ޣައްޒާއަށް ބޯ ފެން ހިފައިގެން ދިޔަ ޓްރަކަކަށް ބޮން އެޅުމުން، ރޮޒައިނާ ކޯފާ އިސްކުރައްވައިފި
ފަލަސްޠީނުގެ ރައްޔިތުންނަށް އެހީތެރިވުމަށް މިސްރުން ޣައްޒާއަށް ފެން ގެންދިޔަ ޓްރަކަކަށް ޔަހޫދީ ސިފައިން ބޮން އެޅުމުން، ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު، އިޒްރޭލުގެ ބޮޑުވަޒީރު ނަތަންޔާހޫއަށް ބަހުގެ ހަމަލާތަކެއް ދެއްވައިފިއެވެ.
އެކްސްގައި ކުރައްވައިފައިވާ ޕޯސްޓެއްގައި އޭނާ ވިދާޅުވީ، ނަތަންޔާހޫ ކުރާ ކަމަކީ މީހުން މެރުން ކަމަށާއި، އޭނާ އަކީ ކުޑަކުދިން މަރާ މީހެއް ކަމަށެވެ.
އަދި ނަތަންޔާހޫގެ ޢަމަލުތައް "ޖަސްޓިފައި" ކޮށްދެވޭނެ އެއްވެސް ގޮތެއް ނެތް ކަމަށާއި، އޭނާ ކުރަމުންދާ ނުބައި ޢަމަލުތައް އޭނާއާއި އަރާ ހަމަ ކުރާނެ ކަމަށެވެ.
ރޮޒައިނާ ކުރެއްވި އިތުރު ޕޯސްޓެއްގައި ވިދާޅުވީ، އދ އިން ފަލަސްޠީނުގެ މައުސޫމް ރައްޔިތުންނަށް އިންސާފު ހޯދައިދިނުމުގައި އިސްނަގާނެ ކަމަށް އުއްމީދު ކުރައްވާ ކަމަށާއި، އިޒްރޭލުން ހިންގާ ޖަރީމާތައް ބައިނަލްއަޤްވާމީ ކޯޓަކަށް ހުށަހަޅައިގެން ބަލާނެ ކަމަށް ވެސް އޭނާ އުއްމީދު ކުރައްވާ ކަމަށެވެ.
ޔަހޫދީން ޣައްޒާއަށް ބޮމުގެ "ވާރޭ" އޮއްސަން ފެށިތާ މަސް ދުވަސްވެފައިވާއިރު، މިހައިތަނަށް 10،328 މީހުން ވަނީ ޝަހީދުކޮށްލައިފައެވެ. މީޑިއާ ރިޕޯޓްތައް ބުނާ ގޮތުގައި ޝަހީދުންގެ ތެރޭގައި 4،237 ކުޑަކުދިންނާއި، 2،719 އަންހެނުން ހިމެނެއެވެ.
ދުނިޔޭގެ ގިނަ ޤައުމުތަކުގެ ރައްޔިތުން ދަނީ ފަލަސްޠީނުގެ ޙައްޤުގައި މަގުތަކަށް ނުކުމެ އިޙުތިޖާޖު ކުރަމުންނެވެ. އަދި އިޒްރޭލަށް ތާއީދު ކުރާ ޤައުމުތަކަށް ނިސްބަތްވާ ރައްޔިތުންގެ ތެރެއިން ގިނަ ބަޔަކު ވެސް ފަލަސްޠީނުގެ ރައްޔިތުންނަށްޓަކައި ހަމްދަރުދީ ފާޅުކުރަމުންދެއެވެ.
Ads by STO
