އެމްޑީޕީއަށް ރިޔާސީ އިންތިޚާބު ގެއްލުމުގެ އެންމެ ބޮޑު ސަބަބަކީ ރައީސް ނަޝީދު އަދި ޑިމޮކްރެޓްސް: އިބުރޭ

ރިޔާސީ އިންތިޚާބުގައި އެމްޑީޕީއަށް ނާކާމިޔާބު ލިބިވަޑައިގަތީ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އާއި ޑިމޮކްރެޓްސްއިން "އިބޫ ނޫން ގޮތެއް" ކެމްޕޭނުގެ ސަބަބުންކަމަށް އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވިދާޅުވެއްޖެ އެވެ.
ރައީސް ނަޝީދު އެނބުރި އެމްޑީޕީއަށް ވަޑައިގަތުމަށް މިއަދު ހުށަހަޅުއްވާފައިވާތީ އެމްޑީޕީގެ ޤައުމީ މަޖިލީހުގެ ހުރިހާ މެމްބަރުން ރައީސް ނަޝީދު އެނބުރި އެ ޕާޓީއަށް ގެންނަވަން ތާއީދުކުރެއްވިޔަސް، އިބުރޭ އެގޮތަށް ތާއީދު ނުކުރައްވާނެކަމަށް އެބޭފުޅާވަނީ ވިދާޅުވެފައެވެ.
ރައީސް ނަޝީދު އެ ހުށަހެޅުން ހުށަހެޅުއްވީ، އެމްޑީޕީގެ ޗެއާޕާސަން ފައްޔާޒު އިސްމާއިލްއަށް މިއަދު ފޮނުއްވި މެސެޖެއްގައެވެ. ފައްޔާޒް ވަނީ އެމެސެޖު އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ފޮނުއްވާފައެެވެ.
އެ މެސެޖްގައި ރައީސް ނަޝީދު ވިދާޅުވެފައި ވަނީ އެމްޑީޕީގެ ގައުމީ މަޖިލީހުގެ 50 ތާއީދު އޮތް ނަމަ، އެމްޑީޕީއާ ގުޅެން ތައްޔާރަށް ހުންނެވި ކަމަށެވެ.
"އެމްޑީޕީގެ ގައުމީ މަޖިލީހުގެ 50 ތާއީދު އޮތް ނަމަ، އަޅުގަނޑު އެމްޑީޕީއާ ގުޅެން ތައްޔާރު" ރައީސް ނަޝީދު ވިދާޅުވިއެވެ.
އޮންލައިން ނޫހަކަށް މައުލޫމާތުދެއްވަމުން އިބުރޭ ވިދާޅުވީ ރައީސް ނަޝީދު އަލުން އެ ޕާޓީއަށް ގެންނަވަން އެބޭފުޅާ ތާއީދު ނުކުރައްވަނީ، ރިޔާސީ އިންތިޚާބު އެމްޑީޕީއަށް ގެއްލިގެން ދިޔުމުގެ މައިގަނޑު ސަބަބަކީ ރައީސް ނަޝީދާއި ދަ ޑިމޮކްރެޓްސް އިން "އިބޫ ނޫން ގޮތެއް" ހޯއްދަވަން ކުރެއްވި ކެމްޕޭނުކަމަށް ވާތީއެވެ.
"ޕީޕީއެމަށްވުރެ ބޮޑަށް އަޅުގަނޑުމެންނާ އިދިކޮޅަށް، ރައީސް ސޯލިހު ނޫން ގޮތެއް ހޯދުމަށް ކަމަށް ބުނެ، މަސައްކަތް ކުރީ ޑިމޮކްރެޓްސް އަދި ރައީސް ނަޝީދު. އެހެން އަޅުގަނޑު ނަޝީދަށް ތާއިދު ކުރަން ބޭނުން ނުވަނީ،" އިބުރޭ ވިދާޅުވިއެވެ.
ރައީސް ނަޝީދު ވަނީ އެމްޑީޕީގެ ރައީސްގެ ގޮތުގައި ހުންނެވުމަށް ފަހު އެ ޕާޓީން އިސްތިއުފާ ދެއްވައި ޑިމޮކްރެޓްސްގެ ނަމުގައި އާ ޕާޓީއެއް އުފައްދަވައިފައެވެ. އެ ޕާޓީގެ ރިޔާސީ ކެންޑިޑޭޓަކަށް ނެރުއްވި އިލްޔާސް ލަބީބަށް ރިޔާސީ އިންތިޚާބުގެ ފުރަތަމަ ބުރުގައި ލިބިވަޑައިގަތީ ތިން ވަނަ އެވެ. އިންތިޚާބުގެ ދެވަނަ ބުރުގައި އެމްޑީޕީން ރައީސް ނަޝީދު އަދި ޑިމޮކްރެޓްސްއާއިއެކު މަސައްކަތްކުރައްވަން ގިނަ މަސައްކަތްތަކެއް ކުރެއްވި ނަމަވެސް، ޑިމޮކްރެޓްސްގެ ހުށަހެޅުންތަކަށް އެދެވޭ ޖަވާބެއް ލިބިފައިނުވާކަމަށްބުނެ، އެ ޕާޓީން ވަނީ އިންތިޚާބުގެ ދެވަނަ ބުރުގައި އެއްވެސް ޕާޓީއަކާއިއެކު މަސައްކަތް ނުކުރަން ނިންމާފައެވެ.މުއިއްޒު އިންތިހާބު ކާމިޔާބުކުރެއްވީ 126,842 ވޯޓުންނެވެ. އެއީ ވޯޓްލީ މީހުންގެ 53.0 ޕަސެންޓެވެ. އެމްޑީޕީގެ ކެންޑިޑޭޓް ރައީސް ސޯލިހަށް ލިބިވަޑައިގަތީ 108,500 ވޯޓެވެ. އެއީ ވޯޓްލީ މީހުންގެ 46.1 ޕަސެންޓެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.