އިދިކޮޅުން މާފުށި ބޭރުން ކަނޑުމަތީގައި މުޒާހަރާ ކޮށްފި
އިދިކޮޅު ޕީޕީއެމް/ޕީއެންސީ ކޯލިޝަނުން ކ. މާފުށި ބޭރުން ކަނޑުމަތީ މުޒާހަރާ ކޮށްފިއެވެ.
މި މުޒާހަރާގައި އިދިކޮޅު ކޯލިޝަނުގެ އިސްވެރިން ބައިވެރިވިއިރު، އެ ފަރާތްތަކުން ވަނީ މާފުށި ފަޅުތެރެއަށް ވަންނަން މަސައްކަތް ކޮށްފައެވެ. ނަމަވެސް ފުލުހުން ވަނީ މަސްލަހަތަށް ބަލައި އެކަން ނުކުރެވޭނެކަން އިދިކޮޅު ފަރާތްތަކަށް އަންގާފައެވެ.
އެއާއެކު އިދިކޮޅު ކޯލިޝަނުގެ ބޭފުޅުން ވަނީ މާފުށި ބޭރުގައި ތިބެ ސަޕޯޓަރުންނާއި މުހާތަބުކޮށްފައެވެ.
މި މުޒާހަރާގައި ކ އަތޮޅުގެ ރައްޔިތުންވެސް ވަނީ ބައިވެރިވެފައެވެ. އެ ގޮތުން އެކި ރަށްރަށުން ލޯންޗު ފަހަރުގައި މީހުން އައިސް މުޒާހަރާގައި ބައިވެރިވެފައި ވެއެވެ. އަދި މާފުށީ ބަނދަރުމަތީގައި އެ ރަށުގެ ބައެއް ޒުވާނުން ވަނީ މުޒާހަރާގައި ބައިވެރިވެފައި ވެއެވެ.
އިދިކޮޅުން ކަނޑުމަތީގައި މުޒާހަރާ ކޮށްފައިވަނީ ކުރީގެ ރައީސް އަބްދުﷲ ޔާމީން މިނިވަން ކުރުމަށާއި، ރާއްޖޭގެ ހަރުމުދާ ސަރުކާރުން ވިއްކާލުމާއި އަދި ސަރުކާރުގެ ކޮރަޕްޝަންތަކާ ދެކޮޅު ހެދުމުގެ ގޮތުންނެވެ.
އިދިކޮޅުން ކަނޑުމަތީގައި މުޒާހަރާކޮށްފައިވާއިރު އަންނަ ހުކުރު ދުވަހު މާލެ ފިޔަވައި އެހެން ރަށްރަށުގައި ސަރުކާރާ ދެކޮޅަށް މުޒާހަރާ ކުރުމަށް ވެސް ވަނީ ނިންމާފައެވެ. އެ މުޒާހަރާ ކުރަނީ ރާއްޖެ ވިއްކާލުމާ ދެކޮޅަށެވެ.
އެ މުޒާހަރާ ކުރިއަށް ދާނީ ހުކުރު ދުވަހު ހަވީރު 4:00 އިން އިރު އޮއްސި 6:00 އަށް ކަމަށް ވެސް އިދިކޮޅުން ބުނެއެވެ.
ކިޔަން އެގޭ ގޮޮތައް ލިޔެ ބަލަ