މި ރާއްޖެއަށް ދިވެހީންނަށް ކޮށްދެވޭނެ އެންމެ ބޮޑު ޚިދުމަތަކީ ރައީސް ޞާލިޙަށް ދެވަނަ ދައުރެއް ދިނުން: އަސްލަމް

ރާއްޖޭގެ ރައްޔިތުންނަށް ޤައުމަށް ކޮށްދެވޭނެ އެންމެ ބޮޑު ޚިދުމަތަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙަށް ދެވަނަ ދައުރެއް ދެއްވުންކަމަށް އެމަނިކުފާނުގެ ރަނިންމޭޓް މުހައްމަދު އަސްލަމް ވިދާޅުވެއްޖެ އެވެ.

Ads by Hajj Corporation

ކުރިއަށް އޮތް ރިޔާސީ އިންތިޚާބުގެ ކެމްޕޭނަށް ހިތަދޫގައި ބޭއްވި ޖަލްސާއެއްގައި ވާހަކަފުޅު ދައްކަވަމުން އަސްލަމް ވިދާޅުވީ މި ސަރުކާރުން އައްޑޫގެ ތަރައްޤީއަށް ކޮށްދީފައިވާ ކަންކަމާއި ކުރިއަށް އޮތް ދައުރުގައި ކޮށްދޭން މެނިފެސްޓޯގައިވާ ކަންކަން ފުރިހަމަ ކުރުމަށްޓަކައި އައްޑޫ ރައްޔިތުން ރައީސް ޞާލިޙް ހޮވަން ޖެހޭ ކަމަށެވެ.

"ތިބޭފުޅުންނަށް، މި ގައުމަށް، ތިބޭފުޅުންގެ މި އައްޑޫއަށް، ތިބޭފުޅުންގެ މި ރާއްޖެއަށް ތިބޭފުޅުންގެ މި ރަށްރަށަށް ކޮށްދެވޭނެ އެންމެ ބޮޑު ހިދުމަތަކީ މިވަގުތު ރައީސް އިބްރާހިމް މުހައްމަދު ސޯލިހް އަށް ދެވަނަ ދައުރެއް ދެއްވުން." އަސްލަމް ވިދާޅުވި އެވެ.

"އިނގިރޭސިން މިތާ ތިބެގެން ކުރި ހަރަަދަށްވުރެ މާ ބޮޑެތި ހަރަދުތަކެއް މި ކުރެވުނީ މި ފަސް އަހަރު ތެރޭގައި. އެއީ އެއާޕޯޓު ތަރައްގީ ކުރުން ކަމުގައި ވިޔަސް، މިވީހާތަނަށް އައްޑޫ އެއާޕޯޓު ތަރައްގީ ކުރަން ސޮއި ކުރެވިފައި ހުރި ކަންކަމަށް ބެލިކަމުގައި ވިޔަސް. އަދި އޭރު އެއާޕޯޓުގައި އިނގިރޭސިން ބަހައްޓާފައި ހުރި އިންޖީނާއި މިހާރު މި އަޅާ އިންޖިނު ގެއާ ބައްލަވާ." އަސްލަމް ވިދާޅުވިއެވެ.

މީގެ އިތުރުން އެހެން ސަރުކާރުތަކުން އައްޑޫއަށް ކޮށްދީފައިވާ ކަންކަމުގެ ވާހަކަ ދައްކަވަން ބޭނުން ނުވާ ކަމަށް ފާހަގަކުރައްވަމުން އަސްލަމް ވިދާޅުވީ އައްޑޫގެ ތަރައްޤީއަށް މި ސަރުކާރުން ކުރި ކަންކަން ކިރިޔާ ވެސް އަޅާކިޔޭނީ އިނގިރޭސިން އައްޑޫގައި ތިބި އިރު ކުރި ކަންތައްތަކާއި ކަމަށެވެ.

ހިތަދޫގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިޙްވަނީ ދެވަނަ ދައުރެއް އެމަނިކުފާނަށް ލިބިއްޖަނަމަ އައްޑޫގެ ތަރައްޤީއަށް ކުރައްވާނެ ކަންތައްތައް ވިދާޅުވެދެއްވާފައެވެ. އޭގެ ތެރޭގައި ޒަމާނީ ވިޔަފާރި ހަބަކަށް އައްޑޫ ހެދުމާއި އިކޯ ޓޫރިޒަމް އައްޑޫގައި ތަރައްޤީކުރުމާއި، ރޭސިން ޓްރެކެއް އެޅުމާއި، މަގު ހެދުމާއި ބޯހިޔަވާހިކަން ހައްލު ކުރަން 1000 ފްލެޓް އެޅުމާއި، ހޮސްޕިޓަލް އިތުރަށް ތަރައްޤީކުރުމާއި އަދި އާރްޓީއެލުން އައްޑޫ ގުޅާލުން ހިމެނެއެވެ.

އައްޑޫއަށް ދެން އޮތް މެނިފެސްޓޯގައި ހުރި ކަންކަން ނިމޭއިރު އައްޑޫގައި ކުރަން އިތުރު ކަމެއް ނޯންނާނެ ކަމަށް ފާހަގަކުރައްވަމުން އަސްލަމް ވިދާޅުވީ އަންނަ ދައުރެއްގައި އައްޑޫގެ ޓޫރިޒަމަށް ގެނެވޭ ބަދަލާއެކު އައްޑޫގެ އިގްތިސޯދު މާ ބޮޑުތަކުން ކުރިއަށްދާނެ ކަމަށާއި އެގޮތުން އައްޑޫގެ ތަސައްވަރު ކުރަހާ ނިމިފައިވާ ކަމަށެވެ. އަދި ކުރިއަށް އޮތް ފަސް އަހަރު ނިމޭއިރު ކުލަ ޖެހި، އައްޑޫ މީހުންނަކީ ފަހުރުވެރި އައްޑޫ ދަރިންގެ ގޮތުގައި ތިބެވޭނެ ކަމަށްވެސް އަސްލަމް ވިދާޅުވި އެވެ.