މި ސަރުކާރުގެ ވެރިން ބާރުގައި ދެމިތިބެން ކޮށްފައިވަނީ ކުރަން ހެޔޮވާވަރު ކަންކަމެއް ނޫން: ނިމާލު

ރައީސް އިބްރާހީމް މުޙައްމަދު ޞާލިޙުގެ މި ނިމިގެންދާ ސަރުކާރުން، ބާރުގައި ދެމި ތިބުމަށް ކޮށްފައިވަނީ، ކުރަން ހެޔޮވާވަރު ކަންކަމެއް ނޫން ކަމަށް ފެނަކައިގެ ކުރީގެ މެނޭޖިން ޑިރެކްޓަރު މުޙައްމަދު ނިމާލު ވިދާޅުވެއްޖެއެވެ.

Ads by STELCO

ނިމާލު މިހެން ވިދާޅުވެފައި ވަނީ، ސަންގު ޓީވީން ގެނެސްދޭ "2023ގެ ރައީސް" ޕްރޮގްރާމްގައި ވާހަކަ ދައްކަވަމުންނެވެ. އޭނާ ވިދާޅުވީ އިންތިޤާލީ ކޮމިޓީތަކުގެ ބައެއް ރިޕޯޓުތައް އޭނާއަށް ފެނިވަޑައިގެންފައިވާ ކަމަށާއި، ފެނިގެން ދިޔައީ ފިތްކަނޑައިގެންދާ ވަރުގެ މަންޒަރުތަކެއް ކަމަށެވެ.

"މިއީ އަމިއްލަ ފަރުދެއްގެ ވިޔަފާރިއެއް ނޫން، މިއީ މުޅި ޤައުމުގެ އާބާދީ، މުޅި ޤައުމުގެ ހުރިހައި ރައްޔިތުންނަށް އެކަމުގެ ސަބަބުން އަސަރު ކުރާނެ ކަންތައްތައް. އެހެންވީމަ، ވެރިކަމުގައި ދެމިތިބުމަށްޓަކާ، ދަޢުލަތުގެ މާލިއްޔަތުން އިންތިހާއަށް، ނޫނިއްޔާމު، ނުކިއްސަރު އެތައް ބައިވަރު ކަންތައްތަކެއް ކުރުމުގެ ސަބަބުން، މިއޮތީ މުޅި ތަންތަން، އިންސްޓިޓިއުޝަންތައް، މުއައްސަސާތައް މިއޮތީ ހަމަ ފުނޑުފުނޑުވެފައި." ނިމާލު ވިދާޅުވިއެވެ.

ނިމާލު ވަނީ ކުރީ ސަރުކާރުގެ ޢަމަލުތަކުގެ ސަބަބުން ދިމާވާ ގޮންޖެހުންތަކުން އަރައިގަތުމަށްޓަކައި، ކިހައި މުއްދަތެއް ނަގައިފާނެ ކަމާއިމެދު އޮތް ކަންބޮޑުވުން ވަރަށް ބޮޑު ކަމަށެވެ.

"10 އަހަރަށް މި ވެރިކަން ދެމިގެން ދިޔަނަމަ، އަސްލު ޙަޤީޤަތުގައި، އަޅުގަނޑުމެންނަށް ރާއްޖެ އަނބުރާ ނުހޯދޭ ވަރަށް މިކަންތައްތައް ދިޔައީސް. މިއީކީ ޙަޤީޤަތުގައި، ކަންކަން ކުރަންވާނެ ގޮތެއް ނޫން." އޭނާ އިތުރަށް ވިދާޅުވިއެވެ.

ނިމާލު އިތުރަށް ވިދާޅުވީ އިންތިޤާލީ ކޮމިޓީތަކަށް މިހާރު ފެންނާނީ މި ސަރުކާރުން ދައްކާ މަންޒަރެއް ކަމަށާއި، އަސްލު ޙަޤީޤީ މަންޒަރު ފެނިގެންދާނީ އިންތިޚާބީ ރައީސް ޑރ.މުޙައްމަދު މުޢިއްޒު ހުވާ ކުރެއްވުމުން ކަމަށެވެ.