ފަލަސްޠީނުގެ މައްސަލައަކީ އަޅުގަނޑުމެންގެ ލެއާއި ހިތުގެ ވިންދާ ގުޅިފައިވާ މައްސަލައެއް: ޑރ. އަޙްމަދު ޒާހިރު
ފަލަސްޠީނުގެ މައްސަލައަކީ އަޅުގަނޑުމެންގެ ލެއާއި ހިތުގެ ވިންދާ ގުޅިފައިވާ މައްސަލައެއް ކަމަށް މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ ވިދާޅުވެއްޖެއެވެ.
ޑރ. ޒާހިރު މިހެން ވިދާޅުވީ މިނިސްޓްރީ އޮފް އިސްލާމިކް އެފެއާޒާއި ފުވައްމުލައް ސިޓީކައުންސިލް ގުޅިގެން ފަލަސްޠީނާ ގުޅޭ ގޮތުން ބޭއްވި "ފަލަސްޠީން ފޯރަމް" ގައި ވާހަކަ ދައްކަވަމުންނެވެ.
މި ފޯރަމް ބާއްވާފައި ވަނީ ޒިކުރާ އިންޓަރނޭޝަނަލް ކޮލެޖާއި އިސްރާ އެސޯސިއޭޝަން އަދި ގާޑިއަން އެސޯސިއޭޝަންގެ އެހީތެރިކަމާއެކުއެވެ.
އެގޮތުން މި ފޯރަމްގައި ވާހަކަ ދައްކަވަމުން ޑރ. ޒާހިރު ވިދާޅުވީ ފަލަސްޠީނުގެ ރައްޔިތުންގެ ކެކުޅުމާއި ތަކުލީފުތައް ތަޙައްމަލް ކުރަންޖެހޭނީ ހަމައެކަނި އެ ޤައުމުގައި ދިރިއުޅޭ ރައްޔިތުން އެކަނި ނޫން ކަމަށާއި، މުޅި އިސްލާމީ އުންމަތަށް އެ ވޭނާއި ކެކުޅުން އިޙްސާސްވާންޖެހޭ ކަމަށެވެ.
ފަލަސްޠީނުގެ މައްސަލައަކީ އަޅުގަނޑުމެންގެ ލެއާއި ހިތުގެ ވިންދާ ގުޅިފައިވާ މައްސަލައެއް ކަމަށާއި އެތަން މިނިވަން ނުވާހާ ހިނދަކު އަޅުގަނޑުމެން އަބަދުވެސް އެކަމުގެ ދެރަ ނިކަމެތިކަން އިހްސާސް ކުރަން ޖެހޭނެ ކަމަށް ޑރ. ޒާހިރު ވިދާޅުވިއެވެ.
ފަލަސްޠީނުގެ ރައްޔިތުން އެ ވޭނާއި ކެކުޅުމުގައި ދިރިއުޅެމުންދާތާ 70 އެތައް އަހަރެއް ވެއްޖެކަމާއި މިހާރު ލިބެމުންދާ އަނިޔާތައް އެތައް ގުނައެއް ބޮޑުވެފައިވާ ޑރ. ޒާހިރު ވަނީ ފާހަގަކުރައްވައިފައެވެ.
މިގޮތުން ނިދައިފިނަމަ ހޭލެވޭނެ ކަމުގެ ޔަޤީންކަމެއްނެތްއިރު، ގެއިން ބޭރަށް ނުކުމެއްޖެނަމަ ބޮން އަޅައި މަރާ ނުލާނެ ކަމުގެ އެއްވެސް ޔަޤީން ކަމެއް އެ ޤައުމުގެ ރައްޔިތުންނަށް ނެތްކަމަށް ޑރ. ޒާހިރު ވަނީ ވިދާޅުވެފައެވެ.
އެއްވެސް ރަޙްމެއް ނެތި ޔަހޫދީން އެދަނީ އެތަކެއް އަހަރުތަކެއް ވަންދެން ލާއިންސާނީ ޢަމަލުތައް ހިންގަމުން ކަމަށާއި އެހެންނަމަވެސް އިންސާނީ ޙައްޤުތަކަށް މަސައްކަތްކުރާ މީހުން ތިބީ މިއަދު ލޯ މަރާލައިގެން ބީރުކަންފަތެއް ދީގެން ކަމަށް ޑރ. ޒާހިރު ވިދާޅުވިއެވެ.
