އެކި ސަބަބުތަކާހުރެ ވޯޓު ނުލެވުނު ގިނަ މީހުންނަކީ އެމްޑީޕީގެ މީހުން: ފައްޔާޒު
އެކި ސަބަބުތަކާހުރެ ވޯޓު ނުލެވުނު ގިނަ މީހުން ނިސްބަތްވަނީ އެމްޑީޕީއަށް ކަމަށް އެ ޕާޓީގެ ޗެއަރޕާސަން ފައްޔާޒް އިސްމާޢީލް ވިދާޅުވެއްޖެއެވެ.
އެމްޑީޕީގެ ޤައުމީ މަޖިލީޙުން މިއަދު ބޭއްވި ބައްދަލުވުމަށްފަހު އޮންލައިން ނޫހަކަށް މައުލޫމާތު ދެއްވަމުން ފައްޔާޒު ވިދާޅުވީ ހޮނިހިރު ދުވަހު ބޭއްވި ރިޔާސީ އިންތިޚާބުގައި ވޯޓުލާން ނުނިކުތް ގިނަ މީހުންނަކީ އެމްޑީޕީގެ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަޕޯޓަރުން ކަމަށާއި އެ ވޯޓުތަކާއެކު ދެ ވަނަ ބުރު ކާމިޔާބު ކުރެވިދާނެ ކަމަށެވެ.
"ވޯޓުނުލާ ވަރަށް ގިނަ ބޭފުޅުންނަކީ އަޅުގަނޑުމެންގެ ވޯޓާސް އެނގޭތޯ. އެކިއެކި ސަބަބުތަކަށްޓަކާ ހެދި ވޯޓުނުލެވިފައި ތިބީ،" ފައްޔާޒް ވިދާޅުވިއެވެ.
ވޯޓުލާން ގިނަ ބަޔަކު ނުނުކުތުމުގައި ބައިވަރު ސަބަބު ހުރި ކަމަށް ފާހަގަކުރައްވަމުން ފައްޔާޒް ވިދާޅުވީ އޭގެ ތެރޭގައި "މޮޅުވާނެ ކަމަށް ބަލައިގެން" މަސައްކަތް ނުކުރެއްވި ބޭފުޅުން ހިމެނޭކަމަށެވެ.
"އެއީ ގަޑި ކުޑަވުމާއި އޭގެ އިތުރުން ޓްރާންސްޕޯޓޭޝަން މައްސަލަތަކާއި ދެން އަދި ވަރަށް ބޮޑަށް މޮޅުވާނެ ކަމަށް ބަލާފައި ވެސް އަޅުގަނޑުމެންގެ ވަރަށް ގިނަ ބޭފުޅުން އެހާ ބޮޑު އެފަޓެއް ނުލާ އެބަ ހުރި އެނގޭތޯ،" ފައްޔާޒް ވިދާޅުވިއެވެ.
މީގެ އިތުރުން އިންތިޚާބުގެ ދެވަނަ ބުރުގައި އެކުގައި މަސައްކަތްކުރުމާމެދު ދަ ޑިމޮކްރެޓްސް ޕާޓީއާ އެކި ފަންތީގައި ވާހަކަ ދައްކަމުންދާ ކަމަށް ވެސް ފައްޔާޒް ވިދާޅުވިއެވެ.
"އެކި ލެވެލްގައި ކޮންމެވެސް ވަރަކަށް [ޑިމޮކްރެޓްސްއާ] ވާހަކަ ދައްކަމުން މިދަނީ އެނގޭތޯ،" އޭނާ ވިދާޅުވިއެވެ.
ރިޔާސީ އިންތިހާބުގެ ވަގުތީ ނަތީޖާ ދައްކާ ގޮތުން ރައީސް ޞާލިޙަށް ލިބިވަޑައިގަތީ 84،805 ވޯޓެވެ. އެއީ 39.04 އިންސައްތައެވެ. އަދި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ލިބިވަޑައިގަތީ 100،342 ވޯޓެވެ. އެއީ 46.19 އިންސައްތައެވެ.
ތިކަަހަލަ އެއްޗެއް ބުނެގެން ވެސް ކެމްޕޭނު ޓީމު ހިތްހަމަ ޖައްސުވާތި. ދެން އަދި އަންނަން އޮތް ހިތާމަ ނިކަން ބޮޑު.
އެކިސަބަބުތަކާހުރެ،ދެވަނަބުރުންވެސް ﷲއިރާދަކުރެއްވިއްޔާ ކަލޭމެން ބޮޑު ވެގެންވާ ތަފާތަކުން ބަލިވާނީ!
ދިވެހި ޤައުމުގެ ވޯޓުލެވޭ ޢުރުފުރާގެ ހުރިހާ ރައްޔިތުންނަކީ އެމްޑީޕީގެ މެމްބަރުން. ހެހެހެ!
ހުސްދޮގު އެކިއެކި ޕާޓިތަކުންވެސް އެބަތިބި އަހަރެމެންނަށް އެނގޭ މީހުން ވޯޓް ލާން ނައާދެވިފަ. އެއީ ހުސް އެމްޑީޕީ މީހުންނޫން.