ކޮވިޑް ޖެހިގެން 10 މީހަކު އައިސީޔޫގައި، 5 މީހުން ވެންޓިލޭޓަރުގައި
ކޮވިޑް-19 ޖެހިގެން 10 މީހުންނަށް އައިސީޔޫގައި ފަރުވާ ދެމުންދާއިރު އޭގެތެރެއިން 5 މީހުން ތިބީ ވެންޓިލޭޓަރުގައި ކަަމަށް ޑރ. އިބްރާހިމް އަފްޒަލް ވިދާޅުވެއްޖެއެވެ.
ހެލްތު އެމްޖެންސީ އޮޕަރޭޝަން ސެންޓަރު(އެޗްއީއޯސީ)ން ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އަފްޒަލް ވިދާޅުވީ، މިހާރު ކޮވިޑް ބައްޔަށް ފަރުވާ ހޯދަމުންދާ މީހުންގެ ތެރެއިން 169 މީހަކަށް ހޮސްޕިޓަލުގައި ދަނީ ފަރުވާ ދެމުން ކަމަށެވެ.
އޭގެތެރެއިން 10 ފަރާތަކަށް ދަނީ އައިސީޔޫގައި ފަރުވާ ދެމުން ކަމަށާއި އޭގެތެރެއިން 5 ފަރާތެއް ތިބީ ވެންޓިލޭޓަރުގައި ކަމަށް ޑރ. އަފްޒަލް ވިދާޅުވިއެވެ.
މިހާ ގިނަ އަދަދަކަށް މީހުންނަށް ހޮސްޕިޓަލުގައި ފަރުވާދެމުންދާއިރު މި ނިމުނު ހަފްތާގެ ތެރޭގައިވެސް ހާހެއްހާ މީހުން ވަނީ ކޮވިޑަށް ފައްސިވެފައެވެ. އަދި މި ބަލީގައި 4 މީހަކު ވަނީ މިދިޔަ ހަފްތާގައި ނިޔާވެފައެވެ.
އަދި އައިސީޔޫއާއި ވެންޓިލޭޓަރުގައިވެސް ފަރުވާ ދެމުން އަންނަ މީހުން އިތުރުވަމުން އަންނަކަން ފާހަގަކުރެވެއެވެ. ހޮސްޕިޓަލް ތަކުގައި ފަރުވާ ދެމުންދާ މީހުންގެ ތެރެއިން ހައިރިސްކް ކެޓަގަރީ ނުވަތަ ބޮޑެތި ބަލިތަކަށް ފަރުވާ ދެމުންދާ މީހުންގެ ނިސްބަތް ވެސް އިތުރުކަން އެޗްއީއޯސީން ހާމަކުރެއެވެ.