މީގެ އިތުރުން ފަލަސްޠީނުގެ ރައްޔިތުން މިއަދު އެދެނީ އެމީހުންނަށް ހެޔޮދުޢާކޮށްލާނެ އަދި އެމީހުންނަށް އެހީތެރިކަމުގެ އަތެއް ދިއްކޮށްލާނެ ފަރާތެއް ކަމަށްވެސް މިނިސްޓަރު ވިދާޅުވިއެވެ.
އެހެންކަމުން މިއަދު ފަލަސްޠީނުގެ ރައްޔިތުންނަށް ވެވެން އޮތް އެހީއެއްވެދީ، ހެޔޮދުޢާކުރުމަކީ އަޅުގަނޑުމެންގެ މައްޗަށް ވާޖިބެއްކަމަށް މިނިސްޓަރު ވިދާޅުވިއެވެ. އަދި އަޅުގަނޑުމެންގެ އަޑު އުފުލައި، ފަލަސްޠީނާއިއެކު ތިބިކަން ހާމަކޮށްދިނުމަކީ މުޅި ދުނިޔެއަށްވެސް ދެވޭ ވަރަށް މުހިންމު މެސެޖެއް ކަމަށް މިނިސްޓަރު ޒާހިރު ވިދާޅުވިއެވެ.
މި ފޯރަމްގައި މިނިސްޓްރީ އޮފް އިސްލާމިކް އެފެއާޒްގެ ސްޓޭޓް މިނިސްޓަރ އަލްއުސްތާޛް މުޙައްމަދު އަނީލް ދެއްކެވި ވާހަކަފުޅުގައި ދުނިޔޭގެ މައްޗަށް ޔަހޫދީން ކޮންޓްރޯލް ކުރަމުންދާ ގޮތްތަކަށް ބައްލަވައި، އެމީހުންގެ ނުފޫޒު ދުނިޔޭގެ މައްޗަށް ފޯރުވަމުންދާ ގޮތް ވަރަށް ތަފްސީލުކޮށް ކިޔައިދެއްވިއެވެ.
ޔަހޫދީންގެ އަނިޔާވެރިކަމާއި ނުބައިކަމާއި ދޮގުވެރިކަމާއި ފަސާދަވެރިކަން ވަރަށް ތަފްސީލުކޮށް ޤުރުއާނުގައި ބަޔާންވެގެންވާކަން ފާހަގަކުރައްވައި، ޤުރުއާނުން މިސާލުދެއްކެވިއެވެ.
ފަލަސްޠީނަކީ ކޮބައިކަން ދިރާސާކޮށް މިއަދުގެ ޖީލަށް ފަލަސްޠީން އަޅުގަނޑުމެންނަށް މުހިންމު ވަނީ ކީއްވެގެން ކަމާއި، ފަލަސްޠީނަކީ ކޮބައިކަން އުނގަންނައިދީ އޮޅުންފިލުވައިދޭން ޖެހޭ ކަމަށް އަނިލް ވިދާޅުވިއެވެ. އަދި ވީވަރަކުން އަޅުގަނޑުމެން ފަލަސްޠީނާއިއެކު ތިބިކަން މުޅި ދުނިޔެއަށް އަންގައިދިނުމުގައި ދެމި ތިބުމަށް ވިދާޅުވިއެވެ.
މި ފޯރަމްގައި ޒިކްރާ ކޮލެޖްގެ ޕްރިންސިޕަލް އައްޝައިޚް އިބްރާހީމް ޝަމީމް ވަނީ ވަރަށް ތަފްސީލުކޮށް ފަލަސްޠީނުގެ ތާރީޚަށް ބައްލަވައި، މި މަޢުލޫމާތުތައް ޅަ ދަރިންނަށް އުނގަންނައިދިނުމުގެ މުހިންމުކަން ފާހަގަކުރައްވާފައެވެ.
Ads by STO
