ޖޯޝާއި ފޯރީގައި ޤައުމީ ޚިދުމަތުގައި ތިބި ރެޑް ކްރެސެންޓުގެ ވޮލަންޓިއަރުންނަށް ގިނަ ބައެއްގެ ތައުރީފު!
ރާއްޖޭގައި ވެސް ފެތުރެމުން އަންނަ ކޮވިޑްގެ ބަލިމަޑުކަމުގައި ޤައުމީ ޚިދުމަތުގައި ބުރަކޮށް މަސައްކަތް ކުރަމުންދާ ރެޑް ކްރެސެންޓްގެ ވޮލަންޓިއުން ތަކެއްގެ ވަރަށް އުފާވެރި ވީޑިއޯ އެއް އާންމު ކޮށްފިއެވެ.
މިމަހުގެ 20 ވަނަ ދުވަހު މޯލްޑިވްސް ރެޑް ކްރެސެންޓް (އެމްއާރްސީ) ގެ މާލެ ބްރާންޗްގެ ރަސްމީ ޓްވިޓާ އެކައުންޓުގައި ހިއްސާ ކޮށްފައިވާ އެވީޑިއޯއިން ފެންނަނީ ޕީޕީއީ ކިޓު އަޅައިގެން ތިބި ތިން ވޮލަންޓިއަރަކު، އެމްބިއުލޭންސެއް ތެރޭގައި ލަވައަކަށް ވަރަށް ޖޯޝާއި ފޯރީގައި އަތް ޖަހަމުންގެންދާ މަންޒަރެވެ.
އެވީޑިއޯގެ ކެޕްޝަންގައި ލިޔެފައިވަނީ ފްރަންޓްލައިނުގައި މަސައްކަތްކުރާ އެވޮލަންޓިއަރުން އެނބުރި އެދަނީ، ބަލި މީހުން ޓްރާންސްފަރ ކުރުމުގެ މެންދަމުގެ ބުރަ ޝިފްޓު ނިންމާލުމަށްފަހު ކަމަށެވެ.
ރެޑް ކްރެސެންޓުގެ އެޓީމުން އެޗްޕީއޭގެ ރެޕިޑް ރެސްޕޯންސް ޓީމް (އާރްއާރްޓީ) އަށް މިއަހަރުގެ މާރޗް މަހުން ފެށިގެން ޚިދުމަތް ދެމުން އަންނައިރު، މިހާތަނަށް އެމީހުން ވަނީ 6000 އަށްވުރެ ގިނަ ގަޑިއިރު ޤައުމީ ޚިދުމަތުގައި ހޭދަ ކޮށްފައި ކަމަށް ވެސް ރެޑް ކްރެސެންޓުން ބުނެފައިވެއެވެ.
ވޮލަންޓިއަރުންގެ މިޓީމަށް އަދި މިވީޑިއޯއަށް ވެސް ގިނަ ބައެއްގެ ތަރުހީބު ވަނީ ލިބިފައެވެ.
