ޑައިވް ޑެސްކުގެ ކުނިނެގުމުގެ ހަރަކާތުގައި ގާތްގަނޑަކަށް 1.4 ޓަނުގެ ކުނި ނަގާފައިވޭ
ޑައިވް ޑެސްކުން އިސްނަގައިގެން އިއްޔެ ބޭއްވި ކުނި ނެގުމުގެ ހަރަކާތުގެ ތެރެއިން ގާތްގަނޑަކަށް 1.4 ޓަނުގެ ކުނި ނަގައިފިއެވެ.
ޑައިވް ޑެސްކުން ކުރިއަށް ގެންދިޔަ އެ ހަރަކާތުގެ ޕާޓްނަރުންނަކީ މެރިން ޕޮލިސް، ވެމްކޯ، ސިޓީ ކައުންސިލް އަދި ދިވެހި ރެޑް ކްރެސެންޓްއެވެ.
މިކަން ހާމަކޮށް ސްކޫބާ ޑައިވިން ތަމްރީނުތައް ކުރިއަށް ގެންދާ ޑައިވް ޑެސްކުން ބުނީ އިއްޔެގެ ކުނި ނެގުމުގެ ހަރަކާތް ކުރިއަށްގެންދިޔައީ، އިއްޔެ ހެނދުނު 6:00 އިން 9:00 ޖެހުމާ ހަމައަށް މަސްވެރިންގެ ޕާކުގައި ކަމަށެވެ.
ސާފުކުރުމަކީ ކަނޑުގެ ދިރުންތައް ރައްކާތެރި ކުރުމަށާއި ކަނޑުތަކާއި ފަރުތަށް ސާފުކޮށް ބެހެއްޓުމަށް މުހިންމު ކަމެއް ކަމަށް ޑައިވް ޑެސްކުން ވަނީ ފާހަގަކޮށްފައެވެ. އިއްޔެގެ ހަރަކާތުގައި ޑައިވް ޑެސްކުން ނެގި ކުނި ހަވާލުކޮށްފައި ވަނީ ވެމްކޯއެވެ.
މި ހަރަކާތުގެ ޕާޓްނަރެއް ކަމަށްވާ ރެޑް ކްރެސެންޓުން ބުނީ ފަންސާހަށް ވުރެ ގިނަ ވޮލިންޓިއާސް މި ހަރަކާތުގައި ބައިވެރިވިއިރު އޭގެ ތެރޭގައި، ޑައިވަރުންނާއި ސިޓީ ކައުންސިލާއި ވެމްކޯގެ މުވައްޒަފުން ހިމެނޭ ކަމަށެވެ.
ހަމަ އެހެންމެ އަންނަ އަހަރުން ފެށިގެން މި ހަރަކާތް އަހަރަކު ހަތަރު ފަހަރަށް މާލޭ ސަރަހައްދުގައި ކުރިއަށް ގެންދަން ނިންމާފައިވާ ކަމަށް ރެޑް ކްރެސެންޓުން ބުނެފައި ވެއެވެ.
Ads by STO
