މާލޭގެ ސަރަހައްދު ހޮސްޕިޓަލުތަކުގެ 62 ޕަސެންޓު އެނދުތައް ފުރިއްޖެ
މާލެ ސަރަހައްދުން ކޮވިޑް-19 އަށް ހާއްސަކޮށްފައިވާ ހޮސްޕިޓަލުތަކުގެ ދެބައިކުޅަ އެއްބަޔަށް ވުރެ ގިނަ އެނދުތައް ފުރިފައިވާ ކަމަށް، އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
ޑރ. ނަޒްލާ މިއަދު ކުރެއްވި ޓުވީޓެއްގައި ވިދާޅުވީ މާލޭގައި ހުރި ކޮވިޑް ހޮސްޕިޓަލް އެނދުގެ ތެރެއިން 62 ޕަސެންޓް އެނދު މިހާރު ފުރިފައިވާ ކަމަށެވެ.
ނަޒްލާގެ ޓްވީޓާއެކު އާންމު ކުރެއްވި ގްރާފުން ހާމަވާ ގޮތުގައި ހޮސްޕިޓަލުތަކުގައި އެޑްމިޓް ކުރަންޖެހޭ މީހުންގެ އަދަދުތައް އަންނަނީ ހަފްތާއަކަށް ފަހު ހަފްތާއަކަށް ބޮޑުތަނުން އިތުރުވަމުންނެވެ.
ނަޒްލާ ވަނީ މިހާރު ކުރިމަތިވެފައި މިއޮތީ އުނދަގޫ ހާލަތެއް ކަމަށާއި މިހާލަތުން ވީހާވެސް އަވަހަކަށް އަރައިގަތުމަށް ހުރިހާ ފަރާތްތަކެއްގެ އެހީތެރިކަން ބޭނުންވާ ކަމަށް ވިދާޅުވެފައެވެ.
މެއި މަހުގެ ފަހުކޮޅުން ފެށިގެން، ޖުލައި މަހުގެ ނިޔަލަށް، އެނދުތަކުގެ އޮކިއުޕެންސީ ހުރީ 30 ޕަސެންޓަށް ވުރެ ދަށުގައެވެ. ނަމަވެސް އޯގަސްޓް މަސް ފެށުމާއެކު ހޮސްޕިޓަލުގައި އެޑްމިޓްކުރަންޖެހޭ މިންވަރު ވަނީ ވަރަށް ބޮޑުތަން އިތުރުވެފަ އެވެ.
