ހާލަތު ގޯސްވެއްޖެ ނަމަ ފަރުވާ ދިނުމަށް ސްކޫލްތަކާއި ޕްރައިވެޓް ހޮސްޕިޓަލްތައްވެސް ބޭނުންކުރަން ޖެހިދާނެ!
ރާއްޖޭގައި ކޮވިޑް-19ގެ ޙާލަތު ގޯސްވެއްޖެނަމަ ބަލި މީހުން އެޑްމިޓްކުރުމަށް ސްކޫލްތަކާއި އަމިއްލަ ހޮސްޕިޓަލްތައް ބޭނުންކުރަން ފަށަން ޖެހޭނެކަމުގެ ބިރު އެބައޮތް ކަމަށް ހެލްތް އެމަޖެންސީ އޮޕަރޭޝަން ސެންޓަރުން ބުނެފިއެވެ.
އެޗްއީއޯސީން މިރޭ ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕްގެ ފަރާތުން ވާހަކަދައްކަވަމުން ޑރ. އަލީ ލަތީފް ވިދާޅުވީ ހުޅުމާލޭގައި ހުރި މެޑިކަލް ފެސިލިޓީގެވެސް 60 ޕަސެންޓު އެނދު މިހާރުވެސް ބަލިމީހުންނަށް ފަރުވާ ދިނުމަށް ބޭނުންކުރަން ފަށާފައިވާއިރު، އިތުރަށް އެނދު ޖެހުމުގެ މަސައްކަތް ވެސް ކޭސްތައް އިތުރުވާ މިންވަރަށް ބަލައި ކުރާނެ ކަމަށެވެ.
އަދި ފެސިލިޓީއަށް ނުކަތާވަރަށް މީހުން ޕޮސިޓިވްވާން ފަށައިފިނަމަ ޕްރައިވެޓް ހޮސްޕިޓަލްތަކާއި، ސްކޫލްތައްވެސް ފެސިލިޓީތަކުގެ ގޮތުގައި ބޭނުންކުރަން ފަށަން ޖެހޭނެކަމަށް އަލީ ލަތީފު ވިދާޅުވިއެވެ. ނަމަވެސް ސިއްޙީ ދާއިރާގައި މަސައްކަތްކުރާ މީހުންގެ މަދުކަމާއި، ވަސީލަތްތަކުގެ މަދުކަމަށް ބަލައި މިކަންވެސް ވާނީ ވަރަށް ބޮޑު ގޮންޖެހުމަކަށް ކަމަށް އޭނާ ވިދާޅުވިއެވެ.
"މިހާރު ދެން ޖެހޭނީ ސްކޫލް ފަދަ ތަންތަން ނަގަން. އަދި ޕްރައިވެޓް ހޮސްޕިޓަލަށް ވެސް ރިކުއެސްޓް ކުރަންޖެހޭނީ. އަދި ހުޅުމާލެ ހޮސްޕިޓަލާއި އައިޖީއެމްއެޗާއި ސްކޫލްތައް ބޭނުންކުރުމަކީ އޮތް އޮޕްޝަން." ޑރ. އަލީ ލަތީފު ވިދާޅުވިއެވެ.
