ޑރ. މުޢިއްޒު ހުވާ ކުރައްވާ ރަސްމިއްޔާތުގައި ރައީސް ނަޝީދުގެ މައްސަލަ އެޖެންޑާކުރަންޖެހޭނެ: އެމްޑީޕީ
އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ހުވާކުރެއްވުމުގެ ރަސްމިއްޔާތުގައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ އެޖެންޑާ ކުރަންޖެހޭކަމަށް އެމްޑީޕީން ވިދާޅުވެއްޖެއެވެ.
މިއަދު ސުޕްރީމް ކޯޓުގައި އޮތް ދުސްތޫރީ މައްސަލައިގެ އަޑުއެހުމުގައި އެމްޑީޕީގެ ވަކީލު އަހުމަދު އަބްދުﷲ އަފީފު ވިދާޅުވީ، އިންތިހާބީ ރައީސް ހުވާކުރައްވަން ބާއްވާ ޖަލްސާއަކީ މަޖިލީހުގެ ޖަލްސާއަކުން ކުރާކަމެއް ކަމަށާއި އެހެންކަމުން އެ ޖަލްސާގެ އެޖެންޑާގެ އެންމެ ކުރީގައި އިތުބާރު ނެތް ކަމުގެ މައްސަލަ ހިމަނަން ޖެހޭނެ ކަމަށެވެ.
"ޖަލްސާ ބޭއްވިދާނެ، އެހެން ނަމަވެސް އެ ޖަލްސާގައި ވެސް އެެޖެންޑާ ނަމްބަރު އެކަކަށް ވާން ޖެހޭނީ ރައްޔިތުންގެ މަޖިލީހުގެ ރައީސް ވަކިކުރުމަށް މިހާރު ހުށަހަޅާފައިވާ ގަރާރާ މެދު ގޮތެއް ނިންމުން. އެއީ ރައްޔިތުންގެ މަޖިލީހުގެ ޖަލްސާއެއް. ޖަލްސާގައި ކަންކަން ވެސް ކުރެވޭނެ" އަޙްމަދު ވިދާޅުވިއެވެ.
ސުޕްރީމް ކޯޓުގައި އިއްޔެ އޮތް އަޑުއެހުމުގައި ދައުލަތުން ވިދާޅުވެފައިވަނީ ރައީސް ނަޝީދުގެ މައްސަލަ ކުރިއަށް ނުގެންދެވުނު ނަމަވެސް، އައު ރައީސް ހުވާކުރައްވަން ޤާނޫނީ ހުރަހެއް ކުރިމަތިނުވާނެކަމަށެވެ. އެހެންނަމަވެސް އެމްޑީޕީން ޤަބޫލޫކުރާ ގޮތުގައި އެކަމުގައި ޤާނޫނީ ހުރަސްތައް އެބަހުއްޓެވެ.
"އެއީ ރައްޔިތުންގެ މަޖިލީހުގެ ޖަލްސާއެއް. ޖަލްސާގެ ކަންކަން ވެސް ކުރެވޭނެ. އެކަމަކު މަޖިލީހުގެ ގަވައިދުގައި މި ބުނަނީ މަޖިލީހުގައި ކުރަންޖެހޭ ކަންކަން ކުރަން ޖެހޭނީ މި ކަންކަން ކޮށް ނިންމާފައޭ،" އަހުމަދު ވިދާޅުވިއެވެ.
އެމްޑީޕީގެ ފަރާތުން ރައީސް ނަޝީދުގެ މައްސަލަ ސުޕްރީމް ކޯޓަށް ހުށަހަޅާފައިވަނީ، ރައީސް ނަޝީދުގެ އިތުބާރު ނެތްކަމުގެ މައްސަލަ ބާއްވަން އެޖެންޑާ ކުރި ދުވަހު މަޖިލީހުގެ ނައިބު ރައީސް އީވާ އަބްދުﷲ ސަލާމުގައި ހުންނެވުމުން އެ ޖަލްސާ ކުރިއަށް ގެންދެވިފައިނުވާތީއެވެ. އެމްޑީޕީން ސުޕްރީމް ކޯޓަށް މައްސަލަ ހުށަހެޅީ ނައިބު ރައީސް ނެތް ހާލަތްތަކުގައި ރިޔާސަތު ބަލަހައްޓާ މެމްބަރަކު އިންނަވައިގެން ޖަލްސާ ކުރިއަށް ގެންދަން ޖެހޭނެ ކަމަށް ކަނޑައެޅުމަށެވެ.
