ފާރިސްގެ އަމާޒަކީ ކްރިއޭޓިވް ޑިޖިޓަލް ސެކްޓަރއެއް ޤާއިމްކުރުން
އަންނަ މަހު ރިޔާސީ އިންތިޚާބުގައި އަމިއްލަ ގޮތުން ވާދަކުރައްވާ އަޙްމަދު ފާރިސް މަޢުމޫންގެ އަމާޒަކީ ކްރިއޭޓިވް ޑިޖިޓަލް ސެކްޓަރއެއް ޤާއިމްކުރުން ކަމުގައި ވިދާޅުވެއްޖެއެވެ. ފާރިސް މިހެން ވިދާޅުވީ އެމަނިކުފާނުގެ މެނިފެސްޓޯގައި ހިމެނޭ "ދަ ޑިޖިޓަލް އިކޮނޮމީ" އާ ގުޅޭ ގޮތުން މަޢުލޫމާތު ދެއްވުމަށް ބޭއްވި ޕްރޮގްރާމެއްގައެވެ.
ފާރިސް ވިދާޅުވީ ދުނިޔޭގެ ކުރިއަރާފައިވާ ޤައުމުތަކުގައި އަދި ރާއްޖޭގައިވެސް ޢާއްމުގޮތެއްގައި ގިނަ ޚިދުމަތްތައް ފޯރުކޮށްދެނީ ޑިޖިޓަލްކޮށްކަމަށާއި ރާއްޖޭގައި މިކަން ފުޅާ ދާއިރާއެއްގައި ކުރަނީ ބެންކުން ފޯރުކޮށްދޭ ޚިދުމަތްތަކުގައިކަމަށެވެ. އެގޮތުން ކުރީގައި ބެންކްއަށް ގޮސްގެން ކުރެވޭ އެތައްކަމެއް މިހާރު ވަރަށް ރައްކާތެރިގޮތެއްގައި އަދި ކުޑަ ވަގުތުކޮޅެއްގެ ތެރޭގައި ފޯނުން ކުރެވޭކަމަށް ފާރިސް ފާހަގަކުރެއްވިއެވެ.
ދުނިޔޭގެ ފެންވަރުގައި ޑިޖިޓަލް އިކޮނޮމީގެ ތެރޭގައި ބޭންކިންގ ސްޓޮކްސް، ހުރިހާ ކޮމާޝަލް ވިޔަފާރީގެ ޓްރާންސެކްޝަންސް (ސްޓޮކް ޓްރޭޑިންގ ނުވަތަ ޝެއާރ ޓްރޭޑިންގ)، ކްރިޕްޓޯ ކަރަންސީގެ މުޢާމަލާތްތައް ހިމެނެއެވެ. މި މުޢާމަލާތައް ބޭނުންކުރަނީ ޑިޖިޓަލް ވޮލެޓު ފަދަ ވަސީލަތްތައް ބޭނުންކޮށްގެންކަމަށް ފާރިސް ވިދާޅުވިއެވެ.
ފާރިސް ވިދާޅުވީ ޑިޖިޓަލް އިކޮނޮމީ ބޭނުންކުރެވެނީ ހަމައެކަނި ވިޔަފާރީގެ ދާއިރާގައި އެކަނި ނޫންކަމަށެވެ. އެމަނިކުފާނު ފާހަގަކުރެއްވި ގޮތުގައި ނަގުދު ފައިސާ ބޭނުންކުރުމުގެ ބަދަލުގައި "ކޭޝްލެސް ސިސްޓަމް" އަކަށް ރާއްޖެ ބަދަލުވާންޖެހެއެވެ. އަދި މިއީ ރާއްޖެއަށް ކުރު މުއްދަތެއްގެ ތެރޭގައި ޙާސިލްކުރެވިދާނެ ކަމެއްކަން ފާރިސް ފާހަގަކުރައްވާފައިވެއެވެ.
ފާރިސް ވިދާޅުވީ ދައުލަތުގެ ބޮޑެތި ރަޖިސްޓްރީ ނުވަތަ ދަފްތަރު ބެލެހެއްޓުން ޑިޖިޓައިޒް ކުރަންޖެހޭކަމަށާއި، ހުރިހާ ޚިދުމަތްތަކަކީ އޮންލައިންކޮށް ލިބެންހުރި ޚިދުމަތްތަކަކަށް ވާންޖެހޭކަމަށެވެ. އަދި ހުރިހާ މަޢުލޫމާތުތަކަކީ ރަނގަޅަށް ރައްކާކުރެވިފައި ހުރި ސިސްޓަމްތަކަކަށް ވާން ޖެހޭކަމަށްވެސް ފާރިސް ވިދާޅުވިއެވެ.
