ޕީއެސްއެމްގެ ރިޔާސީ ބަހުސް ކެންސަލްކުރުމުން، އެކަން މުރާޖަޢާކުރުމަށް ފާރިސް ގޮވާލައިފި
ޕަބްލިކް ސާވިސް މީޑިއާ (ޕީއެސްއެމް) އިން މި އަހަރުގެ ރިޔާސީ އިންތިޚާބުގައި ވާދަކުރައްވާ ކެނޑިޑޭޓުންނާއެކު ބެއްވުމަށް އިންތިޒާމްކުރި ރިޔާސީ ބަހުސް ނުބޭއްވުމަށް ނިންމުމާ ގުޅިގެން، އެނިންމުން މުރާޖަޢާކުރުމަށް އެދި އަމިއްލަ ގޮތުން ވާދަކުރައްވާ އަޙްމަދު ފާރިސް މަޢުމޫން ވިދާޅުވެއްޖެއެވެ.
ފާރިސް މިހެން ވިދާޅުވީ އިއްޔެ ކުރި ޓްވީޓެއްގައެވެ.
އެމަނިކުފާނު ވިދާޅުވީ ރިޔާސީ ބަހުސް ބަލާލަން ލިބުމަކީ އިންތިޚާބުގައި ވާދަކުރައްވާ ކެނޑިޑޭޓުންގެ މެނިފެސްޓޯއާއި ސިޔާސަތުތައް ދެނެގަންނަން ރައްޔިތުންނަށް ލިބިގެންވާ ޙައްޤެއްކަމަށާއި، މި ބަހުސްގެ ސަބަބުން ކެނޑިޑޭޓުންގެ ވަޢުދުތަކާއި ސިޔާސަތުތައް އަޅާކިއުމަށް ފުރުޞަތު އޮންނަން ވާނޭކަމަށް ޤަބޫލުފުޅުކުރައްވާކަމަށެވެ.
އިތުރަށް ފާރިސް ވިދާޅުވީ ކެނޑިޑޭޓަކު ބަހުސްގައި ބައިވެރިވުމަށް އުޒުރުވެރިވުމަކީ މުޅި ބަހުސް ކެންސަލްކުރަންޖެހޭނެ ސަބަބެއް ނޫންކަމަށާއި، އެންމެ ކެނޑިޑޭޓަކު ބައިވެރިވިއަސް، އެ ބަހުސް ބާއްވައި ރައްޔިތުންނާ ހަމައަށް ގެނެސްދިނުމަކީ ޕީއެސްއެމްގެ ޒިންމާއެއްކަމަށެވެ.
ޕީއެސްއެމްގެ ރިޔާސީ ބަހުސް ބޭއްވުމަށްޓަކައި އިންތިޚާބުގައި ވާދަކުރައްވާ ހުރިހާ ކެނޑިޑޭޓުންނަށް ދަޢުވަތު ފޮނުވައި، ކެނޑިޑޭޓުން އެ ދަޢުވަތު ޤަބޫލުކޮށް، ދައުލަތުގެ މީޑިއާއިން ބަހުސަށް ވާންޖެހޭ ތައްޔާރީތައް ވަމުންދަނިކޮށް، ރިޔާސީ ބަހުސް ބޭއްވުމަށް ހަމަޖެއްސި ތާރީޚުގައި މޯލްޑިވްސް ޑިމޮކްރަޓިކް ޕާޓީ (އެމްޑީޕީ) ގެ ޖަލްސާއެއް ބާއްވާތީ، ބަހުސް ފަސްކުރަން އެދިފައިވާކަމަށް ރައީސް އިބްރާހީމް މުޙައްމަދު ޞާލިހުގެ ތަރުޖަމާން މިޢުވާންއާ ޙަވާލާދީ މީޑިޔާގައި ރިޕޯޓްކޮށްފައިވެއެވެ.
މިކަމާ ގުޅިގެން ދައުލަތުގެ މީޑިއާއިން ވަނީ އިންތިޚާބުގައި ވާދަކުރައވާ ހުރިހާ ކެންޑިޑޭޓުންނަށް ބައިވެރި ނުވެވޭނަމަ، ބަހުސް ކުރިއަށް ގެންދިއުމަކީ އެހާ ރަނގަޅު ގޮތެއް ނޫންކަމަށާއި، އަދި ބަހުސްގެ ތާރީޚު ބަދަލު ކުރުމަކީ ކެމްޕޭންތަކަށް ހުރަސް އެޅޭނެ ކަމަކަށްވުމުން، ބަހުސް ނުބޭއްވުމަކީ އެންމެ ރަނގަޅު ގޮތްކަމަށް ބުނެ ބަޔާނެއް ނެރެފައެވެ.
މި ބަޔާނުގައި އިތުރަށް ބުނެފައިވަނީ ޕީއެސްއެމްގެ ބަހުސް ނުބޭއްވުނުނަމަވެސް، ސަންގު ޓީވީއިން އިންތިޒާމްކުރާ ރިޔާސީ ބަހުސްގައި ސަންގު ޓީވީއާ ގުޅިގެން ބަހުސް ކުރިއަށް ގެންދިއުމަށް އެއްބާރުލުން ދޭކަމަށެވެ.
ފާރިޝް ވެސް ތެދެއްބުނެފި މިކޮމެންޓް ސަބްމިޓ ކުރާެބާ!