ޑިމޮކްރެޓްސްއަށް އެމްޑީޕީއާއި މާދުރަށް ނުދެވޭނެ، މިއީ އެއް ޢާއިލާއެއް: އަސްލަމް
އެމްޑީޕީގެ ކުރީގެ ބާނީ އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދާއި އެމްޑީޕީގައި އިސްކޮށް އުޅުއްވި ބައެއް ބޭފުޅުން އެޕާޓީއާއި ވަކިވެވަޑައިގެން ދަ ޑިމޮކްރެޓްސް އުފެއްދެވި ނަމަވެސް އެބޭފުޅުންނަށް އެމްޑީޕީއާއި މާދުރަށް ވަޑައިނުގެންނެވޭނެކަމަށް ރައީސް ޞާލިޙުގެ ރަނިންމޭޓޫ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެ އެވެ.
ރިޔާސީ އިންތިޚާބުގެ ދެވަނަ ބުރުގެ ކެމްޕޭނުގައި ރޭ އައްޑޫ ހުޅުދޫގައި ބޭއްވި ހަރުގެ ޖަލްސާއެއްގައި ވާހަކަފުޅު ދައްކަވަމުން އަސްލަމް ވިދާޅުވީ އެމްޑީޕީން ވަކިވެވަޑައިގެން ދަ ޑިމޮކްރެޓްސްގައި މިހާރު ތިއްބެވި ބޭފުޅުންނަކީ ރައްޔިތުން ބޭނުންވާ ގޮތަށް ވެރިކަން ކުރުމުގެ ނިޒާމަކަށް ރާއްޖެ ބަދަލުކުރުމުގައި އެމްޑީޕީން ކުރި މަސައްކަތުގައި އިސްކޮށް ތިއްބެވި ބޭފުޅުން ކަމަށެވެ.
"އަޅުގަނޑު ދަންނަވާނީ މޯލްޑިވިއަން ޑިމޮކްރެޓިކް ޕާޓީއާ ދަ ޑިމޮކްރެޓްސްއާ ފިކުރުގެ ގޮތުން އެއްވެސް ތަފާތެއް ނެތޭ. އަޅުގަނޑުމެންގެ ތެރޭގައި ބައެއް ކަންކަން ކުރުމުގައި ހިޔާލުގެ ތަފާތެއް މިއޮތީ. މިއީ ވަރަށް ގާތް ގުޅުމެއް އޮތް ، އެއް އާއިލާއެއް ކަމުގައި އަޅުގަނޑު ދެކެނީ،" އަސްލަމް ވިދާޅުވި އެވެ.
މީގެ އިތުރުން އަސްލަމް ވިދާޅުވީ އެމްޑީޕީއާއި ދުރަށް ވަޑައިގެންނެވި ނަމަވެސް ދަ ޑިމޮކްރެޓްސްގައި ތިއްބެވި ބޭފުޅުންނަށް އެމްޑީޕީއާއި މުޅިން ވަކި ނުވެވޭނެކަމަށްވެސް އަސްލަމް ވިދާޅުވިއެވެ.
"އަޅުގަނޑު ދަންނަވާނީ ފިކުރުގެ ގޮތުން ޑިމޮކްރެޓްސްއަކީ ވަކި ޕާޓީއެއް ހައްދަވައިގެން ތިއްބަސް އެމްޑީޕީއާ މާދުރަށް ދެވޭނެ ބައެއް ނޫނޭ، ހިންގަވާށޭ އެކުގައި މަސައްކަތްކުރައްވަން،" އަސްލަމް ވިދާޅުވި އެވެ.
ރިޔާސީ އިންތިޚާބުގެ ދެވަނަ ބުރުގައި ޕީޕީއެމް/ޕީއެންސީގެ ކެންޑިޑޭޓު ޑރ. މުޙައްމަދު މުއިއްޒުއާއި އެމްޑީޕީގެ ކެންޑިޑޭޓު ރައީސް އިބްރާހިމް މުޙައްމަދު ޞާލިޙު ވާދަކުރައްވާއިރު، އެއިން އެއްވެސް ޕާޓީއަކާއެކު ދެވަނަ ބުރުގައި މަސައްކަތް ނުކުރަން ދަ ޑިމޮކްރެޓްސް އިން ވަނީ ނިންމާފައެވެ.
ޕާޓީގެ ޖަނގިޔާ ބޭލެން ފެށީމަ ތިކަހަލަ ވާހަކަ ދެއްކޭނެ.