ވެހިކަލް ދުއްވުން މަނާ ވިޔަސް ފައިމަގުގައި ޑެލިވަރީ ކުރުން މަނަލެއް ނުވާނެ: ފުލުހުން
މާލޭ ސިޓީގެ މަގުމަތީގައި ރޭގަނޑު 8:00 އިން ފެށިގެން ފަތިހު 5:00 އާ ދެމެދު ވެހިކަލް ދުއްވުން މަނާ ކޮށްފައިވީ ނަމަވެސް، ކާބޯތަކެތި ޑެލިވާކުރުން އެއްކޮށް މަނާ ނުކުރާ ކަމަށް ފުލުހުން ބުނެފިއެވެ.
ރޭ ބޭއްވި ނޫސްވެރިންގެ ބައްދަލުވުމުގައި ސުޕްރިޓެންޑެންޓު އޮފް ޕޮލިސް އަބްދުﷲ ޝަރީފް ވިދާޅުވީ، ރައްކާތެރިކަމުގެ ފިޔަވަޅުތައް އަޅާފައި ވީނަމަވެސް ކެފޭ ރެސްޓޯރެންޓް ފަދަ ތަންތަނުން ޑެލިވެރީ ކުރުން މަނާ ނުކުރާ ކަމަށެވެ. އަދި އެކަމުގައި ވިޔަފާރިކުރާ ފަރާތްތަކަށް އެއްވެސް ހުރަހެއް ނެތް ކަމަށް އޭނާ ވިދާޅުވިއެވެ.
ޝަރީފް ވިދާޅުވީ ޑެލިވަރީކުރުން މަނާ ކުރަނީއެއް ނޫން ކަމަށާއި، ނަމަވެސް ވެހިކަލްތައް ދުއްވުން މަނާ ވަގުތަކަށް ވުމުން ވެހިކަލްތަކުގައި އެ މަސައްކަތެއް ނުކުރެވޭނެ ކަމަށެވެ.
"އެހެން ނަމަވެސް 9:30 އާއި ހަމައަށް ޑެލިވަރީކުރަން ބޭނުންވާ ފަރާތްތަކުން ބޭނުން ވެއްޖެކަމަށް ވަންޏާމުން ފައިމަގުގައި އެކަން ކުރެވިދާނެ. އެހެން ނަމަވެސް ދުއްވާ އެއްޗެއްގައި އެކަން ކުރާކަށް އަޅުގަނޑުމެންނަކަށް ހުއްދައެއް ނުދެވޭނެ ވެހިކަލް ދުއްވުން މަނާ ގަޑިއަކަށް ވާތީވެ"، ޝަރީފް ވިދާޅުވިއެވެ.
ކަނޑައެޅޭ ވަކި ވަގުތުތަކެއްގައި ވެހިކަލް ދުއްވުން މަނާކޮށްފައިވަނި ފާއިތުވެދިޔަ ދުވަސްތަކުގައި މާލެ ސަރަޙައްދުގައި ކޮވިޑް-19 ފެތުރޭ މިންވަރު ހިފެހެއްޓުމެއް ނެތި އިތުރުވަމުން އަންނާތީ ރައްކާތެރިކަމުގެ ގޮތުން ކަމަށް އެޗްޕީއޭއިން ވަނީ ބުނެފައެވެ.
