ޤާނޫނާ ޚިލާފަށް ލިޔެކިޔުން ނައްތާލައިފިނަމަ ފިޔަވަޅު އަޅާނަން: ޕީސީބީ
ސަރުކާރުގެ އެއްވެސް ކުންފުންޏަކުން ޤާނޫނާ ޚިލާފަށް ލިޔެކިޔުން ނައްތާލާފިނަމަ، އެކަމަށް އަޅަން ޖެހޭ ފިޔަވަޅު އެޅުމަށް ފަސްނުޖެހޭނެކަމަށް ޕްރައިވަޓައިޒޭޝަން އެންޑް ކޯޕަރޭޝަން ބޯޑު (ޕީސީީބީ) އިން އިންޒާރުދީފިއެވެ.
އެ ކުންފުނިން މިހެން ބުނެފައިވަނީ ދާދިފަހުން ފެންމަތިވި ފިއުލް ސަޕްލައި މޯލްޑިވްސް (އެފްއެސްއެމް) ގެ ލިޔުންތަކެއް ތިލަފުށީގައި ނައްތާލަމުންދާ މަންޒަރު ފެންނަ ވީޑިއޯއެއް ޢާންމުވުމާއި ގުޅިގެންނެވެ. މި މައްސަލައާ ގުޅިގެން ގިނަ އަދަދެއްގެ މަޖިލީސް މެންބަރުންނާއި ޢާންމު ރައްޔިތުން ވަނީ ކަންބޮޑުވުން ފާޅުކޮށްފައެވެ. އެންޓި ކޮރަޕްޝަން ކޮމިޝަން (އޭސީސީ) އިންވެސް ވަނީ ސަރުކާރުގެ ބައެއް އިދާރާތަކާއި ކުންފުނިތަކުގެ ލިޔެކިޔުންތައް ނައްތާލަމުންދާކަމުގެ މައުލޫމާތު ލިބިފައިވާކަމަށް ބުނެ އެކަން ހުއްޓުވައިދިނުމަށް އެދި ޕީސީބީގައި އެދިފައެވެ.
މިކަމާ ގުޅިގެން ޕީސީބީން ނެރުނު ބަޔާނެއްގައި ބުނެފައިވަނީ ޢާންމު ފަރާތްތަކުންނާއި އޭސީސީންވެސް އެ މައްސަލަ ބަލައިދިނުމަށް އެދި ހުށަހަޅާފައިވާތީ، އެ މައްސަލަ މިހާރު ބަލަމުން އަންނަކަމަށާއި އަދި އެކަމާ ގުޅޭ މަޢުލޫމާތު ފޯރުކޮށްދެމުން އަންނަކަމަށެވެ.
ޕީސީބީން ވަނީ ސަރުކާރުގެ އެއްވެސް ކުންފުންޏެއްގެ ނުވަނަ ވުޒާރާއަކުން ޤާނޫނާ ޚިލާފަށް އެއްވެސް ލިޔެކިޔުމެއް ނައްތާނުލުމަށް އެދިފައެވެ. އަދި ނައްތާލަން ޖެހިއްޖެނަމަވެސް، ޤާނޫނާ އެއްގޮތްވާގޮތުގެ މަތިން އެކަންކުރުމަށް މުއައްސަސާތަކުގެ ވެރިން ކަށަވަރުކުރުމަށްވެސް ޕީސީބީން އެދިފައިވެއެވެ.
"...ޙަވާލާދީފައިވާ ޤާނޫނުގެ ދަށުން ހަދާފައިވާ ޤަވާއިދާ ޚިލާފަށް އެއްވެސް ކުންފުންޏަކުން އެ ޤަވާއިދުގައި ބަޔާން ކޮށްފައިވާ ފަދަ ރަސްމީ އެއްވެސް އެއްޗެއް ނައްތާލާކަމުގެ މައުލޫމާތެއް ނުވަތަ ނައްތާލައިފިކަމުގެ މައުލޫމާތެއް ލިބިއްޖެނަމަ އެފަދަ ފަރާތްތަކާ މެދު އަޅަން ޖެހޭ ޤާނޫނީ ފިޔަވަޅު އަޅަމުން ގެންދާނަން" ޕީސީބީން ބުނެފައިވެއެވެ.
ނައްތާލިކަމަށް ވީޑިއޯގައި ފެންނަ ލިޔުންތަކަކީ ބާވެ، ގިނަ ދުވަސްވެފައިވާ ލިޔުންތަކެއްކަމަށް އެފްއެސްއެމް އިން ވަނީ ބުނެފައެވެ.
މިކަމާ ގުޅޭގޮތުން ޤައުމީ އަރުޝީފުން ބުނީ އެފްއެސްއެމް އިން ލިޔުންތައް ނައްތާލާފައިވަނީ ޤާނޫނާ ޚިލާފަށްކަމަށާއި މިކަން ދިވެހި ފުލުހުންގެ ޚިދުމަތަށް ހުށަހަޅާނެކަމަށެވެ.
