ރައީސް ޞާލިޙް މޮޅުވާތީ އެތައް ހާސް މީހުން ވޯޓުލާން ނުނިކުމޭ، ވޯޓުލުމުގެ ކަންކަން ހުރީވެސް އާންމުންނަށް ދަތިވާގޮތަށް: ފައްޔާޒު
ރިޔާސީ އިންތިޚާބުގެ ފުރަތަމަ ބުރު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙަށް އެއްބުރުން ކާމިޔާބު ނުކުރެއްވުނީ ރައީސް ޞާލިޙަށް ތާއީދުކުރައްވާ އެތައް ހާސް ބަޔަކު އެމަނިކުފާނު މޮޅުވާތީ، މޮޅުވެފައި އޮތްވައި ކޮންމެހެން ނުނިކުންނަން ވެގެން ވޯޓުލާން ނުދިޔުމުން ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް މިރޭ ވިދާޅުވެއްޖެ އެވެ.
އެމްޑީޕީގެ ކެމްޕޭން ހަރަކާތްތެރިންނާއިއެކު އެ ޕާޓީގެ ހަރުގޭގައި މިރޭ ބޭއްވި ބައްދަލުވުމެއްގައި ވާހަކަފުޅު ދައްކަވަމުން ފައްޔާޒު ވިދާޅުވީ، މި ދެތިން ދުވަހު މަޑުކޮށްލައިގެން ތިއްބެވީ އިންތިޚާބުގައި ޔަޤީންކުރި ވަރަށްވުރެ މަދުން ރައީސް ޞާލިޙަށް ވޯޓު ލިބިވަޑައިގެންނެވި ސަބަބު ދެނެގަނެ އެކަން ބެއްލެވުމަށްކަމަށެވެ.
"މި ދެދުވަހަކު މަޑުކޮށްލައިގެން މިބަލައިލީ މި އިންތިޚާބުގައި ކިހިނެއްތޯ ވެގެން ދިޔައީ، އަޅުގަނޑަށް ހީވަނީ ކޮންމެވެސް ވަރެއްގެ ޒިންމާއެއް އަޅުގަނޑު އެކަމުގައި އެބަ ނަގަންޖެހޭހެން، އަޅުގަނޑު 56 ޕަސެންޓޭ މޮޅުވާ ވާހަކަ ދެންނެވީމާ ވަރަށް ގިނަ ބޭފުޅުން ވޯޓުލާން ނުގޮސްތިބި، މޮޅުވާތީ، އެހެންވެ އެކަމަށް އަޅުގަނޑު ވަރަށް ތި އެންމެހާ ބޭފުޅުންގެ އަރިހުން މާފަށް އެދެން" ފައްޔާޒް ވިދާޅުވިއެވެ.
"އަޅުގަނޑުމެންނަށް އެ ނަމްބަރު ލިބޭ. އެހެން ނަމަވެސް މޮޅުވާތީ ވަރަށް ގިނަ އަޅުގަނޑުމެންގެ ވޯޓާސް ނުނިކުންނަވާ ކޮންމެހެނެއް މޮޅުވެފައި އޮތް އެއްޗެއް ވީމަ. ފަސޭހަ ކަމެއް ނޫން ވޯޓުލާން ދިޔުމަކީ، ބޮޑެތި ކިޔޫތަކުގައި ޖެހިގެން،" ފައްޔާޒު ވިދާޅުވި އެވެ.
މީގެ އިތުރުން މިފަހަރު އިންތިޚާބުގެ ކަންކަން އިލެކްޝަންސް ކޮމިޝަނުން އިންތިޒާމުކުރައްވާފައިވަނީ ވަރަށް ދަތިކޮށް ކަމަށާއި އެކަންކަން ހައްލުކުރުމަށް ފައްޔާޒު ވަނީ އީސީއަށް ގޮވާލައްވާފައެވެ.
"އަދި ވަރަށް ދަތިކޮށް މިފަހަރު އިލެކްޝަންސް ކޮމިޝަނުން ރޭވުންތައް ރާވާފައި ހުރީ، ބައެއް ފަހަރު އީސީއޭ ބުނީމާ ބައެއް ރައްޔިތުން އަދިވެސް ހީފުޅު ކުރައްވާނެ އެއީ ސަރުކާރޭ، ނޫން އެއީ ސަރުކާރެއް ނޫން. އަޅުގަނޑުމެން އެއޮތީ ފުރިހަމަ މިނިވަންކަމާއި ބޭނުންވާ ފައިސާ ދީފައި އިލެކްޝަންސް ކޮމިޝަނަށާއި އެކަހަލަ ހުރިހާ މުއައްސަސާތަކަކަށް ކަންކަން ކުރަން" ފައްޔާޒު ވިދާޅުވިއެވެ.
