ފްރަންޓްލައިންގައި މަސައްކަތް ކުރާ ސިއްހީ ދާއިރާގެ 121 މީހަކު މިހާތަނަށް ކޮވިޑަށް ފައްސިވެފައިވޭ
ކޮވިޑް-19އާ ގުޅިގެން ފްރަންޓް ލައިންގައި މަސައްކަތް ކުރާ ސިއްހީ ދާއިރާގެ 121 މީހަކު މިހާތަނަށް ކޮވިޑަށް ފައްސިވެފައިވާ ޑރ. މޫސާ މުރާދު ވިދާޅުވެއްޖެއެވެ.
ހެލްތު އިމަޖަންސީ އޮޕަރޭޝަން ސެންޓަރުން މިރޭ ބޭއްވި ނޫސްވެރިންގެ ބައްދަލުވުމުގައި ޑރ. މުރާދު ވިދާޅުވީ މިހާރު 121 ސިއްހީ ހިދުމަތްތެރިއަކު ކޮވިޑަށް ފައްސިވެފަވާއިރު އެ އެ މަސައްކަތަށް އިތުރު ބަޔަކު ނެރެެން ޖެހިފައިވާ ކަމަށެވެ.
ޑރ. މުރާދު ވިދާޅުވީ ބަލިވާ މީހުން ބައިތިއްބަން ފެސިލިޓީތައް ހެދުމާއި އެތަންތަނުގައި ބަހައްޓާނެ ސާމާނު ވެސް ހޯދިފައިވާ ކަމަށެވެ. އެކަމަކު އިންސާނީ ވަސީލަތްތަކަކީ މާ މުހިއްމު ކަމެއްކަން ފާހަގަކުރައްވާ ވިދާޅުވީ އެނދެއް ހުއްޓަސް ފަރުވާދޭނެ މީހަކު ނެތްނަމަ އެކަމުގެ ފައިދާއެއް ނުކުރާނެ ކަމަށެވެ.
"އެއްދުވަހުން އަނެއް ދުވަހަށް ކޭސްތައް އިތުރުވަމުންދާއިރު، ގިނަ ބަޔަކު ފެސިލިޓީތަކުގައި އެޑްމިޓް ވަމުން މިދަނީ. މިހެން އެޑްމިޓުވަމުން ދާއިރުގައި، އެތަންތަނުގައި ހިދުމަތް ދޭން ތިބި މީހުންނަށް ވަރަށް ބޮޑު ޗެލެންޖަކަށް ވެގެން އެބަދޭ ގިނަ ބަލި މީހުންތަކެއް ބަލަން ޖެހުމުގެ ސަބަބުން،" ޑރ. ވިދާޅުވިއެވެ.
ޑރ. މުރާދު އިތުރަށް ވިދާޅުވީ ކޮވިޑް ޖެހިފައިތިބޭ މީހުން ކައިރިއަށް ޑޮކްޓަރުންނާއި ނަރުހުން ދާއިރު ވަކި ކަހަލަ ކަންތައްތަކެއް ފުރިހަމަކުރަން ޖެހޭ ކަމަށާއި އެގޮތުން މަސައްކަތް ކުރަން ޖެހެނީ ޕީޕީއީ އަޅައިގެން ކަމަށެވެ. އެހެންކަމުން ސިއްހީ އެހީތެރިންނަށްވެސް އެ އެއްޗެހި ލައިގެން ތިބެ ހިދުމަތް ދޭން ވަރަށް އުނދަގޫ ކަމަށް ޑރ މުރާދު ވިދާޅުވިއެވެ.
