އިދިކޮޅު ކޯލިޝަންގެ ކެމްޕެއިނަށް ފުރަތަމަ ހ އަތޮޅަށް

ރައީސް އަބްދުﷲ ޔާމިން އަބްދުލް ޤައްޔޫމް އެންޑޯސްކުރައްވާފައިވާ ޕީޕީއެމް-ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ.މުހައްމަދު މުއިއްޒާއި އެމަނިކުފާނުގެ ރަނިންމޭޓު ހުސެއިން މުޙައްމަދު ލަތީފްގެ ރިޔާސީ ކެމްޕެއިން ރާއްޖޭގެ އެކި ކަންކޮޅު ތަކަށް ހޮނިހިރު ދުވަހު ފެއްޓުމަށް ނިންމައިފިއެވެ.
އަންނަ މަހުގެ 9 ވަނަ ދުވަހު އޮންނަ ރިޔާސީ އިންތިހާބަށް ކެމްޕެއިން ކުރެއްވުމަށްޓަކައި އެންމެ ފުރަތަމަ ހޮނިހިރު ދުވަހު ދިޔުމަށް ހަމަޖެހިފައިވަނީ ހއ އަތޮޅާއި ހދ އަތޮޅަށެވެ.
ރިޔާސީ އިންތިހާބު އެއް ބުރުން ކާމިޔާބު ކުރުމަށްފަހު ރައީސް ޔާމީން މިނިވަންކުރައްވާނެ ކަމަށް ވިދާޅުވެ ޑރ.މުއިއްޒު ވަނީ އިންތިހާބު ކާމިޔާބު ކުރައްވާނެ ކަމުގެ މަސައްކަތްޕުޅު ފައްޓަވާފައެވެ. "ދިވެހީންގެ ރާއްޖެ" ގެ ނަމުގައި ފަށައިގެން ކުރިޔަށް ގެންދާ މި ކެމްޕެއިން ވަނީ އެންމެ ފުރަތަމަ މާލެ ތެރޭގައި ފަށާފައެވެ.
އެގޮތުން ބުރާސްފަތި ދުވަހުގެ ހަވީރު ޑރ މުއިއްޒު ވަނީ ހިޔާ ސަރަހައްދަށް ވަޑައިގެން ޑޯ-ޓު-ޑޯ ހަރަކާތެއް ކުރިއަށް ގެންގޮސްފައިވާ އިރު އެ ސަރަހައްދުން ވެސް ފެނިގެން ދިޔައީ ރައީސް ޔާމީނަށް ތާއީދު ކުރައްވާ ގިނަ ފަރާތްތަކުން ޑރ.މުއިއްޒަށް މަރުހަބާ ކިޔަން އެއްވެ ތިބި މަންޒަރެވެ.
ޑރ.މުއިއްޒަކީ ރައީސް ޔާމީންގެ އަރިހުގައި ދަރިވަރުވި ބޭފުޅެއް ކަމުން ރައީސް ޔާމީން ޤައުމުގެ ހުންގާނުގައި ހިފައްޓަވަން ބޭނުންފުޅުވެލައްވާ ގޮތް އެމަނިކުފާނަށް އެނގޭނެ ކަމަށާއި މިއަހަރުގެ ރިޔާސީ އިންތިހާބަށް ކުރިމަތިލީ ފަރާތްތަކުގެ ތެރެއިން އެންމެ ޤާބިލީ ވެސް ޑރ.މުއިއްޒު ކަމަށް އިދިކޮޅު ގެ ލީޑަރޝިޕުން އަންނަނީ ބުނަމުންނެވެ.







ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.