"އެހެންވީމާ އަޅުގަނޑު އިލެކްޝަންސް ކޮމިޝަނަށް މިރޭ ގޮވާލަން އެއަށްވުރެ ރަނގަޅު އިންތިޒާމް މި މުހިންމު ޤައުމީ މަސައްކަތުގައި ރައްޔިތުން ނިކުންނަވާއިރު ރައްޔިތުންނަށް ފަސޭހަކަމާއެކު ރައްޔިތުންގެ ޙައްޤު އަދާކުރުމަށް އެކަން ކަށަވަރުކުރެއްވުމަށްފަހު ބާއްވަން" އެމްޑީޕީއަށް ނުލިބި ހުރި 37،000 ވޯޓު ނެރުމަށް މަސައްކަތްކުރައްވާކަން ފާހަގަކުރައްވަމުން ފައްޔާޒް ވިދާޅުވިއެވެ.
މީގެ އިތުރުން އެ ބޭފުޅުންނަށް ވޯޓު އަޅުއްވަން ދަތިވި ބައެއް ކަންތައް ހުރި ކަމަށް ފާހަގަކުރައްވަމުން ފައްޔާޒު ވިދާޅުވީ، އޭގެ ތެރޭގައި ރީރަޖިސްޓްރޭޝަނުގައި ދިމާވި ދަތިތައް ހުރިކަމަށާއި އެކަންކަމަށް ދެވަނަ ބުރުގެ ކެމްޕޭންތަކުގައި ސަމާލުކަން ދެއްވާނެކަމަށެވެ.
"ވަރަށް ގިނަ ރީރަޖިސްޓްރޭޝަންގައި ތަންކޮޅެއް ދަށްވެފައި އޮތުމުގެ ސަބަބުން އަޅުގަނޑުމެންނަށް ވަރަށް ބޮޑު ދަތިކަމަކަށްވީ ވަރަށް ގިނަ ބޭފުޅުން އެބޭފުޅުންގެ ރަށްތަކަށް އުފުލުމުގައި" ފައްޔާޒް ވިދާޅުވިއެވެ.
"އޭގެ އިތުރުން މިދެންނެވިހެން ވޯޓު ކޮންމެހެން ނުލިޔަސް އަޅުގަނޑުމެން ހޮވޭކަމަށް ބަލައިގެން ތިއްބެވި ބޭފުޅުން ތިއްބެވިކަމާއި އަދި އާންމުގޮތެއްގައި މީގެ ކުރީގެ އިލެކްޝަންސްތަކުގައި ގަޑި އޮންނަނީ އަބަދުވެސް ލަސްކޮށްފައި. ގަޑި ލަސްކުރާތީވެ އެކަން މިފަހަރުވެސް އެހެން ވާނެކަމަށް ބަލައިގެން ހަވީރުގެ ފިންޏަށް ކިއުގަ ޖެހިލައި ގޮސް ވޯޓުލާން ދާން ތިއްބެވި އެތައް ހާސް އެތައް ހާސް ރައްޔިތަކު އަޅުގަނޑުމެންނަށް ވޯޓުލާ މުޅި ދިވެހިރާއްޖޭގައިވެސް ތިބި" ފައްޔާޒް ވިދާޅުވިއެވެ.
އެހެންކަމުން އިންތިހާބުގެ ދެވަނަ ބުރުގައި ކެމްޕޭނު ޓީމުތަކުން އެމްޑީޕީ އަށް ވޯޓުލާނެ މީހުން ގަޑި ޖެހުމުގެ ކުރިން ވޯޓުލާން ގެންދިޔުމަށް ހާއްސަ ސަމާލުކަމެއް ދޭންޖެހޭނެ ކަމަށާއި އެކަމާ ގުޅޭ އިންތިޒާމުތައް ހަމަޖައްސާފައިވާ ކަމަށް ފައްޔާޒު ވިދާޅުވި އެވެ. އަދި ޓީމުތައް އަލުން ރުކުރުވާލައިގެން އަލުން ނިކުންނަނީ އެ ދަތިތައް ފިލުވާލައިގެން އިންތިހާބު ބޮޑުތަނުން ކާމިޔާބު ކުރަން ކަމަށްވެސް ވިދާޅުވި އެވެ.
މިހާރު އިލެކްޝަންސް ވެސް ގޯސްވަނީދޯ. ގޯހެއްނޫން ބަލިވާ ކޮންމެމީހަކުވެސް ބަލިގަބޫލުނުކުރެވުނީމަ ދައްކާނީ ތިކަހަލަ ބަހަނާ. އަދިވެސް ކަލޭ ތިއުޅެނީ ފޯގޮސް އަޑިއަށް ގޮސްފައިވާ އޮޑިއެއް ފެންމައްޗަށް ނަގަން. ބްރޯ ތިކަން ކުރަން މިހާރު މާލަސްވެއްޖެ.
ވޯޓް ލާން ނުނިކުމެ ވޯޓް އިން މޮޅުވާނެ ކަމަށް ލަފާކޮއް ޔަގީން ކުރީ ދޯ ބަލަ ކަލޭމެންނަށް ވޯޓް އަޅަންތިބި މީހުން ވޯޓް ނުލާ ކިހިނެތް 56 ޕަސެންޓް ލިބޭނީ
ތިޔަ ގެންގުޅުނު ވަގުންތައް އެއްކައިރި ކޮށްގެން ނޫނީ ދެންވެސް ކުރިޔަކަށް ނުކެނޑޭނެ.