ކޮވިޑް ޖެހިގެން 11 މީހަކަށް އައިސީޔޫގައި ފަރުވާ ދެނީ، ވެންޓިލޭޓަރުގައި 8 މީހަކު
ކޮވިޑް-19 ޖެހިގެން 11 މީހަކަށް އައިސީޔޫގައި ފަރުވާ ދެމުންދާއިރު އޭގެ ތެރެއިން 8 މީހަކު ވެންޓިލޭޓަރަށް ލާފައިވާ ކަމަށް އެޗްއީސޯސީން ހާމަ ކޮށްފިއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމެއްގައި ޑރ. އިބްރާހިމް އަފްޒަލް ވިދާޅުވީ މިހާރު އައިސީޔޫގައި 11 މީހަކަށް ފަރުވާ ދެމުންދާ ކަމަށާއި އޭގެ ތެރެއިން އަށް މީހަކަށް ފަރުވާ ދެނީ ވެންޓިލޭޓަރުގައި ކަމަށެވެ.
ރާއްޖެ އިން ކޮވިޑް-19 ޖެހިފައިވާ މީހުންގެ ތެރެއިން 162 މީހަކަށް މިހާރު ފަރުވާ ދެމުން ގެންދަނީ ހޮސްޕިޓަލްގައި އެޑްމިޓް ކޮށްގެންނެވެ.
ރާއްޖޭގައި ކޮވިޑް-19އަށް ފައްސިވާ މީހުންގެ ޢަދަދު އިތުރުވަމުން އަންނާތީ ޑޮކްޓަރުން ވަނީ ކަންބޮޑުވުން ފާޅުކުރައްވާފައެވެ. އަދި މިހާރު އިތުރުވަމުންދާ މިންވަރަށް އިތުރުވަމުން އައުމަކީ އެކަމުގެ ނުރައްކާ ބޮޑު ވެދާނެކަމެއް ކަމަށް ވިދާޅުވެ އެކަމުގެ އިންޒާރު ޑޮކްޓަރުން ވަނީ ދެއްވާފައެވެ. އެހެންކަމުން ބަލިޖެހޭ މީހުންގެ ޢަދަދުތައް އިތުރުވާނަމަ ރާއްޖޭގެ ސިއްޙީ ނިޒާމަށް ނުކަތާ މިންވަރަށް ގޮސްދާނެތީ ބަލިން ރައްކާތެރިވުމަށް ޑޮކްޓަރުން ދަނީ ތަކުރާރުކޮށް އިލްތިމާސް ކުރަމުންނެވެ.
Ads by STO
