ތަބަކަށް ލާފައި ރައީސް ޞާލިޙަށް ވެރިކަން ދެއްވީމާ ހުރިހާ ހަތިޔާރެއް ބޭނުންކުރެއްވީ ރައީސް ނަޝީދު ނެތިކޮށްލުމަށް: އިންތި
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙަށް ތަބަކަށް އަރުވާފައި ވެރިކަން ދެއްވީމައި، ހުރިހާ ހަތިޔާރެއް ބޭނުންކުރެއްވީ ރައްޔިތުންގެ މަޖިލީހުގެ ރައީސް، އަދި ކުރީގެ ރައީސް، ރައީސް މުޙައްމަދު ނަޝީދު ނެތިކޮށްލެއްވުމަށް ކަމަށް އިލްޔާސް ލަބީބްގެ ކެމްޕެއިން ތަރުޖަމާނު އިމްތިޔާޒު ފަހުމީ(އިންތި) ވިދާޅުވެއްޖެއެވެ.
ދަ ޑިމޮކްރެޓްސްގެ ރިޔާސީ ކެންޑިޑޭޓު އިލްޔާސް ލަބީބު (އިއްލެ)ގެ ކެމްޕޭނު ފަހު ޖަލްސާގައި ރޭ ވާހަކަފުޅުދައްކަވަމުން އިންތި ވިދާޅުވީ ވެރިއެއްގެ ކިބައިގައި އިޚްސާންތެރިކަމާއި އިޚްލާސްތެރިކަން ހުންނަންޖެހޭނެކަމަށާއި އެ ދެ ސިފަވެސް ރައީސް ޞާލިޙުގެ ކިބައިގައި ނެތްކަމަށެވެ.
އަދި ރައީސް ނަޝީދަކީ "ކުޑަ ގޮޅިން، ޓިނު ގޮޅިން، އަނދަގޮޑިން" މަސައްކަތްކުރައްވައިގެން މި ރާއްޖެއަށް ޑިމޮކްރެސީ ގެންނެވި ބޭފުޅާކަމަށާއި އެމަނިކުފާނު އެމަސައްކަތް ކުރައްވަން ޖެހުނީ "މީހުން މާޔޫސްވެ، މީހުން އެކި އެކި މީހުންގެ ގެއަށް ވަންނަ ހިސާބަށް ދިޔައީމާ" ކަމަށާއި އެ މަސައްކަތް ކުރެއްވިއިރު ރައީސް ޞާލިޙުގެ ހަށިކޮޅުން އެއްވެސް ދާއޮހޮރުވުމެއްވެސް ރައްދުނުވާކަމަށާއި އެމަނިކުފާނުގެ "ގަމީހުން ރުލެއްވެސް ޖެހިވަޑައިނުގަންނަވާ" ކަމަށެވެ.
"ނިކަން ބައްލަވާ، ކުޑަ ގޮޅިން، ޓިނު ގޮޅިން، އަނދަގޮޑިން، މަސައްކަތްކުރައްވައިގެން މީހަކު ޤުރުބާން ވެގެން މި ރާއްޖޭގެ މި ޑިމޮކްރަސީ މޫވްމަންޓު މުޅި ރާއްޖެއަށް ފަތުރާލާއި، މީހުން މާޔޫސްވެ، އެކި އެކި މީހުން ގެއަށް ވަންނަ ހިސާބަށް ވަންނަ ހިސާބަށް ދިޔައީމާ އެ މޫވްމަންޓު ނަގަހައްޓާލާ މުޅި ރާއްޖެއަށް ފަތުރާލާ، އަދި މި ފަތުރާލުމުގެ ތެރެއިން އެއްވެސް ދާއޮހުރުންކޮޅެއްވެސް ރައްދުނުވާ ބޭފުޅެއް.... އަދި... ގަމީހުން ރުލެއްވެސް ޖެހިވަޑައިގެންނެވި ބޭފުޅެއްވެސް ނޫން، ވެދުމަކަށް ތަނބަކަށް ލާފައި ވެރިކަން ދިނީމައި ދެން ހެއްދެވިގޮތާމެދު ވިސްނަވާބައްލަވާ" އިންތި ވިދާޅުވިއެވެ.
މީގެ އިތުރުން ރައީސް ނަޝީދުއަކީ ވެރިކަމަށް ވަޑައިގަތުމަށްފަހުގައިވެސް ސިޔާސަތުތަކާއެކު ރައްޔިތުންގެ އަރިހަށް ވަޑައިގެންނެވި ބޭފުޅެއްކަމަށާއި އެމަނިކުފާނުގެ އެ އަގުހުރި މަސައްކަތްޕުޅު ދިވެހިރާއްޖޭގެ ތާރީޚުގެ ތެރެއިން ފެންނަން އެބަހުރި ކަމަށް އިންތި ވިދާޅުވިއެވެ.