މިފަދައިން ރާއްޖޭގެ ޚިދުމަތްތައް ބަދަލުކުރެވިއްޖެނަމަ، މުޢާމަލާތްތައް ވަރަށް ބޮޑަށް އަވަސްވެގެންދާނެކަމަށް ފާރިސް ވިދާޅުވިއެވެ.
"ޑިޖިޓަލް އިކޮނޮމީއެއް އަޅުގަނޑުމެންނަށް އުފެއްދިއްޖެނަމަ، ވިޔަފާރިތަކަށް ޚަރަދު ކުޑަވާނެ، ޢާއްމު ރައްޔިތުންނަށް ވަގުތުވެސް ސަލާމަތްވާނެ، އެތައް ބައިވަރު ކުރިއެރުންތަކެއް ލިބޭނެ"
ފާރިސް ވިދާޅުވީ ގިނަ ދިވެހިންނަކީ ޑިޖިޓަލް އިކޮނޮމީއާ ރައްޓެހި ބައެއްކަމުގައި ޤަބޫލުކުރައްވާކަމަށާއި، މިއީ އެތައް އަހަރެއް ވަންދެން ވަރަށް ގިނަ ދިވެހިން އެކަމަކަށް ބޭނުންވެފައިވާ ކަމެއްކަމަށެވެ. މި ވަސީލަތްތައް ނެތުމުން ބޭރުގެ މުޢާމަލާތްތަކާ ބައިވެރި ނުވެވުމާއި ފޮރިން އިންކަމް ނުވަތަ ބޭރުގެ އާމްދަނީ ލިބޭނެ މަގު ބަންދުވެފައިވުމާއި ބޭރު ފައިސާ ލިބުމުގެ ދަތިތައް ކުރިމަތިވާކަމަށް ފާރިސް ވިދާޅުވިއެވެ.
ފާރިސް ވަނީ ރާއްޖޭގެ ޚިދުމަތްތައް އެއްކޮށް ޑިޖިޓައިޒްކުރުމަށް ވަރަށް ބޮޑެތި ގޮންޖެހުންތައް ހުރިކަމަށް ފާހަގަކުރައްވާފައެވެ. އެގޮތުން އެކަމަށް ބޭނުންވާ އިންފްރާސްޓްރަކްޗަރ އާއި އެކަމަށް ބޭނުންވާ ޤާނޫނު ވުޖޫދަށް ގެންނަންޖެހޭކަމަށް ފާރިސް ވިދާޅުވިއެވެ.
މިވަގުތު ކުރެވިދާނެ ކަންތައްތަކައް އަލިއަޅުއްވަމުން ފާރިސް ވިދާޅުވީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) މެދުވެރިކޮށް ކުދި އިސްލާޙުތަކެއް ގެނެސްގެން ޑިޖިޓަލް ދާއިރާއަށް ޚާއްސަ ބޭންކުތަކަށް ރާއްޖޭގައި ޚިދުމަތްދިނުމުގެ ލައިސަންސް ދެވިދާނެކަމަށެވެ. އަދި އެކަމުގެ ސަބަބުން ރާއްޖޭގައި މިހާރު ހިންގާ ބޭންކްތަކާއި ދެމެދު ވާދަވެރިކަން އިތުރުވެ، އެ ބޭންކްތައްވެސް އިޞްލާޙްވާން މަޖުބޫރުވާނެކަމަށް ޤަބޫލުކުރައްވާކަމަށް ވިދާޅުވިއެވެ.
ފާރިސް ވިދާޅުވީ ފައިނޭންޝަލް ސެކްޓަރއެއް ޤާއިމްކުރުމުގަި ނުވަތަ އިޤްތިޞާދީ އާމަސައްކަތެއް ކުރުމުގައި ރާއްޖެ ދުނިޔޭގެ އެހެން ޤައުމުތަކާ ވާދަކުރަންޖެހޭނެކަމަށެވެ. އެމަނިކުފާނު ދެކެވަޑައިގަންނަވާ ގޮތުގައި ވާދަވެރިކަމަކީ ކުރިއެރުމުގެ ރޫޙެވެ. އެގޮތުން ރާއްޖެއަކީ މީހުން ގަޔާވާ ތަނަކަށް ހަދަންޖެހޭކަމަށާއި، ބޭރުގެ އިންވެސްޓަރުން ރާއްޖެއަށް އިންވެސްޓްކުރަންވީ ސަބަބުތައް ސާފުކޮށްދޭންޖެހޭނެކަމަށެވެ.
އަމިއްލަ ގޮތުން ފާރިސް ވާދަކުރައްވާއިރު އެމަނިކުފާނުގެ ރަނިންމޭޓަކަށް ހަމަޖައްސަވާފައިވަނީ ޑރ. އަބްދުއްސައްތާރު ޔޫސުފްއެވެ.
