ކޮވިޑް ޖެހޭ މީހުންނަށް ފަރުވާ ދެމުންދާ ނަރުހުން ވަރުބަލިވެ، ބައެއް ނަރުހުންގެ ބަރުދަން ލުއިވެއްޖެ

ރާއްޖޭގައި ކޮވިޑް-19 ޖެހޭ މީހުންނަށް ފަރުވާ ދެމުންދާ ނަރުހުން ވަރުބަލިވެ، ބައެއް ނަރުހުންގެ ބަރުދަން ލުއިވެފައިވާ ކަމަށް ޑރ. ނަޒްލާ މުސްތަފާ ވިދާޅުވެއްޖެއެވެ.

Ads by Hajj Corporation

ހެލްތް އެމަޖެންސީ އޮޕަރޭޝަން ސެންޓަރުން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ނަޒްލާ މުސްތަފާ ވިދާޅުވީ ކޮވިޑަށް ފައްސިވާ މީހުން އިތުރުވަމުން ދިއުމާ އެކު، އެޑްމިޓްކޮށްގެން ފަރުވާ ދޭން ޖެހޭ މީހުންގެ އަދަދު ދުވަހެއް ދުވަހަކަށް އިތުރުވަމުންދާ ކަމަށެވެ.

އަދި މި ހާލަތުގައި އިންސާނީ ވަސީލަތްތައް ބޭނުން ކުރުމުގައި ދަތިތަކާއި ކުރިމަތިވާނެ ކަމަށާއި އެ މައްސަލަތައް މިހާރު މާލެ ސަރަހައްދުގެ ކޮވިޑަށް ފަރުވާދޭ ފެސިލިޓީތަކުގައި ދިމާވެފައިވާ ކަމަށް ޑރ. ނަޒްލާ މުސްތަފާ ވިދާޅުވި އެވެ.

އޭނާ ވިދާޅުވީ ކޮވިޑް ޖެހިގެން ހޮސްޕިޓަލްގައި އެޑްމިޓްކޮށްގެން ފަރުވާ ދެމުންދާ މީހުންގެ ކައިރީގައި އާއިލާގެ އެއްވެސް މީހަކަށް އެހީތެރިވާން ނުތިބެވޭނެ ކަމަށާއި އެހެން ކަމުން އެމީހުންނަށް ފަރުވާ ދިނުމުގެ އިތުރުން ބަލި މީހުންނަށް ދޭންޖެހޭ ހުރިހާ އަޅާލުމާއި ސާފުތާހިރުކޮށް ބަލަހައްޓަނީ ނަރުހުން ކަމަށެވެ.

"އަޅުގަނޑުމެންގެ ކެޕޭސިޓީ ވަރަށް ބޮޑަށް ފުލްވޭ. އަޅުގަނޑުމެންގެ ނަރުހުން ވަރަށް ބޮޑަށް ވަރުބަލި ވެފައިވަނީ. ބައެއް މީހުން ފަސްކިލޯ ލުއިވެއްޖެ. އޭގެ މާނައަކީ ކުރިން ހޮސްޕިޓަލްގައި އެޑްމިޓް ވެފައިވާއިރު ރިލެޓިވްއާއެކު ހޮސްޕިޓަލްގައި އެ ތިބެނީ. އެކަމު މިހާރު ގިނަ ފަަހަރަށް ދުވަސްވީ ބޭފުޅުން އެކަނި އެނދުގައި އެ ތިބެނީ. އެކަހަލަ ހާލަތުގައި ނަރުހުންނަށް ވެސް އަޅާނުލެވި ހިނގައިދާނެ،" ޑރ. ނަޒްލާ މުސްތަފާ ވިދާޅުވިއެވެ.

ޑރ. ނަޒްލާ މުސްތަފާ އިތުރަށް ވިދާޅުވީ ސިއްހީ ހިދުމަތްތެރިންނަކީ ވަރަށް ބޮޑު ރިސްކެއްގައި މަސައްކަތް ކުރަންޖެހޭ ބައެއް ކަމަށާ އެތައް ބަޔަކު ބައްޔަށް ފައްސި އަދި ބަލި މީހުންނާއި ކޮންޓެކްޓްވުމުގެ ސަބަބުން މަސައްކަތާއި ދުރުގައިވެސް ތިބެން ޖެހިފައިވާ ކަމަށެވެ.