"އެފަދަ ހުރިހާ ބުރަ މަސައްކަތެއް ކުރައްވައިގެން ރަނގަޅު ވެރިކަމުގެ ނިޒާމެއް ގެނެސްދީ އަދި ތަބަކަށް ލާފައި ވެރިކަން ދިނީމައި ނިކަން ބައްލަވާ މުޅި ސަރުކާރުގެ ހުރިހާ، ހުރިހާ ހަތިޔާރެއް ބޭނުންކުރީ އެބޭފުޅާގެ މެޔަށް، އެބޭފުޅާ ނެތިކޮށްލުމަށް، ފަހަތުން ހަންޖަރު ޖެހުމަށް، މަރާލުމަށް އެންމެ ފަހުން ބޮމެއް ގޮއްވާލީ، އެ ފުރުޞަތުވެސް ދިނީ އިބްރާހިމް މުޙައްމަދު ޞާލިޙް" އިންތި ވިދާޅުވިއެވެ.
އެހެންކަމުން އަދި އަދަށްދާންދެން އިންސާފެއް ނުހޯދައި ދައުރެއް ނިމިގެންދާކަމަށް ފާހަގަކުރައްވަމުން އިންތި ވިދާޅުވީ ރައްޔިތުންގެ މަޖިލީހުގެ ރައީސް އަދި މުޅި ޑިމޮކްރެސީ މޫވްމަންޓު ރަމްޒުކޮށްދޭ ބޭފުޅާ އަވަހާރަކޮށްލުމަށް ބޮމުގެ ހަމަލާދީފައިވަނިކޮށް ރައީސް ޞާލިޙަށް އެކަމުގައި ރައީސް ނަޝީދަށް އިންޞާފު ހޯދައިނުދެއްވޭކަމަށެވެ.
"އަޅިގަނޑު ވަރަށް އުފާ ކުރާ އެއްކަމެއްވޭ. ރައީސް ނަޝީދު މުޅި ހަށިކޮޅު ތޮރުފާލައްވާފައިވާއިރުގައި ހޮސްޕިޓަލުގައި އެޑްމިޓްކުރައްވާފައިވާއިރުގައި ޢާއިލާއިން ކުރެއްވި ކަމަކާމެދު އަޅުގަނޑު ވަރަށް ބޮޑަށް ހިތްހަމަޖެހުން ލިބޭ، އެމަނިކުފާނުގެ ހަށިކޮޅަށް އަރާފައިހުރި އެ ޒަހަމްތައް ހާމަވާ ފޮޓޯ އެބޭފުޅުން ހާމަކުރެއްވި، އާންމުކުރެއްވި، އަޅުގަނޑުގެ ބޮލާ ދިމާލުން އުޑު އޮތްފަދައިން އަޅުގަނޑަށް ޔަޤީންކަން އެބައޮތް މިއަދު އެ ހާމަނުކުރި ނަމަ އިބްރާހިމް މުޙައްމަދު ޞާލިޙް އެ ހަމަލާ ދޮގުކުރައްވާނެ، އެއީ ނުހިނގާ ކަމަކަށް ހައްދަވާނެ، އެމްޑީޕީގަ މިހާރު އެތިބިހާ ބަޔަކު އެއީ ނުހިނގާކަމެއްގެ ގޮތުގައި ހަދާނެ" އިންތި ވިދާޅުވިއެވެ.
އެހެންކަމުން މިފަހަރު މިއީ ރައީސް ޞާލިޙަށް ނޫނެކޭ ރައްޔިތުން ބުނަންވީ ފަހަރުކަމަށާއި ރައީސް ޞާލިހުގެ އަނިޔާވެރިކަމުން މުޅި ޤައުމު މިންޖުކުރެވޭނީ ހުރިހާ ރައްޔިތުން ނިކުމެ މާދަމާ އޮތް އިންތިޚާބުގައި އިލްޔާސް ލަބީބަށް (ކެންޑިޑޭޓު ނަންބަރު 7) ވޯޓުދެއްވައިގެންކަމަށް އިންތި ވިދާޅުވިއެވެ.
ޙަމަ ހިނި އަންނަނީ އަންނިއަކީ ކަމުދާ މޭހެއްނޫން
ހުރިހާ ވަޞީލަތެއް ބޭނުންކޮށްގެންވެސް ސައިޒަށް ތިރިކުރަންވެފަ ހުރި މީހެއް އެއީ. މިހާރު އެހެރީ ސައިޒަށް ކަނޑާލަފަ. ﷲ އިރާދަކުރެއްވިއްޔާ އެމީހާއަށް ދުވަހަކުވެސް މިގައުމުގަ ބާރެއް ނުލިބޭނެ.