ރައީސް ޞާލިޙަށް 87 ޕަސެންޓު ވޯޓު އައްޑޫ ސިޓީން ދޭންޖެހޭ: މޭޔަރު ނިޒާރު

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙަށް އައްޑޫ ސިޓީން 87 ޕަސެންޓު ވޯޓު ލިބެންޖެހޭކަމަށް އައްޑޫ ސިޓީގެ މޭޔަރު ޢަލީ ނިޒާރު ވިދާޅުވެއްޖެއެވެ.

Ads by STELCO

ކުރިއަށް އޮތް ރިޔާސީ އިންތިހާބުގެ ކެމްޕޭނުގައި އައްޑޫގައި ބޭއްވި ހަރަކާތެއްގައި ވާހަކަދައްކަވަމުން ނިޒާރު ވިދާޅުވީ، 2018 ގެ ރިޔާސީ އިންތިހާބުގައި އައްޑޫން ރައީސް ސޯލިހަށް ދިނީ 67 ޕަސެންޓް ކަމަށާއި މި ސަރުކާރުން ފާއިތުވީ 500 އަހަރު ވެސް އައްޑޫ އަށް ނުގެނެވޭ ވަރަށް ތަރައްގީ ގެނެސްދީފައިވާތީ ކުރިއަށް އޮތް ރިޔާސީ އިންތިޚާބުގައި ރައީސް ޞާލިޙަށް އިތުރު 20 ޕަސެންޓު ދޭންޖެހޭކަމަށެވެ.

"ރާއްޖޭގެ އެހެން ތަންތަން ވެސް ތިއްބާ ހަ ބިލިއަން ރުފިޔާ މިތަނަށް ހަރަދުކުރީ. މިއީ ތޯތޯ ވާހަކައެއް ނޫން، އެކަންކޮށް ނިންމައިފި،" ނިޒާރު ވިދާޅުވި އެވެ.

މީގެ އިތުރުން، ރިޔާސީ އިންތިހާބުގައި އައްޑޫ އިން ރައީސް ޞާލިޙަށް 87 ޕަސެންޓް ވޯޓު ދިނުމުގެ ފުރުސަތު އެބައޮތް ކަމަށާއި މިއީ ކުރަންޖެހޭ ކަމެއް ކަމަށް ފާހަގަކުރައްވަމުން ނިޒާރު ވިދާޅުވީ، ދުނިޔޭގެ ކޮންމެ ތަނެއްގައި ހުރި ނަމަވެސް އައްޑޫ މީހެއް ނަމަ ވޯޓުލާން ޖެހޭނީ އައްޑޫ އަށް ގެންނަ ތަރައްޤީއަށް ބަލާފައިކަމަށެވެ.

އައްޑޫ އަށް ނިސްބަތްވާ ނައިބު ރައީސަކު ލިބުމުގެ ފުރުސަތު އޮތުމަކީ ވެސް ކުރިއަށް އޮތް އިންތިހާބު އައްޑު އަށް މުހިންމު ވެގެންދާ ސަބަބެއް ކަމަށްވެސް ނިޒާރު ވިދާޅުވިއެވެ. އަދި ދުވަސްވީ އިންތިޒާރަކަށް ފަހު އައްޑޫ އަށް ވެރިކަމުގެ ބާރު ލިބިގެންދާ ކަމަށާއި ރައީސް ޞާލިޙުގެ ރަނިންމޭޓަކަށް ހަމަޖައްސާފައިވާ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވެގެންދާނީ އާދައިގެ ނައިބު ރައީސަކަށް ނޫން ކަމަށްވެސް  ނިޒާރު ވިދާޅުވި އެވެ.

ރައީސް ޞާލިޙުގެ ރަނިންމޭޓު، މުޙައްމަދު އަސްލަމް ވެގެންދާނީ އައްޑޫ ސިޓީ ރައްޔިތުންނަށްޓަކައި ކަންކަންކޮށްދޭނެ ނައިބު ރައީސަކަށް ކަމަށާއި ރައީސް ޞާލިޙުގެ ރަނިންމޭޓަކަށް އައްޑޫ ބޭފުޅަކު ހަމަޖެއްސުމަކީ ފާއިތުވި 100 އަހަރު ވެސް ނުލިބޭނެ ފަދަ ސިޔާސީ ހެޔޮ މަންފާ ލިބިގެންދާނެ ނިންމުމެއް ކަމަށްވެސް ނިޒާރު ފާހަގަކުރެއްވިއެވެ.