ރިޔާސީ އިންތިޚާބުގައި ރައްޔިތުން ނިންމީ، މިނިވަންކަމާއި ގުޅޭ ވޯޓެއް: ޠާރިގް

މި ފަހަރުގެ ރިޔާސީ އިންތިޚާބުގައި ދިވެހި ރައްޔިތުން ނިންމީ މިނިވަންކަމާއި ގުޅޭ ވޯޓެއް ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަޙްމަދު ޠާރިޤް ވިދާޅުވެއްޖެއެވެ.
ޕީޕީއެމް/ޕީއެންސީގެ ކޯލިޝަނުން އައްޑޫ ސިޓީއަށް ކުރައްވަމުން ގެންދަވާ ދަތުރުފުޅުގައި ހިތަދޫގައި މިއަދު ހަވީރު ބޭއްވި ޖަލްސާގައި ޠާރިޤް ވިދާޅުވީ އިދިކޮޅުގައި ތިބެ، ޕީޕީއެމް/ޕީއެންސީން އޭރު ދައްކަމުން ދިޔައީ އަވަށްޓެރި ޤައުމެއްގެ ނުފޫޒު ރާއްޖެއަށް އޮތް މިންވަރުގެ ވާހަކަ ކަމަށާއި، 2011 ވަނަ އަހަރު އެ ޤައުމުން ހަދިޔާ ކުރި ހެލިކޮޕްޓަރު ދުއްވަން ގެނައި 25 ސިފައިންގެ އަދަދު 75 އަށް އިތުރުވެގެން ދިޔަ ކަމަށެވެ.
އޭނާގެ ވާހަކައިގައި ރާއްޖޭގެ ކަނޑުން ބައެއް މޮރިޝަސްއަށް ދޫކޮށްލި މައްސަލައިގައި ވެސް ކަންބޮޑުވުންފާޅުކުރެއްވިއެވެ.
"ރާއްޖޭގެ ޤާނޫނުގައި ފާޅުގައި އެ އޮތީ ބުނެފަ، ރާއްޖޭގެ ކަނޑުގެ ސަރަހައްދާއި ރާއްޖޭގެ ސަރަހައްދެއް ދޫކޮށްލެވޭނީ މަޖިލީހުގެ ތިންބައި ކުޅަ ދެބައިން ފާސް ކުރާ ޤާނޫނެއްގެ ދަށުންނޭ." އޭނާ ވިދާޅުވިއެވެ.އޭނާ އިތުރަށް ވިދާޅުވީ މި ސަރުކާރުން ރާއްޖޭގެ ކަނޑުން ބައެއް ދޫކޮށްލަން ނިންމީ ރައްޔިތުންގެ ކައިރީގައި އަހައިވެސް ނުލާ ކަމަށާއި، އެކަމާއި ގުޅޭ ސިޓީއެއް ފޮނުވުމުން ޖަވާބުވެސް ނުދޭ ކަމަށެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.