ކަނޑުމަތީ މުޒާހަރާ ބާއްވާތީ އިދިކޮޅު ލީޑަޝިޕް ފުލުހަށް ހާޒިރުވާން އަންގައިފި
އިދިކޮޅު ޕްރޮގްރެސިވް ކޯލިޝަނުން ކ. މާފުށި ބޭރުން ކަނޑުމަތީ މުޒާހަރާއެއް ކުރުމަށް ނިންމާފައިވާތީ އިދިކޮޅުގެ އިސް ބޭފުޅުން ފުލުހަށް ހާޒިރުވާން އަންގައިފި އެވެ.
މާފުށި ބޭރުން ކަނޑުމަތީގައި މުޒާހަރާއެއް ކުރަން އިދިކޮޅުން ހަމަޖެއްސީ މާފުށީ ޖަލުގައި އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން ބަންދު ކޮށްފައި ހުންނެވުމުން އެކަމާ ދެކޮޅު ހެދުމުގެ ގޮތުންނެވެ. އޭގެ އިތުރުން ރާއްޖޭގެ ހަރުމުދާ ވިއްކުމާއި ވައްކަމާއި ކޮރަޕްޝަނާ ދެކޮޅަަށް ވެސް އަޑުއުފުލާނެ އެވެ.
ޕްރޮގްރެސިވް ކޯލިޝަނުން ބުނީ އެ ކޯލިޝަނުން މާދަމާ މާލެ އަތޮޅު މާފުށީ ބޭރުގައި ކުރިއަށް ގެންދިއުމަށް ހަމަޖެހިފައިވާ ކަނޑުމަތީގެ އިހްތިޖާޖާއި ގުޅިގެން ލީޑާޝިޕްގެ ބޭފުޅުން މާދަމާ 10:00 އަށް ފުލުހުން ހާޒިރުވާން އަންގާފައިވާ ކަމަށެވެ.
މާފުށީ ކައިރީ ކަނޑުމަތީ ކުރިއަށް ގެންދަން ރާވާފައިވާ އިހްތިޖާޖްގައި ޕީޕީއެމް އާއި ޕީއެންސީގެ އިސްވެރިންނާއި މާލެ އަތޮޅުގެ ރަށްރަށުގެ ގިނަ ރައްޔިތުން ވެސް ބައިވެރިވާން ނިންމާފައިވާ ކަމަށް އެ ކޯލިޝަނުން ބުނެފައި ވެއެވެ.
އެގޮތުން އެ ކޯލިޝަނުން ބުނެފައި ވަނީ ރައީސް ޔާމީން މިނިވަން ކުރުމަށް ގޮވާލައި އޮގަސްޓް 25، 2020 ވަނަ ދުވަހު މާފުއްޓަށް ކުރުމަށް ހަމަޖެހިފައިވާ ދަތުރުގައި ބައިވެރިވާން ބޭނުންވާ ފަރާތްތަކުން މާދަމާ މެންދުރު 12:30 އަށް ހުޅުމާލެ އެމްޓީސީސީ އެކްސްޕްރެސް ޖެޓީއަށް ދިއުމަށް އެދޭ ކަމަށެވެ.
އަންނަ ހުކުރު ދުވަހު މާލެ ފިޔަވައި ރާއްޖޭގެ އެހެން ހުރިހާ ރަށެއްގައި ސަރުކާރާއި ދެކޮޅަށް މުޒާހަރާ ކުރާނެ ކަމަށް ވެސް ޕީޕީއެމް އިން ވަނީ ބުނެފައެވެ. އެ މުޒާހަރާ ކުރިއަށް ދާނީ ހުކުރު ދުވަހު ހަވީރު 16:00 އިން އިރު އޮއްސި 18:00 އަށެވެ. އެ މުޒާހަރާ ބާއްވަނީ "ރާއްޖެ ވިއްކާލުމާ ދެކޮޅަށް" މި ނަމުގަ އެވެ.