މިކަމާއި ގުޅިގެން ވަކީލުވަނީ މަޖިލީހުގެ ގަވައިދުގެ 205 ވަނަ މާއްދާގެ ރ. ގައި ބުނެފައިވާ ގޮތުގައި އިތުބާރު ނެތް ކަމުގެ ގަރާރެއް ހުށަހަޅާފައިވާ ވަގުތު އިތުރު އެއްވެސް ކަމަކާ މެދު ބަހުސް ކުރެވޭނީ ނުވަތަ ގޮތެއް ނިންމޭނީ މަޖިލީހުގެ ރައީސް މަގާމުން ވަކިކުރުމުގެ ގަރާރާމެދު ގޮތެއް ނިންމުމަށްފަހުގައިކަމަށް ވިދާޅުވެފައެވެ. އަދި އެ މާއްދާގެ މަފްހޫމަކީ އިތުބާރު ގެއްލިފައިވާ ނަމަ މަޖިލީހުން ކުރާ ހުރިހާ މަސައްކަތަކާ މެދު ސުވާލު އުފެދުން ކަމަށާއި އެ އިތުބާރު އަބަދުވެސް އޮންނަން ޖެހޭނެ ކަމަށްވެސް އެބޭފުޅާ ފާހަގަކުރެއްވިއެވެ.
"އޭގެ ފަހުން ރައްޔިތުންގެ މަޖިލީހުގެ ރައީސް ކުރައްވާ ކަންކަމުގެ ގާނޫނީ ހައިސިއްޔަތާއި ކްރެޑިބިލިޓީއާ މެދު ސުވާލު އުފެދުމުގެ ސުވާލު އުފައްދާނެ ޖާގަ އެބައޮތޭ،" އަހްމަދު ވިދާޅުވި އެވެ.
ވަކީލުގެ ވާހަކަފުޅަށް ރައްދުދެއްވަމުން އެ މައްސަލައަށް ތަދައްޙުލްވި ޕީޕީއެމް/ޕީއެންސީގެ ފަރާތުން ވާކާލާތު ކުރެއްވި ކުރީގެ ބަންޑާރަ ނައިބު އައިޝަތު އާޒިމާ ޝަކޫރު ވިދާޅުވީ، ބަޖެޓާއި އިންތިހާބީ ރައީސް ހުވާކުރުމުގެ ކަންކަމަށް ހުރަސް ނޭޅޭނެ ކަމަށާއި އެކަންކަމަށް ހައްލު ލިބެން ޖެހޭނެ ކަމަށެވެ. އަދި ކިތަންމެ ގިނަ މެންބަރުން ސޮއިކުރައްވާފައި އޮތަސްވެސް ވޯޓް އިތުބާރު ނެތްކަމަށް ފާސްނުކުރެވިއްޖެނަމަ، އެ ހާލަތުގައި މަޖިލީހުގެ ރައީސްގެ ބާރުތައް ކުރިއަށް ދާނެކަމަށެވެ.
ސުޕްރީމް ކޯޓުގައި މި މައްސަލަ ބައްލަވާފައިވަނީ ފަނޑިޔާރު އަލްއުސްތާޛް މަޙާޒު ޢަލީ ޒާހިރު، ފަނޑިޔާރު ޑރ. އަޒްމިރާލްދާ ޒާހިރު، ފަނޑިޔާރު އަލްއުސްތާޛް ޙުސްނުއްސުޢޫދު، ފަނޑިޔާރު އަލްއުސްތާޛް ޢަލީ ރަޝީދު ޙުސައިން، ފަނޑިޔާރު ޑރ. މުޙައްމަދު އިބްރާހީމްއެވެ. މައްސަލައިގެ ރިޔާސަތުގައި އިންނެވީ ފަނޑިޔާރު މަހާޒްއެވެ.
މިމައްސަލައިގައި މިއަދު ބޭއްވި ދެވަނަ އަޑުއެހުމުގައި ވަކާލާތު ކުރަން ބޭނުންވި ހުރިހާ ފަރާތްތަކަކުން ވަކާލާތުކޮށް ފަހުބަސް ވިދާޅުވުމަށް ފުރުސަތު ދިނުމަށްފަހު ގާޒީ މަހާޒް ވަނީ މިމައްސަލައިގެ އަޑުއެހުންތައް ނިމުނީ ކަމަށް އިއުލާންކުރައްވާފައެވެ.
Ads by STO
