ދަ ޑިމޮކްރެޓްސްގެ ރައީސްކަމުގެ މަޤާމަށް ޙަސަން ލަތީފު ކުރިމަތިލައްވައިފި
ދަ ޑިމޮކްރެޓްސް ޕާޓީގެ ރައީސް ކަމުގެ މަޤާމަށް ޑިމޮކްރެޓްސްގެ އިންޓެރިމް ޗެއާޕާސަން އަދި ހެންވޭރު ހުޅަނގު ދާއިރާގެ މެންބަރު ޙަސަން ލަތީފު ކުރިމަތިލައްވައިފިއެވެ.
Ads by MWSC
އެކްސްގައި ޙަސަން ލަތީފު މިކަން އިޢުލާނުކޮށްފައިވާއިރު އެބޭފުޅާ ވަނީ ޕާޓީގެ ހުރިހާ މެންބަރުންގެ ތާއީދާއި އެހީތެރިކަން އެބޭފުޅާއަށް ދެއްވުމަށް އެދިވަޑައިގެންފައެވެ.
ދަ ޑިމޮކްރެޓްސް ޕާޓީގެ ފުރަތަމަ ދައުރުގެ މަޤާމުތަކަށް ކުރިމަތިލުމުގެ ފުރުޞަތު 15 އޮކްޓޫބަރުގައި ހުޅުވާލާފައިވާއިރު، އެ ޕާޓީގެ އަސާސީ ގަވާއިދުގައި ބަޔާންކުރާ ދާއިމީ މަގާމުފުރާތަކަށް މީހުން އިންތިޚާބުކުރުމަށް ޕާޓީގެ މެންބަރުންގެ މެދުގައި އާންމު އިންތިޚާބުތައް ބާއްވަންޖެހެއެވެ.
ޑިމޮކްރެޓްސްގެ މަޤާމުތަކަށް ކުރިމަތިލުމުގެ ފުރުޞަތު އެއް މަސް ދުވަހުގެ މުއްދަތަކަށް ހުޅުވާލާފައިވާއިރު، އެ މުއްދަތު ހަމަވާނީ އަންނަ ނޮވެންބަރު މަހުގެ 15 ވަނަ ދުވަހަށެވެ.
އެހެންކަމުން 15 ނޮވެންބަރުގެ ނިޔަލަށް އެ ޕާޓީއަށް ވަންނަ ކޮންމެ މީހަކަށްވެސް އެ މަޤާމުތަކަށް ކުރިމަތިލުމުގެ ފުރުޞަތު ހުޅުވިފައިވާކަމަށް ޑިމޮކްރެޓްސްގެ އިޢުލާނުގައި ބަޔާންކޮށްފައިވެއެވެ.
އެ ޕާޓީގެ މަޤާމުތަކަށް ކުރިމަތިލައްވާ ބޭފުޅުންނަށް ވޯޓު ލުން ކުރިއަށްގެންދަން ހަމަޖެހިފައިވަނީ 2 ޑިސެންބަރު ގައެވެ. އަދި 20 ނޮވެންބަރުގެ ނިޔަލަށް އެ ޕާޓީއަށް ވަނުމަށް ފޯމު ހުށަހަޅާ، ޕާޓީ ދަފްތަރުގައި ޖެހޭ މީހުންނަށް އިންތިޚާބުގައި ވޯޓު ލުމުގެ ހައްޤު ލިބިގެންދާނެކަމަށްވެސް ޑިމޮކްރެޓްސްއިން ބުނެފައިވެއެވެ.
ޑިމޮކްރެޓްސް ޕާޓީގެ އެތެރޭގެ އިންތިޚާބުތަކާއި ގުޅޭ މައުލޫމާތު އެ ޕާޓީގެ ވެބްސައިޓުން މިހާރު ލިބެން އެބަހުއްޓެވެ.
Ads by HDC
