެވެ. ނަމަވެސް މިއީ ހަމަ ހަގީގަތުގައިވެސް ވެފައި ހުރި ކަންކަމެވެ.
މިކަމަށް އޮތް ހައްލަކީ ކޮބާބާ؟
ހައްލަކީ ދަރިވަރުން ކިޔެވުން ހުއްޓާލުން ބާވައެވެ؟ ނުވަތަ ހައްލަކީ ކޮވިޑް-19ގެ ބިރުވެރިކަމާއެކު ވެސް ކޮލެޖުތަކުގައި ކިޔަވައިދޭން ފެށުން ބާވައެވެ؟ ނަމަވެސް އޮންލައިން ކުލާސްތައް އެހެން ގައުމުތަކުގައި ވެސް ކާމިޔާބު ކަމާއެކު ކުރިއަށް ގެންދާނަމަ ދިވެހިރާއްޖޭގައި ކުރިއަށް ނުގެންދެވޭ ސަބަބެއްވެސް އޮންނަން ޖެހޭނެ ކަން ޔަގީނެވެ.
ދިވެހިރާއްޖޭގެ އިންޓަރނެޓު ފޯރުކޮށްދޭ ފަރާތްތަކުގެ ޒިންމާދާރުކަން ކުޑަވެ ރައްޔިތުންނާ ދޭތެރޭ ނުވިސްނުމުގެ ނަތީޖާއަކަށް ވެފައި މިވަނީ މިހާރު ކިޔަވާކުދިންނަށް އެތައް ގެއްލުމެއް ވުމެވެ. އަދިވެސް އިންޓަރނެޓު ފޯރުކޮށްދޭ ފަރާތްތަކުން ޒިންމާ ވާކަށް ނުވޭތޯއެވެ. އިންޓަރނެޓުގެ އަގު އެހާ ބޮޑު އިރުގައި އަދި ކަނެކްޝަން ވެސް އެހާ ސްލޯ އީއެވެ.
އެހެން ގައުމުތަކުގައި އޮންލައިން ކުލާސްތައް ކުރިއަށް ގެންދިޔަ ނަމަވެސް ރާއްޖޭގެ މި އިންޓަރނެޓާ އެކު މިކަން ކުރިއަށް ނުގެންދެވޭނެ ކަން ގައިމެވެ. އެހެން ކަމުން މިކަމަށް އޮތް ހައްލަކީ ދިވެހިރާއްޖޭގެ އިންޓަރނެޓު ފޯރުކޮށްދޭ ފަރާތްތަކުން މިހާރަށްވުރެ ޒިންމާދާރުވެ ރައްޔިތުންނާއި ދޭތެރޭ މިހާރަށްވުރެ ބޮޑަށް ވިސްނުމެވެ. މިކަމަކީ ހަމައެކަނި ވިޔަފާރީގެ ފައިދާއަކަށް ކުރާ ކަމަކަށް ނުހަދައި ރައްޔިތުންނަށް ފައިދާ ވާ ގޮތަށް މިކަން ކުރިއަށް ގެންދިއުމެވެ.
ކޮންމެ ދުވަހަކުމެ އެތައް ދަރިވަރުންނެއް މިކަމުގެ ސަބަބުން ކިޔެވުމަށް ފޫހި ވަމުންދާއިރު، އެތައް ދަރިވަރުންނެއް ދަނީ މިކަމުގެ ސަބަބުން ކިޔެވުން މެދުކަނޑާލަމުންނެވެ. ނުވަތަ ހުއްޓާލަމުންނެވެ. ގޭގައި އިނދެގެން ފަސޭހަކަމާއެކު ވާން އޮންނަ ކަންތައްވެސް ރާއްޖޭގައި ނުވަނީ އިންޓާރނެޓުގެ "ބާރު" ދުވެލީގެ ސަބަބުންނެވެ.
އަބަދުވެސް ފިނިހަކަ ސްޕީޑުގައި މަސައްކަތް ކުރާ ދިވެހިރާއްޖޭގެ އިންޓަރނެޓް ސްޕީޑްގެ ސަބަބުން މިއަދު ދަރިވަރުންގެ ކިޔެވުންވެސް މިވަނީ ފިނިހަކައިގެ ދުވެއްޔަށް މަޑުވެފައިކަން ޔަގީނެވެ.
Ads by STO
